Ecclesiastes 3

Mossi MPBU (WẼNNAAM SEBRE 2014)

← Chapter 2 Jump to: Chapter 4 →

1Bũmb fãa tara a wakate. Bũmb nins fãa sẽn maand dũniyã zugã tara b wakate.

2Rogem tara a wakate, la kũum me tara a wakate. Selb tara a wakate, la võob me tara a wakate.

3Kʋʋb wakat beeme, la tɩpg wakat me beeme. Siigr wakat beeme, la meeb wakat me beeme.

4Yãbr wakat beeme, la laad wakat me beeme. Wiisg wakat beeme, la saoog wakat me beeme.

5Kug lobr wakat beeme, la b wʋkr wakat me beeme. Mobg taab wakat beeme, la zãag taab wakat me beeme.

6Baoob wakat beeme, la meneng wakat me beeme. Zãab wakat beeme, la lobr wakat me beeme.

7Fuug kẽegr wakat beeme, la a sẽeb wakat me beeme. Sĩndim wakat beeme, la goam wakat me beeme.

8Nonglem wakat beeme, la kisgr wakat me beeme. Zabr wakat beeme, la vɩ-bãan wakat me beeme.

9Tʋmtʋmd sẽn tʋmdã, bõe yõod la a paamda?

10Mam yãnda tʋʋmd ning Wẽnnaam sẽn kõ ninsaalbã tɩ b maanã.

11Wẽnnaam maana bũmb fãa sõama n zems a wakate. Bãmb ninga wakat sẽn ka sɛt tagsg ninsaal sũur pʋgẽ, baa ne yẽnda sẽn ka tõe n tags n bãng tʋʋmd ning Wẽnnaam sẽn maan hal sɩngr tɩ ta sɛɛbã.

12La mam miime tɩ bũmb ka be sẽn noom ninsaal n yɩɩd yẽnda sẽn na n paam sũ-noog la naar a vɩɩmã wakat ye.

13Ned sã n dɩtẽ la yũuda, la a paam sũ-noogo, a bãng tɩ yaa Wẽnnaam kũuni.

14Mam miime tɩ bũmb ning fãa Wẽnnaam sẽn maan paada wakat sẽn ka sɛta. Bũmb ka be n na n paas-a wall boog-a ye. Wẽnnaam n maan-a t'a yɩ woto tɩ nebã zoe bãmba.

15Bũmb ning sẽn be wã rag n zĩnda pĩnda. La bũmb ning sẽn na n wa zĩndã rag n zoe n zĩndame. Wẽnnaam kɩtdame tɩ bũmb nins sẽn dag n loogã leb n wa.

16La sẽn paase, mam yãndame tɩ dũniyã ka, b basda bʋ-sɩdã n maand wẽnga, b basda tɩrlem n maand wẽnga.

17Mam tagsa m sũur pʋgẽ tɩ Wẽnnaam na n kaoo nin-tɩrg la nin-wẽng bʋʋdo. Bala, yɛlã fãa tara b zĩiga, la tʋʋmd fãa tara a wakate.

18Mam tagsa ninsaal yell m sũur pʋgẽ, n yeel tɩ Wẽnnaam rag n makda ninsaalbã n na n ges tɩ b mensã tõe n bãng tɩ b yaa wa rũms bala.

19Bala, bũmb ning sẽn paamd ninsaalbã ne bũmb nins sẽn paamd rũmsã yaa bũmb a yembre. A yembr kiida wa a to. Bãmb b yiibã fãa yõy vʋʋsem yaa bũmb a yembre. Ninsaal ka yɩɩd rũng ye. La bũmbã fãa yaa zaalem

20Bãmb fãa rabda zĩ-yende. B fãa maana ne tẽng tom, la b fãa na n leba tẽng tomẽ.

21Ãnda n mi ninsaal yõy vʋʋsem sã n kẽngda yĩngr tɩ rũms rẽnd sigd tẽnga?

22Mam yãame tɩ bũmb ka be sẽn noom ninsaal n yɩɩd a sẽn na n maan sũ-noog ne a tʋʋmã ye. Yaa woto la yẽnda rẽnda. Ãnda n na n kɩt tɩ yẽnda lebg n wa yãnd bũmb ning sẽn na n wa zĩnd yẽnda loogr poorẽ wã?

← Chapter 2 Jump to: Chapter 4 →