Ecclesiastes 2

Mossi MPBU (WẼNNAAM SEBRE 2014)

← Chapter 1 Jump to: Chapter 3 →

1Mam tagsa m sũur pʋgẽ tɩ mam na n makame n maan sũ-noogo, la m bãng sũ-noog sẽn yaa-a soaba. La ade, yõwã me yaa zaalem.

2Mam yeelame tɩ laad yaa zu-kaalgo, la sũ-noog yõod yaa bõe?

3Mam yãka yam n na n noog m sũur ne reezẽ rãam, la m gũus m meng n kẽn ne yam, la m loe m meng ne yalemd ning mam sẽn maandã, n tõog n bãng ninsaalbã sẽn maand bũmb ning dũniyã zug b vɩɩmã wakatã sã n zemsame.

4Mam tʋma tʋʋm-kãsemse: Mam mee rot m mengã yĩnga, la m sel reezẽ tɩɩs m mengã yĩnga.

5Mam maana zẽed ne tɩɩs zĩisi, la m sel tɩɩs buud fãa sẽn womd biisã bãmb pʋse.

6Mam maana bãgs sẽn na n zãgs tɩ-poalã bõeeb zĩiga.

7Mam daa yem-daad la yem-pogse, ne b kamb nins b sẽn dog mam zakẽ wã. Mam daa baa rũm-bɛd ne rũm-bãooneg wʋsgo, n yɩɩd neb nins fãa sẽn deng maam n zĩnd Zeruzalɛmã.

8Mam paama wanzuri ne sãnem wʋsgo, yaa rĩm-dãmbã ne soolem wʋsg laogo. Mam daa pagb ne raop sẽn yaa yɩɩn-yɩɩndba, la pʋg-bi wʋsg ninsaalb kambã sẽn nonge.

9Woto, mam lebga kãseng n yɩɩd neb nins fãa sẽn da reng maam Zeruzalɛmã. Sẽn paase, mam yamã kell n paa ne maam.

10Bũmb ning fãa mam ninã sẽn yãnd n datã, mam ka mong-b ye. Sũ-noog ning fãa mam sũurã sẽn dag n datã, mam ka mong-a ye. Bala, mam sũur yɩɩ noog ne m tʋʋmdã fãa. La mam tʋʋmdã fãa yõod yaa a woto.

11La mam tagsa tʋʋm nins fãa mam nus sẽn dag n maanã, la namsg nins fãa mam sẽn dag n namsã yelle. La ade, fãa yaa zaalem. A wẽnda wa ned sẽn digd sebgo. Bũmb sẽn tar yõod ka be dũniyã zug ye. Yam la yalemd ka võor ye.

12Woto kɩtame tɩ mam tags n ges yam, la zu-kaalg ne yalemd yelle. Ges-y wɛ! Ned ning sẽn na n wa reeg-a rĩmã zĩigã na n wa maana bõe? Yaa bũmb ning b sẽn dag n zoe n maanã bala.

13La mam yãndame tɩ yam yõod yɩɩda yalemdo, wa vẽenem yõod sẽn yɩɩd likã.

14Yam soab tara nin n getẽ, la yalem kẽnda lik bida pʋgẽ. La baa sẽn yaa woto wã, mam miime tɩ bãmb b yiibã fãa baoosg yaa bũmb a yembre.

15La mam tagsa m sũur pʋgẽ tɩ yalem baoosg sẽn yaa bũmb ningã, mam me baoosg na n yɩɩ a woto. Dẽ, mam yamã yɩɩdem nafr yaa bõe? La mam tagsa m sũur pʋgẽ tɩ yõwã me yaa zaalem.

16Bala, b ka na n tẽeg yam soab yell n yɩɩd yalem ye. La wakat n wat tɩ b na n yĩm bãmb fãa yelle. Yalmã me na n kii wa yam soab sẽn na n ki wã.

17Dẽ, mam kisga vɩɩmã, bala, tʋʋm nins fãa sẽn maand dũniyã zugã yaa wẽnse. Bala, fãa yaa zaalem, a wẽnda wa ned sẽn digd sebgo.

18Mam kisga tʋʋm nins fãa mam sẽn tʋm dũniyã zug ka wã, bala, mam na n loogame n bas-a ne ned ning sẽn na n wa reeg-a mam zĩigã.

19La ãndã n mi nin-kãng sã n na n yɩɩ yam soab wall yalma? Baoosgo, yaa yẽnda n na n soog mam tʋʋmã fãa, tʋʋm nins mam sẽn dag n tʋm ne yam dũniyã zugã. Woto me yaa zaalem.

20Woto yĩnga, mam sũurã sãama ne tʋʋm nins fãa mam sẽn dag n maan dũniyã zug ka wã yĩnga.

21Bala, nina tʋmda ne yẽesem la bãngr la tõogre, n bas a yõodã tɩ ned a to sẽn ka maan tʋʋmdã wa rɩke. Woto me yaa zaalem, la a yaa wẽng wʋsgo.

22Ninsaal tʋʋmdã ne a namsgã fãa dũniyã zug ka wã yõod yaa bõe?

23Yẽnda rasmã fãa yaa sũ-sãanga. La yẽnda yɛlã fãa yaa toogo. Baa yʋngo, yẽnda sũurã ka tar vʋʋsg ye. Yõwã me yaa zaalem.

24Bũmb ka be sẽn yaa noog ne ninsaal n yɩɩd a sẽn na n paam n dɩ la a yũ, n maan sũ-noog ne a tʋʋmd ye. La ne yõwã me, mam yãame t'a yita Wẽnnaam nengẽ.

25Bala, ãndã n tõe n dɩ n maan sũ-noogo, sã n ka maam?

26Ned manesem sã n tat Wẽnnaam yam, bãmb kõta a soab yam la bãngre, la sũ-noogo. La bãmb kõta yel-wẽn soab namsgo, t'a tʋm n wʋk n bĩng ned ning sẽn tat Wẽnnaam yamã. Woto me yaa zaalem, la a wẽnda wa ned sẽn digd sebgo.

← Chapter 1 Jump to: Chapter 3 →