Ecclesiastes 11

Mossi MPBU (WẼNNAAM SEBRE 2014)

← Chapter 10 Jump to: Chapter 12 →

1Lob f bur koom zugu, bala, wakat sẽn wate, fo na n leb n paam-a lame.

2Yãk fo sẽn tarã n pʋɩ ne neb a yopoe wall a nii, bala, fo ka mi toog ning sẽn na n wa zĩnd dũniyã zugã ye.

3Saag sã n kʋɩ, a niida dũniyã zugu. Tɩɩg sã n lʋɩ rɩtg wall goabga, a paada zĩig ning a sẽn lʋɩẽ wã.

4Ned sã n gũusd sebgo, yẽndã ka na n bʋd baa fɩ ye. La ned sã n get sawato, yẽndã ka na n tigs baa fɩ ye.

5Fo sẽn ka mi sobg sẽn tũud zĩig ningã, wall kõab sẽn sũgd taab to-to pag sẽn tʋt pʋgẽ wã, woto me, fo ka tõe n bãng tʋʋmd ning Wẽnnaam sẽn maandã fãa ye.

6Bʋd f bõn-buud yibeoogo, la f ra bas f nus tɩ yɩ zaalem zaabr ye. Bala, fo ka mi bõn-buud ning sẽn na n sake, wall a yiibã fãa sã n na n yɩɩ sõama ye.

7Vẽenem yaa noogo, la ned nin sã n yãt wĩndga, a sũur yaa noogo.

8Ned sã n vɩ n kaoos yʋʋm wʋsgo, bɩ a maan sũ-noog yʋʋm-kãens fãa pʋgẽ. La bɩ a tẽeg tɩ likã rasem na n yɩɩ wʋsgo. Bũmb ning fãa sẽn na n wa wã yaa zaalem.

9Bi-bɩɩga, maan sũ-noog f bi-bɩɩlmã wakate, la f noog f sũur f bɩʋʋngã wakate, n tũ soay nins f sũurã sẽn date, la f ninã sẽn getã. La bɩ f bãng tɩ Wẽnnaam na n bʋʋ ne foom bõn-kãens fãa yĩnga.

10Rẽ yĩngã, rig sũ-pa-noaang t'a loog n bas-fo, la f zãag f meng ne wẽnga. Bala, yãadem ne bi-bɩɩlem wakat yaa zaalem.

← Chapter 10 Jump to: Chapter 12 →