Hebrews 1

Marwari Bible

Jump to: Chapter 2 →

1परमेसर नै बीते काल में भविसयदाताओ रै जरियै हरैक मौकै में हरैक परकार ऊं म्हौरै बापदादों ऊं बातचीत की।

2लेकिन इण आखरी दिनां में परमेसर म्हौरै ऊं आपरै बेटे रै जरियै बातचीत की, जिणनै उणै सगळी चीजों रौ वारिस ठैरायौ अर बेटे रै जरियै परमेसर नै सगळी सिस्टी रची है।

3वो बेटौ परमेसर री महिमा रौ उजाळौ, अर उणरै स्वरूप री छाप है, अर सगळी चीजों नै आपरै सामरथ रै वचन ऊं संभाळै है। उणै म्हौरै पापों नै धोयनै अबै वो सरग में सर्वसक्तिमान परमेसर रै जीमणा पाड़ै विराजमान है।

4अर सरगदूतो ऊं उतरौ ही उतम ठैरयो, जितौ उणै सरगदूतो ऊं मोटे पद रौ वारिस होयनै उतम नाम पायो।

5क्यूंकै परमेसर किणी भी सरगदूत नै कदैई ऐड़ौ नीं कयौ, “थूं म्हारौ बेटौ, आज म्हैं थारौ पिता बण्यौ हूं।” अर नीं किणी सरगदूत ऊं परमेसर ओ कयौ, “म्हैं उणरौ पिता बणूंला, अर वो म्हारौ बेटौ होवैला।”

6अर जद परमेसर पहिलौठे नै जगत में लावै है, तो कैवै है, “परमेसर रा सगळा सरगदूत उणरी आराधना करै।”

7सरगदूतो रै बारै में बतातौ होयौ ओ कैवै है, “उणै आपरै सगळै सरगदूतो नै पवन बणाया, अर आपरै सेवकों नै अग्‍नि री लपटो बणाया।”

8लेकिन आपरै बेटे रै बारै में ओ कैवै है, “हे परमेसर, थारौ सिहासण जुग-जुग रैवैला, थारै राज्य रौ राजडंड धारमिकता रौ राजडंड है।

9थां धरम ऊं परैम अर अधरम ऊं बैर राख्यौ, इण खातर हे परमेसर, थांरै परमेसर नै थांरै साथियो ऊं बढ़नै आंणंद रै तेल ऊं थांनै अभिसेक करया।”

10परमेसर ओ भी कैवै है, “हे परभु, सरूआत में थै धरती री सिस्टी की, अर सरग थांरै हाथो री कारीगरी है।

11ऐ तो नास हो जावैला, पण थूं बण्यौ रैला, अर ऐ सगळा कपड़ो रै ज्यूं पुराणा हो जावैला।

12अर थूं उणौनै चादर रै ज्यूं लपटेला, अर ऐ कपड़ो रै ज्यूं बदळ जावैला। लेकिन थूं वोहीज है, अर थारै बरसो रौ अनत नीं होवैला।”

13परमेसर कदैई किणी सरगदूत ऊं ऐड़ौ नीं कयौ, “थूं म्हारै जीमणी तरफ बैठ जा, जैड़ी तांई म्हैं थारै दुसमनो नै थारै चरणौ री चौकी नीं बणा दूं।”

14कांई सगळा सरगदूत उद्धार पावण वाळौ री सेवा रै लियै भेज्यौड़ी सहायक आतमाओ है?

Jump to: Chapter 2 →