Hebrews 5

Marwari Bible

← Chapter 4 Jump to: Chapter 6 →

1क्यूंकै हरैक महायाजक मिनखौ में ऊं ठैरायौ जावै है, अर परमेसर रै बारै में लोगां नै बतानै रै लियै राख्यौ जावै है, ताकी वो पापों रै लियै भेट या बलियो चढ़ाया करै।

2अर वो नासमझ, अर भूले भटको रै साथै नरमाई ऊं व्यवहार कर सकै है, क्यूंकै वो आप ही कमजोरियो रै बस में है।

3अर इण वास्तै उणनै चाहीजै, की ज्यौ लोगां रै लियै, व्यौंही खुद रै लियै भी पापबलि चढ़ाया करै।

4अर ओ आदर रौ पद कोई अपणै आप ऊं कोनीं लईजै, जैड़ी तांई की हारून रै ज्यूं परमेसर री तरफ ऊं ठैराया नीं जावै।

5व्यौंही मसीह भी महायाजक बणणै री महिमा अपणै आप ऊं कोनीं ली, बल्कि परमेसर उण ऊं कयौ हो, “थूं म्हारौ बेटौ है, आज म्हैं थारौ पिता बण्यौ हूं।”

6इण तरैह वो दूजी जगा में भी कैवै है, “थूं मलिकिसिदक री रीति माथै हमेसां रै लियै याजक है।”

7यीसु आपरी देह में रैवणै रै दिनां में जोर जोर ऊं पुकारनै, अर रोवतो होयौ उण ऊं जिकौ उणनै मौत ऊं बचा सकै हो, उण ऊं पराथना अर विनती की, अर भगती रै खातर उणरी सुणी ही।

8अर परमेसर रौ बेटौ होते हुए भी, उणै दुख उठा उठायनै आग्या मांनणी सीखी।

9अर सिद्ध बणनै, अपणै सगळी आग्या मांनणैवाळौ रै लियै हमेसां रै लियै उद्धार रौ कारण हो गियौ।

10अर यीसु नै परमेसर री तरफ ऊं मलिकिसिदक री रीति पे महायाजक रौ पद मिळियौ।

11इणरै बारै में म्हौरै खनै कैवणै री तो घणी बातां है, पण जिणरौ समझाणौ मुसकिल है। क्यूंकै थै ऊंचौ सुणण लागा हो।

12वास्तव में इतै वगत तांई तो थांनै गुरु हो जांणौ चाहीजै हो, लेकिन थांनै तो अजी किणी ऐड़ै मिनख री जरुत है जिकौ थांनै परमेसर रै वचनो री सरूआत ऊं सिकसा वळै पाछी सिखावै। अर ऐड़ा हो गिया हो, की थांनै अन्‍न रै बदळै अजी तांई दूध इज चाहीजै।

13क्यूंकै दूध पीवणवाळै टाबर नै तो धरम रै वचन री पिछांण कोनीं होवै, क्यूंकै वो तो टाबर है।

14लेकिन अन्‍न तो जवानो रै वास्तै है, जिणौ अपणै अनुभव ऊं भलै-भूंडै में पिछांण करणी सीख ली है।

← Chapter 4 Jump to: Chapter 6 →