Hebrews 8

Marwari Bible

← Chapter 7 Jump to: Chapter 9 →

1अबै जिकौ बातां म्हौ कर रिया हो उणमे ऊं सबां ऊं मोटी बात आ है की म्हौरौ ऐड़ौ महायाजक है, जिकौ सरग में उण सर्वसक्तिमान परमेसर रै सिंहासण रै जीमणा पाड़ै विराजमान है।

2वो पवितर जगा मतलब उण साचै तम्बू रौ सेवक होयौ, जिणनै किणी मिनख नै कोनीं, बल्कि परभु बणायौ है।

3क्यूंकै हरैक महायाजक भेट अर बलिदान चढ़ानै रै लियै ठैरायौ जातौ हो, इण कारण जरुरी है की इण महायाजक रै खनै भी कीं चढ़ानै रै लियै हो।

4जे वो धरती माथै होवतो तो कदैई याजक नीं होवतो, इण वास्तै की व्यवस्था रै अनुसार भेट चढ़ानै वाळा याजक तो है।

5जिकौ सरग में की चीजों रौ प्रतिरूप अर प्रतिबिम्ब री सेवा करै है, ज्यूं जद मूसा तम्बू बणाणै वाळौ हो, तो उणनै आ चेताणी दे दी ही, “देख जिकौ नमूनो थनै भाखर माथै दिखायौ गियौ हो, उणरै अनुसार सगळौ कीं बणाणौ।”

6पण उण याजकौ ऊं बढ़नै सेवा यीसु नै मिळी क्यूंकै वो जिण वाचा रौ बिचोळियो हो, वो पुराणी वाचा ऊं उतम है अर उतम चीजों रै वायदो माथै आधारित है।

7क्यूंकै जे पैली वाचा में कोई खोट नीं होवतो, तो दूजी वाचा रै लियै कोई जगा ही कोनीं होती।

8बल्कि परमेसर नै उण लोगां में खोट देखनै कैवै है, “परभु कैवै है वो दिन आ रिया, जद म्हैं इजरायल रै घराणै ऊं, अर यहूदा रै घराणै ऊं, एक नई वाचा करूंला।

9आ वाचा वैड़ी नीं होवैला जैड़ी म्हैं उणरै बापदादों रै साथै उण वगत की ही, जद म्हैं उणौरौ हाथ झालनै मिसर देस ऊं निकाळ लायौ। क्यूंकै परभु कैवै है, की वे म्हारी वाचा रा विसवासी नीं रिया, अर म्हैं उणौरी सुधि कोनीं ली।

10वळै परभु कैवै है, की जिकौ वाचा म्हैं उण दिनां रै पछै इजरायल रै घराणै ऊं करूंला, वो आ है, की म्हैं म्हारी व्यवस्था उणौरै मनो में बसाऊंला, अर उणौरै काळजै माथै म्हैं उणनै लिख दूंला, म्हैं उणौरौ परमेसर होवूंला, अर वे म्हारा लोग होवैला।

11अर हरैक अपणै देसवाळै नै अर अपणै भाई नै आ सिकसा नीं दैला, की थूं परभु नै जांण, क्यूंकै छोटे ऊं मोटे तांई सगळा म्हनै जांणैला।

12क्यूंकै म्हैं उणौरा गुनाह माफ करूंला, अर उणौरै पापों नै याद भी नीं राखूंला।”

13नई वाचा रै आवण ऊं उणै पैली वाचा नै पुराणी ठैरा दी, अर जिकौ चीज पुराणी अर बिना मतलब री हो जावै है, उणरौ मिट जांणौ जरुरी है।

← Chapter 7 Jump to: Chapter 9 →