John 13

Dutch Frisian

← Chapter 12 Jump to: Chapter 14 →

1Verdäm Passafast oba, aus Jesus wisst, daut siene Stund jekohme wea, daut hee üt dise Welt nom Voda hangohne sull, doa hee de Sienje, dee enne Welt wäare, jeleeft haud, soo haud hee ahn leef bott aum Enj.

2En biem Owentkost äte, aus de Diewel aul däm Judas, Siemoon sien Sän, däm Iescharijot, daut emm Hoat jelajcht haud, daut hee am verode sull,

3steit [Jesus], weetend, daut de Voda am aules enne Henj jejäft haud, en daut hee von Gott ütjegohne wea en no Gott hanjeit,

4hee steit vom Owentkost opp en läd siene Bowatjleeda auf; en hee nauhm een Liendüak en bunk sich daut omm.

5Donn goot hee Wota enne Wauschkomm en funk aun, de Jinja äare Feet too wausche en met däm Liendüak auftodreaje, met daut hee ommjebunge wea.

6Hee tjeem no Siemoon Peeta; en dee säd too am: Harr, dü wauschst miene Feet?

7Jesus auntwuad en säd too am: Waut etj doo, weetst dü nu nijch, dü woascht daut oba nohäa vestohne.

8Peeta sajcht too am: Niemols mea saust dü mie de Feet wausche! Jesus auntwuad am: Wann etj die nijch wausch, hast dü tjeen Deel met mie.

9Siemoon Peeta säd too am: Harr, nijch blooss miene Feet, oba uck de Henj en daut Haupt Kopp.

10Jesus säd too am: Wäa jebode es, bruckt sich nijch wausche, buta de Feet, sonda es gauns rein; en jie send rein, oba nijch aula.

11Hee tjannd däm, dee am verode wudd; doaromm säd hee: Jie send nijch aula rein.

12Aus hee äare Feet jewosche haud en siene Bowatjleeda jenohme haud, läd saut hee sich wada aum Desch en säd too ahn: Weet jie, waut etj jünt jedohne ha?

13Jie nane mie Meista en Leahre, en jie saje rajcht, dan daut sie etj.

14Wann etj nu, de Harr en de Meista, jüne Feet jewosche ha, soo send uck jie schuldijch, eenaunda de Feet too wausche.

15Dan etj ha jünt een Biespell jejäft, omm daut, soo aus etj jünt jedohne ha, uck jie doone.

16Woahrhauft, woahrhauft, saj etj jünt: Een Tjnajcht es nijch jrata aus sien Harr, uck een Jeschetjta nijch jrata, aus dee am jeschetjt haft.

17Wann jie dit weete, seelijch se jie, wann jie daut doone.

18Etj räd nijch von jünt aula, etj weet wäm etj ütjewält ha; oba omm daut de Schreft erfellt woat: „Dee met mie daut Broot at, haft siene Feet jäajen mie oppjehowe“. {Ps.41.10}

19Von nu aun saj etj daut jünt, eea daut passeat, omm daut jie, wann daut passeat, jleewe, daut etj et sie.

20Woahrhauft, woahrhauft, saj etj jünt: Wea oppnehmt, wämemma etj schetje woa, nehmt mie opp; wäa oba mie oppnehmt, nehmt däm opp, dee mie jeschetjt haft.

21Aus Jesus dit jesajcht haud, wea hee emm Jeist oppjeräajcht en zeijd en säd: Woahrhauft, woahrhauft, saj etj jünt: Eena von jünt woat mie verode.

22Donn tjitjte de Jinja eena däm aundre aun, rotlooss, von wäm hee räd.

23Oba eena von siene Jinja, däm Jesus leef haud, lach aum Desch aun Jesus siene Brost.

24Disem jeef Siemoon Peeta een Teatjen, doamet hee froage sull, wäa daut es, von wäm hee räd.

25Jana oba, länd sich aun Jesus siene Brost, säd too am: Harr, wea es daut?

26Jesus auntwuad: Jana esset, däm etj een Biet, wann etj daut ennjedukt ha, jäwe woa. En aus hee daut Biet ennjedukt haud, jeef hee daut däm Judas, Siemoon sienen Sän, däm Iescharijot.

27En no disem Biet fuu de Soton en am. Donn sajcht Jesus too am: Waut dü deist, doo schwind.

28Oba tjeena von dee aum Desch lage vestunde, wuaromm hee am daut säd.

29Eenje dochte, wiel Judas de Jeldkauss haud, daut Jesus too am säd: Tjeep, waut wie fe daut Fast brucke, oda daut hee de Oame waut jäwe sull.

30Aus jana daut Biet jenohme haud, jintj hee fuats rüt. Daut wea oba Nacht.

31Aus hee rüt jegohne wea, säd Jesus: Nu es de Menschesän veharlijcht, en Gott es en am veharlijcht.

32Wann Gott veharlijcht es en am, soo woat uck Gott am veharlijche enn sich selfst, en sooboolt woat hee am veharlijche.

33Tjinja, noch ne korte Tiet sie etj bie jünt; jie woare mie seatje, en soo aus etj too de Jude säd: Wua etj hangoh, tje jie nijch hankohme, soo saj etj nu uck too jünt.

34Een niejet Jeboot jäw etj jünt, daut jie jünt unjaenaunda leewe, omm daut, soo aus etj jünt leef ha, uck jie enaunda Leef habe.

35Doaraun woare aule ertjane, daut jie miene Jinja send, wann jie jünt unjaenaunda Leef ha.

36Siemoon Peeta sajcht too am: Harr, woa jeist dü han? Jesus auntwuad am: Wua etj hangoh, kaunst dü mie nu nijch folje; dü woascht mie oba nohäa folje.

37Peeta sajcht too am: Harr, wuaromm kaun etj die nü nijch folje? Mien Läwe well etj fe die lohte hanjäwe.

38Jesus auntwuad: Dien Läwe west dü fe mie lohte? Woahrhauft, woahrhauft, saj etj die, de Hohn woat nijch tjreie, bott dü die dreemol von mie aufjesajcht hast.

← Chapter 12 Jump to: Chapter 14 →