John 21

Dutch Frisian

← Chapter 20 Jump to:

1No däm openboad Jesus sich wada de Jinja aum Mäa von Tiberias. Oba aulsoo openboad hee sich:

2Siemoon Peeta en Toomas, jenant Tweelinj, en Natanael, dee von Kana enn Galiläa wea, en de Tsebedäus siene Säns en twee aundre von siene Jinja weare toop.

3Siemoon Peeta säd too ahn: Etj goh fesche. See säde too am: Uck wie gohne met die met. See jinje rüt en steaje emm Schepp, en enn de Nacht jreepe see nuscht.

4Oba ausset tiedijch Zemorjess wea, stund Jesus aum Eewa, doch de Jinja wisste nijch, dautet Jesus es wea.

5Donn sajcht Jesus too ahn: Tjinja, ha jie waut too äte oda tjeene Fesch? See auntwuade am: Nä.

6Hee oba säd too ahn: Schmiet daut Nat üt aune rajchte Sied vom Schepp, en jie woare finje fange. See schmeete daut üt en kunne daut wäajen de väl Fesch nijch mea tratje.

7Donn säd jan Jinja, däm Jesus leef haud, too Peeta: Daut es de Harr! Siemoon Peeta, aus hee head, daut et de Harr es wea, nehm hee sien Bowatjleet omm hee wea noaktijch en schmeet sich emm Mäa.

8Oba de aundre Jinja tjeeme metem tjleenen Schepp, (see weare nijch wiet vom Eewa, bie tweehundat Älle) bie hundat meeta en schlapte daut Nat met de Fesch.

9Aus see nu aum Laund ütstäaje, sache see een Kolefia brenne, en Fesch doabowe lidje en Broot.

10Jesus sajcht too ahn: Brinjt häa von de Fesch, dee jie nu jejräpe ha.

11Siemoon Peeta jintj en schlapt daut Nat voll groote Fesch, hundat dree en feftijch, oppem Laund; en wann doa uck soo väl weare, reet daut Nat nijch twei.

12Jesus sajcht too ahn: Kohmt hea, Freestitj äte. Oba tjeena von de Jinja woagd sich am too froage: Wäa best dü? See wisste, dautet de Harr es wea.

13Jesus tjeemt en nehmt daut Broot en jeef daut ahn, en soo uck dän Fesch.

14Dit es aul daut dredde Mol, daut Jesus sich de Jinja jeopenboat haud, no däm aus hee ütem Doot wea oppjestohne.

15Aus see Freestitj jejäte haude, sajcht Jesus too Siemoon Peeta: Siemoon, Joonas Sän; leefst dü mie mea aus dise? Hee säd too am: Jo, Harr, dü weetst, daut etj die leef ha. Hee [Jesus] sajcht too am: Weid miene Lama.

16Wada sajcht hee tom tweede Mol too am: Siemoon, Joonas Sän; leefst dü mie? Hee säd too am: Jo, Harr, dü weetst, daut etj die leef ha. Hee [Jesus] sajcht too am: Heed miene Schop.

17Hee sajcht tom dredden Mol too am: Siemoon, Joonas Sän; hast dü mie leef? Peeta word trüarijch, daut hee tom dredden Mol too am säd fruach: Hast dü mie leef? En säd too am: Harr, dü weetst aules; dü weetst, daut etj die leef ha. Jesus sajcht too am: Weid miene Schop.

18Woahrhauft, woahrhauft, saj etj die: Aus dü jinja weascht, deedst dü die selfst dän Gort ommbinje en jintjst, woa dü han wullst, oba wann dü eascht oolt jeworde best, woascht dü diene Henj ütstratje, en een aundra woat die dän Gort aunhole en hanbrinje, wuahan dü nijch west.

19Oba dit säd hee, aundiedent, met wautver een Doot hee Gott veharlijche sull. En aus hee daut jesajcht haud, sajcht hee too am: Folj mie no!

20Peeta dreid sich omm en sitt dän Jinja nofolje, däm Jesus leef haud, dee sich uck biem Owentkost äte aun siene Brost jelänt en jefroagt haud: Harr, wäa esset, dee die verode woat?

21Aus Peeta däm sach, sajcht hee too Jesus: Harr, oba waut saul disa?

22Jesus sajcht too am: Wann etj well, daut hee blift, bett etj kohm, waut jeit die daut aun? Folj dü mie no.

23Dit Wuat jintj donn mank de Breeda: Daut jan Jinja stoawt nijch. En Jesus räd nijch too am Johaun, daut hee nijch stoawt, oba: Wann etj well, daut hee blift, bett etj kohm, waut jeit die daut aun?

24Dit es de Jinja, dee von dise Dinje zeijt en dee dit jeschräwe haft, en wie weete, daut sien Zeijniss woa es.

25Oba doa send uck väl aundre Dinje, de Jesus jedohne haft, en wann dise aula eensel oppjeschräwe weare, soo wudd, dentj etj, selfst de Welt, de jeschräwne Bäatja nijch foote.

← Chapter 20 Jump to: