bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Dutch
/
Dutch Frisian
/
Mark 4
Mark 4
Dutch Frisian
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 5 →
1
En hee funk wada aun, aum See too leahre. En väl Mensche vesaumlde sich bie omm am, soo daut hee enn een Schepp, em See steajch, en sad sich dohl; en aul dee Mensche stunde oppem Laund aum See.
2
En hee leahd ahn väl enn Jlitjnise; en hee säd too ahn enn siene Leah:
3
Horjcht! Tjitjt, de Seimaun jintj üt too seie.
4
En daut passead, aus hee seid, voll ateljet aum Wajch, en de Väajel tjeeme en fraute daut opp.
5
En aundret voll opp steenajet Laund, wua et nijch väl Ead haud; en tjeem boold opp, wielet nijch deepe Ead haud.
6
En aus de Sonn oppjintj, vebrennd daut, en wielet tjeine Wartle haud, vedräjchd et.
7
En aundret voll manke Stachle; en de Stachle tjeeme opp en stetjte daut, en daut jeef tjeene Frucht.
8
En aundret voll opp goode Ead, en jeef Frucht, jintj opp en woss; en eenjet brocht dartijch-, en eenjet zastijch-, en eenjet hundat mol soo väl.
9
En hee säd: Wäa Uhre haft tom heare, dee hea!
10
En aus hee auleen wea, fruage am, dee omm am weare met de Twalw omm de Jlitjnise.
11
En hee säd too ahn: Jünt esset jejäft, de Jeheemnese vom Himmelritj [too weete]; oba dee, dee bute send, woat aules enn Jlitjnise met jedeelt,
12
„omm daut see seenent senne en nijch woa nehme ertjane, en hearent heare en nijch vestohne, doamet see sich nijch meteemol betjeare, en ahn vezeit vejäwt woat“. {Jes.6.10}
13
En hee säd too ahn: Tje jie dit Jlitjniss nijch vestohne? En woo woa jie aule Jlitjnise vestohne?
14
De Seimaun seit daut Wuat.
15
Oba daut send dee aum Wajch: Wua daut Wuat jeseit woat, en wann see daut heare, sooboolt tjeemt de Soton en nehmt daut Wuat wajch, daut enn äare Hoate jeseit wea es.
16
En dise send dee, dee oppem Steenajen Laund jeseit woare, dee, wann see daut Wuat heare, daut fuats met Freid opp näme,
17
en see ha tjeene Wartel enn sich, oba send mo fe ne korte Tiet, dan, wann Bedrenjnis oda Vefoljung tjeemt wäajen daut Wuat, sooboolt steete see sich.
18
En aundre send dee, dee doa manke Stachle jeseit woare: Dee send et, dee daut Wuat jeheat ha,
19
en de Sorje emm Läwe enne Welt en daut veleide vom Ritjdom en daut Velange no aundre bätre Dinje kohme ennen en erstetje daut Wuat, en daut brinjt tjeene Frucht.
20
En diese send et, dee oppe goode Ead jeseit send, dee daut Wuat heare en aunnäme en Frucht brinje: Eena dartijch-, en eena zastijch-, en eena hundat mol soo väl.
21
En hee säd too ahn: Woat ne Laump, unjrem Jefäss oda unjadäm Bad jestalt? Woat de nijch opp een Laumpejestall jestalt?
22
Doa es nuscht jeheemet, daut nijch woat jeopenboat woare, en tjeen Jeheemniss, daut nijch verndach kohme woat.
23
Wann wäa Uhre haft tom heare, dee horjch.
24
En hee säd too ahn: Seeht too, waut jie heare; met dän Moht daut jie mäte, woat jünt jemäte woare, en daut woat jünt doatoo jelajcht woare.
25
Dan wäa doa haft, däm woat jejäft woare; en wäa nijch haft, von däm woat uck daut, waut hee haft, jenohme woare.
26
En hee säd: Aulsoo es daut Gottesritj, wann een Mensch daut Sot oppe Ead schmit,
27
en hee schlapt en steit opp, Nacht en Dach, en daut Sot tjeemt väa en wausst, hee weet selfst nijch woo.
28
De Ead brinjt üt sich selfst de Frucht väa, eascht daut Grauss, dan de Oa, dan de volle Weit enne Oa.
29
Oba wann de Frucht riep es, sooboolt schetjt hee de Sans Sijchel, dan de Arnte es jekohme.
30
En hee säd: Met waut sell wie daut Gottesritj vejlitje? Oda enn wautverm Jlitjniss sell wie daut väastale?
31
Soo aus een Sampkorn, daut, wann et oppe enne Ead jeseit woat, es tjlanda aus aule Sottjeana, oppe Ead;
32
en, wann et jeseit es, jeitet opp en woat jrata aus aulet Krüt en tjrijcht groote Asta, soo daut enn sienem Schaute de Väajel unjrem Himmel sich nastle.
33
En enn väl soone Jlitjnise räd hee too ahn daut Wuat, soo aus see daut heare vestohne kunne.
34
Oba ohne Jlitjnise räd hee nijch too ahn; oba siene Jinja ertjläad hee aules.
35
En aun janem Dach, ausset Owent wea, säd hee too ahn: Loht ons äwa foahre no daut aundre Eewa.
36
En aus hee daut Voltj gohne leet, nehme see am, emm Schepp met soo aus hee wea. Oba uck aundre Schäp weare met bie am.
37
En doa tjeem een groota Winttjriesel Wintstorm, en de Walle schluage emm Schepp, soo daut et aul meist voll wea.
38
En hee wea emm Hinjadeel vom Schepp en schleep opp eenem Kopptjesse; en see watjte am opp en säde too am: Leahra, jeffst dü nuscht doaraun, daut wie ommkohme?
39
En hee wuak opp, bedrood dän Wint en säd toom See: Sie stell, berüj die! En de Wint leed sich, en daut word sea stell.
40
En hee säd too ahn: Waut se jie soo änjstlijch? Wuaromm, ha jie tjeen Gloowe?
41
En see änjste sich sea groote Angst en säde toeenaunda: Wäa es dan disa, daut uck de Wint en de See am horjche?
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 5 →
All chapters:
1
2
3
4
5
6
7
8
9
10
11
12
13
14
15
16