Proverbs 1

nyankole

Jump to: Chapter 2 →

1Enfumu za Solomooni mutabani wa Daudi, omugabe wa Isiraeli,

2ezirikuhabura abantu obwengye n'emitwarize mirungi, n'amakuru g'ebigambo ebireeta okwetegyereza;

3kandi ezirikwegyesa obwengye bw'okukora eby'okuhikiirira, eby'oburyo, n'eby'obwinganisa;

4ngu omushema abone kwetegyereza, n'abarikunyeeta batungye obwengye n'okwekyengyera;

5n'omunyabwengye nawe ahurikize, kandi ayeyongyere kwega; haza orikwetegyereza agire engoga,

6abone kushoborokyerwa enfumu, eby'okurengyeza, ebigambo by'abanyabwengye, n'ebishaakuzo byabo.

7Okutiina Nyakubaho kuba ntandikiro y'obwengye; ebifamutima bigaya bwengye n'okwegyesibwa.

8Mwana wangye, hurira ebi sho arikukuhabura, kandi otanga ebi nyoko arikukwegyesa;

9ahabw'okuba ebyo n'eihunde aha mutwe gwawe, kandi n'orukwanzi omu maraka gaawe.

10Mwana wangye, abasiisi ku barikwosya, otariikiriza.

11Ku barigira bati: Ija tugyende, tugwere ab'okwita, ija tugwere abataine rubanja,

12tubamirire kimwe bahuriire, nk'oku owa Nyamuteza emira abashuuma okuzimu;

13turyagwa aha bintu by'obuguzi bwingi, twijuze amaka gaitu eminyago;

14ija okwatanise naitwe, twena tugire enshaho emwe.

15Mwana wangye, otarigyenda nabo; garura ekigyere enyima, orugye omu muhanda gwabo;

16ahabw'okuba bataragaza kukora ebibi, kandi beehuuta kusheesha eshagama.

17Ahabw'okuba okutega enyonyi ekigoye neekireeba n'okweruhiza busha.

18Nibagwera amagara gaabo, kugacwekyereza.

19Abatunga ebintu omu kwambura abandi nikwo baba. Ababitunga batyo bibaita.

20Bwengye naayamuriza omu nguuto z'orurembo, naateerera akaari omu butare.

21Naayeta ayemereire aha mutwe gw'ebisiika, naayetera aha nteeraniro z'emihanda, agambira aha marembo g'orurembo, ati:

22Imwe bashema 'mwe, muryaherera hi kukunda kuguma muri abashema? Abashungi baryahitsya hi kuguma nibashemerererwa okubashekyerera, kandi ebifamutima biryahitsya hi okwanga obwengye?

23Mute omutima aha bi ndikubahana, reeba, naaza kubashumururira ebi ndikuteekateeka, mbamanyise ebigambo byangye.

24Manya mbeetsire, mwayanga kumpurikiza; kandi ngoroire omukono, mwahugaho.

25Ebi mbahabwire byona mubigayire, ebi mbahanire byona timwabyetaho.

26Ku muriitwa enaku ndyabashekyeerera, obwoba ku buribacwa enkizi, ndyabashunga.

27Ku muriitwa obwoba nk'abaateerwa eihunga ry'empangukano, akagwe kakabagwera nk'abaizirwa akasooroora, naanye ndyabakuneetera.

28Haza baryantakira, mbeetsize; baryayehenenga nibansherura, kwonka tibarimbona.

29Ahabw'okuba bakanga obwengye, tibasiima kutiina Nyakubaho,

30n'ebi naabahabwire baabyanga; kandi byona ebi naabateisize baabigaya.

31N'ahabw'ekyo egabo yaabo eryaruga omu mitwarize yaabo, kandi banihe emize yaabo mibi.

32Manya ekiita abashema n'okwehabya; kandi ekiita ebikaaka n'omurondogoro.

33Kwonka omuntu orimpurikiza, aryabukaara, agogyeera, ataine kabi ku arikutiina.

Jump to: Chapter 2 →