Proverbs 3

nyankole

← Chapter 2 Jump to: Chapter 4 →

1Mwana wangye, oteebwa ebi ndikukwegyesa, kureka omutima gwawe gugume gukwate ebiragiro byangye:

2ahabw'okuba biryakureetera okuramaara n'obugwagye.

3Otariteishuka amazima n'obwesigwa; obijware omu maraka;

4obihandiikye omu mutima. Nibwo orikundwa, okasiimwa Ruhanga n'abantu.

5Yesigye Nyakubaho n'omutima gwawe gwona, otakaayesiga obwengye bwawe.

6Omu bi orikukora byona omwijukye; nawe naija kuboneza emihanda yaawe.

7Orekye kwegira omunyabwengye; otiine Nyakubaho, oyeshumbe ekibi.

8Ekyo kiryatambira omubiri gwawe; kiruhuure amagufa gaawe.

9Yejunise ebi oine n'emiganuro yaawe kuha Nyakubaho ekitiinwa.

10Obwo, ebitara byawe biryaijurira kimwe, n'enteerero zaawe ziijure viino.

11Mwana wangye, otarigaya ebi Nyakubaho arikukuhana, nari okatamwa ebi arikukuteisa.

12Ahabw'okuba Nyakubaho ahana ou akunda, nk'oku ishe mwana ahana omutabani omunanura.

13Ozoora obwengye n'omuhiirwa, kandi otunga okwetegyereza nawe ahiiriirwe;

14ahabw'okuba omugasho ogurimu nigukira ogwa feeza, kandi amagoba agarimu nigakira aga zaabu.

15Obwengye n'obw'obuguzi bwingi kukira eruuru, kandi tihariho eki oyetenga ekirikubwerenga.

16Okumereera kuri omu mukono gwabwo gwa buryo, kandi obutungi n'ekitiinwa biburi omu gwa bumosho.

17Emihanda yaabwo n'emihanda y'obugwagye, n'ebibari byabwo byona n'eby'obusingye.

18Ababumbatiza obwengye bubabeera enyomyo y'amagara, ababuramataho beetwa abahiirwa.

19Nyakubaho akahangisa ensi obwengye, n'eiguru yaarihamisa okwetegyereza.

20Okumanya kwe kukareetera enyanja kutuuhuuka okuzimu, n'ebicu kutoonyerera.

21Mwana wangye, guma n'obwengye buhikire, n'okwekyengyera; otaribireka bikakurugaho,

22kandi biryakubeera amagara n'eihunde ry'amaraka gaawe.

23Reero oryagyenda buhooro omuhanda gwawe, otateire ntsibo;

24ku orishutama, toritiina; ku oribyama, oryagwejegyera oturo tunuzire.

25Otatiina okukangwa nari okucwekyerezibwa kw'abasiisi kwabaho;

26ahabw'okuba Nyakubaho aryakugumya akurinde, ngu otakaagwa omu mutego.

27Otariima omuntu ekimushemereire waaba n'okibaasa.

28Otarigira mutaahi waawe oti: Irooko ogarukye nyencakare, nkikuhe, kunu okiine.

29Otaricumira enaama mbi mugyenzi waawe okutwire haihi nimwesigana.

30Otaritonganisiza busha omuntu ataine ki akushobeize.

31Otarigirira eihari ekihaze, kandi otaritooreza emitwarize yaakyo;

32ahabw'okuba okora ebibi nkana, aba ekihagaro ahari Nyakubaho; kwonka abahikiriire, Nyakubaho abashuuruurira enaama ze.

33Omukyeeno gwa Nyakubaho gugwera enju y'omubi; kwonka eka y'abahikiriire agiha omugisha.

34Ashunga abashungi, kwonka abeecureeza abagirira embabazi;

35abanyabwengye baryahungura ekitiinwa, haza ebifamutima bihemukye.

← Chapter 2 Jump to: Chapter 4 →