Proverbs 5

nyankole

← Chapter 4 Jump to: Chapter 6 →

1Mwana wangye, ta omutima aha bwengye bwangye, otegye okutu eby'okwetegyereza byangye.

2Obone kuguma nooyekyengyera, n'ebi orikugamba byorekye obwengye,

3ahabw'okuba eminwa y'omukazi omushambani etoonya obwoki, n'ebigambo bye nibiterera okukira amajuta,

4kwonka aha muheru ashaarira nk'omuravunga, atyarize nka rurara y'amoogi abiri.

5Ebigyere bye bishuuma owa Rufu; entambwe ze zitoora akahanda k'owa Nyamuteza.

6Tayeta ha kahanda k'amagara; ekye kiba okuzengyerera, kwonka tarikukimanya.

7Mbwenu mwana wangye, mpuririza, haza otatsigisibwa ebi ndikugamba.

8Omukazi nk'ogwo omwetantare kandi otarihika haihi n'omurayango gw'enju ye,

9ekitiinwa kyawe okakiheereza abandi kandi emyaka yaawe okagiha abataine mbabazi;

10abatarikumanywa batakaakumara amaani, n'ebi waahendekyeire bikatungwa abanyamahari;

11kandi aha muheru gw'amagara gaawe, okagaaya waahwaire aha magufa,

12okeefuuza oti: Ekyanzibiire kuhanwa, nkanga kuteisibwa!

13Nkanga kuhurira abeegyesa bangye n'okutega okutu abarikumpabuura.

14Nkaba ndi haihi kuhwerekyererera ahu abantu bateeraniire.

15Nywa amaizi g'eiziba ryawe, amaizi agarikusheneneka nigaruga omu iziba eryawe ahabwawe eri oyefukuriire.

16Mbwenu shi, enshuro zaawe zishemereire kutaataanira oku n'oku, zikaba emigyera y'amaizi omu nguuto?

17Ka gabe agaawe wenka, abanyamahanga batagabaganaho.

18Enshuro yaawe k'eheebwe omugisha, kandi oshemerererwe omukazi w'omunyeeto gwawe,

19ebuguma y'empara erikurigirwa, ey'esirabo erikukugwisa gye. Buri kaanya oburungi bwe ka bugume bukwijwize okushemererwa, rukundo ye egume ekufumbatiire.

20Mwana wangye, ahanki n'ofumbatirwa omukazi enshambani kandi okafumbata rwariire enshoni?

21Ahabw'okuba Nyakubaho amanya emihanda y'omuntu kandi ayetegyereza n'otuhanda twe twona.

22Ebicumuro by'enkozi y'ebibi bimutega, kandi akwatirwa omu kigoye ky'ebibi bye.

23Ekimwita n'okuteezibira; kandi ahabw'obufamutima bwe ahwerekyerera.

← Chapter 4 Jump to: Chapter 6 →