Proverbs 2

nyankole

← Chapter 1 Jump to: Chapter 3 →

1Mwana wangye, ku oriikiriza ebigambo byangye, okata omutima aha biragiro byangye,

2okahurikiza eby'obwengye, kandi okata omutima gwawe aha kwetegyereza;

3eego, ku orihoogyera okumanya, okateera akaari nooshaba ngu oyetegyereze;

4okakusherura nk'efeeza, okakuronda nk'eitungo ryesherekire;

5obwo oryayetegyereza okutiina Nyakubaho, kandi omanye Ruhanga.

6Ahakuba Nyakubaho niwe aheereza obwengye; okumanya n'okwetegyereza biruga omu kanwa ke.

7Abahikiriire ababiikira obwengye buhikire, abatwaza gye, ababeera engabo;

8areeberera emihanda y'obwinganisa, hamwe n'omuhanda gw'abahikiriire be.

9Reero oryayetegyereza okuhikiirira, obwinganisa, n'oburingaaniza na buri kahanda karungi;

10ahabw'okuba obwengye buryaija omu mutima gwawe, kandi bukugwise gye n'amagara gaawe gashemerererwe okumanya;

11okwekyengyera kukureeberere, n'okwetegyereza kukurinde;

12bikwihe omu muhanda gw'obubi n'omu bantu abarikugamba ebirikuhabisa,

13abatsigaho emihanda y'okuhikiirira, bakatoora ey'omwirima,

14abeesiimirana okukora kubi, bakashemerererwa okugomera omu bibi;

15abatoora emihanda ekiikami, kandi ababa engobya omu migirire yaabo.

16Oryakira omukazi enshambani, rwariire-enshoni, oyegambisa karimi karungi,

17otsigaho iba ow'omunyeeto gwe, akeebwa endagaano ya Ruhanga we.

18Ahakuba ow'ogwo mukazi hanaga okuzimu owa rufu, n'emihanda y'owe eza omu bafu;

19abaza owe tihariho n'omwe ogaruka, kandi tibagaruka kubona muhanda gw'amagara.

20N'ahabw'ekyo ogume otoore omuhanda gw'abarungi, kandi ohamire omu mihanda y'abahikiriire.

21Ahabw'okuba abahikiriire baryatuura omu nsi, n'abataine kamogo bagigumemu;

22kwonka ababi baryagicuubwamu, n'endeebya zimarwemu.

← Chapter 1 Jump to: Chapter 3 →