Proverbs 30

nyankole

← Chapter 29 Jump to: Chapter 31 →

1Ebi n'ebigambo bya Aguri mwene Yaake, owa Masa ebi yaagambiire Itiyeli na Ukali, ati: Ruhanga tari hamwe naanye; Ruhanga tari hamwe naanye; nyeshobeire.

2Buzimazima ndi ekituuriizi, timpikire kuba omuntu. Tindikwetegyereza nk'omuntu.

3Tindeegire bwengye, kandi tindikumanya Orikwera.

4N'oha oratembire omu iguru kandi akashuuma? N'oha orabumbatiize omuyaga omu ntomi ze? N'oha orakomeire amaizi omu kijwaro? Eiziina rye n'oha, n'ery'omutabani ni riiha? Mbwenu noorimanya?

5Buri kigambo kya Ruhanga kihamibwa ku kiri eky'amazima. Niwe ngabo y'abamuhungiraho.

6Otarigira eki waayongyera aha bigambo bye atakaakujuukirira okahinduka omunyabishuba.

7Ninkushaba ebintu bibiri; otabiinyima ntakafiire:

8Onyihireho kimwe ebitari by'amazima n'ebishuba; otampindura omworo nari omutungi; kureka ompe ebyokurya bi nkyenire byonka,

9ntakaiguta nkarengyesereza, nkakwehakana, nkagira nti: Nyakubaho n'oha? Nainga shi ntakaaba omworo nkaiba, nkahemura eiziina rya Ruhanga wangye.

10Otariregyesereza omuhuuku ahari mukama we, atakaakukyeena okakwatwa orubanja.

11Hariho abakyeena baishebo, kandi bakanga kushabira baanyinabo emigisha.

12Hariho abeeyeta abashemeire, haza kunu batakoogiibweho bihagaro byabo.

13Reero hariho n'abandi, ebishi bagira amaisho g'amaryo! Ebishi bareebesa omugayano!

14Kandi hariho abu amaino gaabo gari nka zaarura, abu amaino gaabo gari nk'emisyo y'okucwekyereza abanaku kubaheza omu nsi, n'abakyene kubamara omu bantu.

15Omushundo gwine bahara baagwo babiri, kandi bombi bahooga bati: Mpa! Mpa! Hariho ebintu bishatu ebitaiguta, kandi hariho n'ekya kana ekitabaasa kugira kiti: Naahaaga! Nibyo ebi:

16Okuzimu, enda y'engumba, ensi etahaaga maizi, kandi n'omuriro ogutagira guti: Naamarwa!

17Eriisho ry'ogwo oteerera ishe enaku, akeekunika akanga kuhurira nyina, riryanonkorwa ebikoona by'omu mpanga, ririibwe amahungu.

18Hariho ebintu bishatu ebintangaaza munonga; nangwa ni bina ebi ntarikwetegyereza n'akakye; nibyo ebi:

19emizeereerere y'empungu omu mwanya, emigyendere y'enjoka aha rukiri, emigyendere y'emeeri omu nyanja; kandi nk'oku omushaija atwazana n'empangare.

20Egi niyo mitwarize y'omukazi enshambani: arya, ayeragaza eminwa, haza agira ati: Tiinyine ki naashobya.

21Hariho ebintu bishatu ebitengyeetsa ensi, nangwa ni bina ebi etabaasa kugumisiririza; nibyo ebi:

22omuhuuku kurya obugabe, ekifamutima kwiguta ebyokurya,

23omwishiki obengirwe kushwerwa, kandi n'omuzaana kucwa mugore we ahari iba.

24Omu nsi harimu ebintu bina bikye munonga, kwonka bigira obwengye bwingi buzima; nibyo ebi:

25Obusiisibirizi n'oruganda rutaine maani, kwonka bwehunikira ebyokurya omu kyanda;

26endirira n'oruganda rutari rw'ebikaaka, kwonka zeeyombekyera amaju omu nkiri;

27enzigye tizigira mukama, kwonka zigyendera hamwe omu bimbuuro byazo;

28n'ekinya noobaasa kukitwara omu ngaro, kwonka shi kituura omu bikaari by'abagabe.

29Hariho ebintu bishatu ebigyenda nibinyigimba; nangwa ni bina ebigyendesa eigundu; nibyo ebi:

30Entare ekiza enyamaishwa ezindi zoona amaani, kandi tegira ki ehunga;

31enshaaki erikugyendesa eigundu, empaya y'embuzi, kandi omugabe orikunyimbanyimba omumaisho g'abantu be.

32Ku oraabe obaire ori ekifamutima nooyehaisiriza, nari ku oraabe obaire nooconya enaama y'okukora ebibi, ote engaro aha munwa.

33Okucunda amate kujwisa amajuta, okumiga enyindo kujwisa eshagama, kandi ekishinjo kiimukiriza entongane.

← Chapter 29 Jump to: Chapter 31 →