Proverbs 8

nyankole

← Chapter 7 Jump to: Chapter 9 →

1Mbwenu shi Bwengye tayeta, na Kwetegyereza akaamuza?

2Bwengye ayemereire aha mitwe y'ebibungo, aha rubaju rw'omuhanda, n'omu nteeraniro y'emihanda;

3niho ayemereire, aheeru y'orurembo, n'ahu emihanda etaahira omu rubuga, niho ayema kuteerera orwari ati:

4Bantu 'mwe, nimbeeta, okuranguuza kwangye kuhikye ibara muntu.

5Imwe bantu 'mwe, abatakeetegyereize, mwegye okwekyengyera. Imwe bifamutima 'mwe, muteho omutima.

6Muhurire, ahabw'okuba ninza kugamba ebintu by'ekitiinwa, n'eminwa yangye egambe ebihikire;

7ahabw'okuba akanwa kangye nikaza kugamba amazima; ekibi n'omuziro aha minwa yangye.

8Byona ebi ngamba bihikire; tibibamu kuryangatanisa, tibibamu kihugami.

9Nibishoboorekyera weena orikwetegyereza, kandi, aha barikubimanya, bihikire.

10Mwikirize ebi ndikubahabura okukira efeeza, n'obwengye bwangye okukira zaabu empuuhe;

11ahabw'okuba obwengye nibuhita amabaare g'eruuru; tihariho kyona eki oyetenga, ekirikubwerenga.

12Nyowe Bwengye ntuura omu kwetegyereza, kandi nyine okumanya n'okwerinda.

13Okutiina Nyakubaho kuba okwanga ekibi. Nyanga okwetunguura, n'amaryo, n'emitwarize mibi, kandi n'okugamba ebirikuhabisa.

14Enaama z'oburyo n'okuhabura okuhikire n'ebyangye; niinyetegyereza kandi nyine amaani.

15Ahabwangye, abagabe bategyeka, n'abategyeki baragiira eby'obwinganisa;

16ahabwangye, abanyiginya bategyeka, n'ab'ebitiinwa bategyeka ensi.

17Abankunda naanye mbakunda; kandi abansherura n'omuhimbo, bambona.

18Nyine obutungi n'ekitiinwa, n'okuganagana okutarihwaho, kandi n'obwinganisa.

19Ebizaaruka omuriinye bihita zaabu, nangwa n'ezaabu empuuhe, n'ebi nshaaruura nibihita efeeza etoorainwe.

20Ntoora omuhanda gw'okuhikiirira, n'omu burari bw'oburingaaniza,

21ndikugaigahaza abankunda, kandi ndikwijuza amabiikiro gaabo.

22Nyakubaho akampanga aha kutandika emirimo ye; naabandiza ebi yaakozire ira;

23nyowe nkateebwaho ira na ira, omu kubanza ensi etakabaireho.

24Nyowe nkazaarwa amayanja g'okuzimu gatakabaireho, n'enshuro zitakahimintikire maizi.

25Nkazaarwa enshozi n'emigongo bitakahangirwe;

26Nyakubaho atakahangire nsi n'emisiri yaamwo, nobu gwakuba omucuucu gw'ensi ogw'okubanza.

27Obu yaakora orukanga rw'eiguru, nkaba ndiho; nobu yaataho emyegyeego y'amayanja.

28Obu yaahamya eiguru omu kaabunga, nobu yaataho enshuro okuzimu,

29nobu yaataho omwatano gw'enyanja, ngu amaizi gatarirenga ahi yaagaragiire, n'obu yaataho emisingi y'ensi,

30obwo nkaba muri aha rubaju, nk'omufundi nyakabara; kandi buri izooba nkaba mugwisa gye, niinyesiimira omu maisho ge obutoosha,

31niinyesiimira omu nsi ye etuurwamu, kandi ninshemerererwa ibara muntu.

32Mbwenu nu, baana bangye, nimumpurire. Baine omugisha abaguma omu mihanda yangye.

33Muhurire ebihaburo byangye, mube abanyabwengye, kandi mutaribyehuzya.

34Omuntu ompurikiza, akaguma aha marembo gangye buri izooba naareeba, ategyerereize aha biti by'emiryango yangye, aine omugisha.

35Ahakuba weena ombona biri aboine amagara, kandi atunga obushongore ahari Nyakubaho;

36kwonka ompemukaho, aita amagara ge; weena onyanga ayetooranira rufu.

← Chapter 7 Jump to: Chapter 9 →