1 Corinthians 13

Quechuan QXO (Biblia en Quechua del sur de Conchucos)

← Chapter 12 Jump to: Chapter 14 →

1Kay patsachö llapan idiömakunata parlarpis y angelkunapa idiömanta parlarpis kuyakuynï mana kaptinqa platïlluta llutalla tukanqan chinllillinqannöllam parlanqäkuna kaykan.

2Profëta karpis, Tayta Dios yarpanqanta musyarpis y pïmay runapita mas yacharpis kuyakuynï mana kaptinqa manam imapäpis välïtsu. Tayta Diosman criyir jirka witikunanpä niptï witikuptinpis kuyakuynï mana kaptinqa manam imapäpis välïtsu.

3Pobrikunata llapan imaykäkunata aypurpis y Diosman criyikunqäpita rupatsiyämaptinpis kuyakuynï mana kaptinqa manam imapäpis välïtsu.

4Kuyakuq karqa ima kaptinpis pacienciakuntsikmi y pïmaytapis allim rikantsik. Tsaynöllam runa mayintsikta chikintsiktsu, alabakuntsiktsu, pitapis manakaqman churantsiktsu,

5manakaqkunata parlantsiktsu, munanqantsikta rurayänanpä obligantsiktsu, rabyanantsiktsu y pitapis nanaparantsiktsu.

6Mana allikunata ruraptin kushikunantsikpa rantinmi allikunata ruraptin kushikuntsik.

7Kuyakuq karqa ima kaptinpis perdonantsikmi. Imaypis criyintsikmi, imaypis shuyarantsikmi y llapantapis awantakuntsikmi.

8Profëtakuna willakuyanqanpis ushakanqam. Mana yachanqan idiömachö parlayanqankunapis ushakanqam. Yachaq kaypis ushakanqam. Peru kuyanakuymi sïqa imaypis ushakanqatsu.

9Manam llapantatsu musyantsik. Manam llapantatsu willakuntsik.

10Peru tsaynö karpis Jesucristo kutimuptinqa kanan musyanqantsikkunata ni willakunqantsikkunatapis mananam nisitashunnatsu.

11Noqapis wamra karqa wamranöllam parlarqä, wamranöllam yarpachakurqä y wamranöllam tantiyarqä. Peru rukuyarmi sïqa wamranönatsu parlä ni yarpä.

12Tsaynöllam kananqa makwa espëjuwan rikakuqnöpis shumaqqa tantiyantsikrätsu. Peru kaypita aywakurmi sïqa kikin Tayta Dioswanna tinkushun. Tsaymi kanan ichikllata musyarpis tsay junaqqa pay reqimanqantsiknö noqantsikpis payta reqishun.

13Kananqa yärakur, shuyäkur y kuyanakurmi kawaykantsik. Llapanpitapis mas alliqa kuyanakunqantsikmi kaykan.

← Chapter 12 Jump to: Chapter 14 →