1 Corinthians 9

Quechuan QXO (Biblia en Quechua del sur de Conchucos)

← Chapter 8 Jump to: Chapter 10 →

1¿Manaku libri kä? ¿Manaku apostolpis kä? ¿Manaku Señor Jesucristutapis rikarqü? ¿Manaku qamkunapis willaptïrä Jesucristuman criyikuyarquyki?

2Wakinkuna apóstol kanqäta mana tantiyayaptinpis qamkunam sïqa musyayanki. Tsaymi willakunqäta criyir Jesucristuman criyikuykäyanki.

3Apóstol kanqäta manakaqman churamaqkuna musyayänanpämi tsaynö nï.

4Apóstol karmi noqakunapis willakuyanqäpita mikuyänäpä y upuyänäpä derëchükuna kan.

5Noqakunapis wakin apostolkunanö, Señor Jesucristupa wawqinkunanö y Cefasnö cada ünum warmïkunawan puriyänäpä derëchükuna kan.

6¿Imanirtä yarpäyanki Bernabéta y noqallata mana yanapayämänaykipä kanqanta?

7¿Mayqan soldädutä kikinpa gastunwan soldädu kayman yaykun? ¿Pï runatä plantanqan üvapa wayuyninta mikuntsu? Tsaynölla ¿pï runatä mitsinqan cabranpa o wäkanpa lichinta upuntsu?

8Tsaytaqa manam kikïpa yarpaylläpitatsu nï. Moisés qellqanqan leykunachöpis tsaypäqa qellqashqam kaykan.

9Tsaychömi nin: «Ërachö trïguta trillar töruta ama shenqawayankitsu». Tayta Dios tsaynö nirqan ¿törukunapäku

10o noqantsikpäku? Tsaynö qellqashqa kaykan noqantsikpämi. Töruwan arupakuqpis trïguta trillapakuqpis qarayta chaskinan raykurmi arupakuyan.

11Noqakunapis Jesucristupa willakuyninta qamkunata willar muruta imayka muruqnömi kayarqü. Tsaymi cosëchachö qarayta chaskiqnö qamkunapita imallatapis chaskiyäman.

12Wakintapis yanapaykarqa noqakunata masrämi yanapayämankiman. Yanapayämänayki kaykaptinpis manam qamkunata mañakuyarqütsu. Tsaypa rantinqa Jesucristupa willakuyninta chaskiyänaykipä ima tsapapis kananta mana munarmi ñakarpis upällakuyarqü.

13¿Manaku musyayanki templuchö y altarchö aruqkunaqa templuman apayanqan mikuypita mikuyanqanta?

14Tsaynöllam Jesucristupa willakuyninta willakuqkunapis willakuyanqanpita chaskiyanman. Tsaynö kananpämi Señor Jesucristupis nirqan.

15Tsaynö chaskinäpä derëchü kaptinpis manam imaypis mañakurqütsu ni kananpis manam mañakuykätsu. Noqapa tantiyaynïpitaqa mañakunäpa rantin jina wanukümanpis. Mana mañakunqäpita manam llakikütsu, sinöqa kushikümi.

16Jesucristupa alli willakuyninta imaykanöpapis willakunä kaptinmi willakunqäpita alabakütsu. Mana willakuptïqa ¡Tayta Dios castigamätsun!

17Kikïpa yarpaylläpita willakurqa yanapayämänaykipä mañakümanmi. Tayta Dios willakunäpä churamashqa kaptinmi mana mañakuyllapa willakuykä.

18[Jesucristupa] alli willakuyninta willakunqäpita qellayta mana chaskiptïpis jukmi pägü kaykan. Tsay pägüqa kaykan willakunqäpita mañakunäpä derëchü kaykaptinpis mana mañakuyllapa willakunqämi.

19Noqaqa libri karpis runakuna tantiyakur salvakuyänanpämi llapan runakunapa esclävunnö kaykä.

20Tsaymi Israel runakunawan qorikarqa paykuna kawayanqannö noqapis kawä. Moisés qellqanqan leykunata paykuna cumpliyanqannömi noqapis cumplï. Tsay leykunapa poderninchö mana karpis tsaynö kawä Israel runakuna tantiyakur Jesucristuman criyikuyänan raykurmi.

21Tsaynöllam Moisés qellqanqan leykunata mana cäsuq runakunawan qorikarpis paykuna kawayanqannö kawä. Tsaynö kawä paykunapis Jesucristuman criyikuyänan raykurmi. Paykunawan qorikar Moisés qellqanqan leykunata mana cumplirpis jutsata mana ruraypam Jesucristo munanqannölla kawä.

22Tsaynöllam mana tantiyaqkunawan qorikarpis paykuna kawayanqannö noqapis kawä. Tsaynö kawä Jesucristuman criyiyänan raykurmi. Tsaynöpam runa imanö kaptinpis tsay runanö kawä. Tsaynö kawä wakillanpis salvakuyänanpämi.

23Llapantapis rurä Jesucristupa alli willakuyninta runakuna chaskiyänan raykurmi. Tsaynöpam Jesucristuman criyikur kushikuyanqannö noqapis kushikushä.

24Qamkuna musyayankim atskaq cörrirpis alli cörriq kaqlla premiuta chaskinqanta. Qamkunapis Tayta Diospita premiuta chaskiyänaykipä shumaq kawayay.

25Cörriqkuna shumaq alistakuyanqanta tantiyakuyay. Paykuna tsaynö alistakuyan gänar ushakaq corönata chaskiyänallanpämi. Peru noqantsikmi sïqa alistakuntsik mana ushakaq corönata chaskinantsikpä.

26Tsaymi llallinakuychö pantar jukläpa cörriq runanötsu ni pelyachö vientullata kutaq runanötsu kawä.

27Tsaypa rantinqa cörrinanpä alistakuq runa imanö ñakarpis alistakuyanqannömi noqapis Tayta Dios munanqannö imanö ñakarpis kawaykä. Mana tsaynö karqa wakinta shumaq yachatsirpis Diospa ñöpanman manachi kikïpis chämantsu.

← Chapter 8 Jump to: Chapter 10 →