1 Corinthians 6

Quechuan QXO (Biblia en Quechua del sur de Conchucos)

← Chapter 5 Jump to: Chapter 7 →

1Qamkuna imallapitapis rimanakur ¿imanirtä Tayta Diospita mana mantsapakuq autoridäkunaman demandanakuyanki? ¿Imanirtä kikikikunapura arreglayankitsu?

2¿Manaku musyayanki Jesucristuman mana yärakuq runakunata juzganantsikpä Tayta Dios churamänantsikpä kanqanta? Tsaynö kaykaptinqa imapis kaptin ¿imanirtä kikikikunapura arreglayankitsu?

3¿Manaku musyayanki angelkunatapis juzganantsikpä kanqanta? Tsaynö kanantsikpä kaykaptinqa ¿imanirtä wawqikuna y panikuna rimanakuyaptin arreglashwantsu?

4Mayqan wawqiwan o paniwanpis rimanakur ¿imanirtä Jesucristuman mana yärakuq autoridäkunamanrä aywayanki?

5¿Manaku penqakuyanki? ¿Manaku qamkunachö pillapis kan Jesúsman criyikuqpura rimanakuyaptiki arreglayäshunaykipä?

6Kikikikunapura arreglayänaykipa rantin Jesucristuman mana criyikuq autoridäkunamanrä demandakuq aywayanqayki manam allitsu.

7Criyikuqpura demandanakurqa mana allitam ruraykäyanki. Demandanakuyanqaykipa rantinqa rabyanätsiyäshuptikipis ¿imanirtä upällakuyankitsu? Suwapäyäshuptikipis ¿imanirtä «jina apakutsunpis» niyankitsu?

8Peru qamkunaqa kikikikunapura mana allita rurarmi suwapänakuykäyanki.

9¿Manaku musyayanki jutsa ruraq runakunaqa Tayta Diospa mandakuyninman mana yaykuyänanpä kayanqanta? Shumaq tantiyakuyay: fornicación jutsata ruraqkuna, ïdulukunaman yärakuqkuna, adulteriu jutsa ruraqkuna, prostitütanö puriq jövinkuna, ollqupura kakuqkuna,

10suwakuqkuna, imaykapäpis mallaqashqakuna, borrächukuna, wasarimakuna y sakyapakuqkunapis Tayta Diospa mandakuyninman manam yaykuyanqatsu.

11Qamkunapis wakikiqa tsaynömi jutsata rurar kawayarqayki. Peru kananmi sïqa Señor Jesucristupa jutinchö Diosnintsikpa Espïritunwan jutsaykikunapita mayllashqana kaykäyanki, santuna kaykäyanki y jutsaynaqna kaykäyanki.

12Qamkunam niyanki munayanqaykita rurayänaykipä librina kayanqaykita. Peru libri karpis manam llapantatsu rurayankiman. Manam jutsata rurar kawanantsikpätsu libri kaykantsik, sinöqa Tayta Dios munanqannö kawanantsikpämi.

13Wakikim niyanki: «Mikuyqa pachantsikpämi y pachantsikpis mikuypämi». Peru Tayta Diosmi pachantsiktapis mikuytapis ushakätsinqa. Tsaynöllam cuerpuntsikqa fornicación jutsata ruranantsikpätsu, sinöqa Señor Jesucristo munanqannö kawanantsikpämi.

14Tayta Dios payta kawatsimunqannömi noqantsiktapis poderninwan kawatsimäshun.

15¿Manaku musyayanki Jesucristuwan jukllayllanö kayanqaykita? ¿Paywan jukllayllanö kaykartsurä prostitütawan kakuyankiman? Tsaynöqa ama kayaytsu.

16¿Manaku musyayanki juk runa prostitüta warmiwan kakurqa paywan juk cuerpunöllana kanqanta? Tayta Diospa palabranmi nin: «Tsaynö täkurnam ishkanpis jukllayllanö kayanqa».

17Tsay ninqannöllam Jesucristuman criyikurqa Jesucristuwan jukllayllanöna kaykantsik.

18¡Fornicación jutsapita witikuyay! Wakin jutsakunata rurarqa manam cuerpuykitatsu qanrataykäyanki. Peru fornicación jutsata rurarmi sïqa cuerpuykita qanrataykäyanki.

19¿Manaku musyayanki Tayta Dios qarayäshunqayki Espíritu Santu täranqan templu kayanqaykita? Tsaynö kaykaptinqa cuerpuykikuna manam qamkunapatsu, sinöqa Tayta Diospam.

20Qamkunataqa Tayta Diosmi rantiyäshurquyki. Tsaymi jutsata mana rurar pay munanqannö kawayänayki.

← Chapter 5 Jump to: Chapter 7 →