1 Corinthians 4

Quechuan QXO (Biblia en Quechua del sur de Conchucos)

← Chapter 3 Jump to: Chapter 5 →

1Wawqikuna y panikuna, Tayta Diospa willakuyninta willakur Jesucristupa sirviqnillan kayanqäta tantiyakuyay.

2Alli sirviqqa yärakuypämi kanman.

3Tsaymi Jesucristuta mana sirvinqäta yarpäyaptikipis o wakin runakuna tsaynö yarpäyaptinpis llakikütsu.

4Noqapa tantiyaynïpitaqa Jesucristuta allim sirviykä. Tsaynö kaptinpis manam alli sirvinqäta yarpanqäpitatsu Tayta Dios «allim sirvimarquyki» nimanqa, sinöqa alli sirvinqäta kikin tantiyarmi.

5Tsaynö kaykaptinqa manaräpis höranchö pitapis ama juzgayaytsu. Señor Jesucristo kutimurnam pakayllapa ruranqantsikkunata y shonquntsikchö yarpanqantsikkunatapis juzgamäshun. Tsay höram alli o mana alli sirviqnin kanqantsiktapis nimäshun.

6Wawqikuna y panikuna, Tayta Diospa palabranta cäsukuyänaykipämi Apoluspä y kikïpä kay cartachö qellqamü. Cäsukurqa manam jukaq yachatsishuqnikipa favornin shärir jukaqpa contran shäriyankimantsu. Tsaynö rurarqa yachaq tukuykäyankim.

7Yachatsiyäshuqnikikunata tsaynö juzgayänaykipäqa ¿pitä kayanki? Tantiyaq kayanqaykipis ¿manaku Tayta Diospita kaykan? Tayta Diospitarämi llapantapis chaskiyarquyki. Tsaynö kaykaptinqa ¿imanirtä kikillaykikunapita tantiyaq kayanqaykita yarpar alabakuykäyanki?

8Qamkunaqa llapan munayanqaykitam chaskiyarquykina ¿aw? Rïcunam kaykäyanki ¿aw? Noqakuna manarä chäyämuptïpis Jesucristuwan mandaykäyanqaykitam yarpäyanki ¿aw? Mandar yanapayänäpä ¡allim kanman rasunpa mandayaptikiqa!

9Yarpaynïpitaqa llapanpitapis mas ñakayänäpämi apóstol kayman Tayta Dios churayämashqa. Noqakunataqa llutan ruraq runatanömi wanutsiyämayta munayan. Tsaynö ñakayanqätaqa llapan runakunapis angelkunapis rikaykäyämanmi.

10Qamkunaqa Jesucristuta sirvir alläpa yachaq y tantiyaq kayanqaykitam nikäyanki. Peru noqakunatam sïqa Jesucristuta sirviyaptï mana yachaqtanö rikayäman. Qamkunaqa puëdiq kayanqaykitam nikäyanki. Peru noqakunatam sïqa imatapis rurayta mana puëdiqtanö rikayäman. Qamkunataqa allim rikayäshunki. Peru noqakunatam sïqa mana väliq runakunatanö rikayäman.

11Kananyaqpis noqakunaqa mallaqar, yakunar, röpäkuna mana kaptin alatsikurmi ñakaykäyä. Tsaynöllam maqar ushashqa puriyä. Wayilläkunapis kikïkunapaqa manam kantsu.

12Nisitayanqäkunapä pishipäyanqäyaqmi aruyä. Runakuna ashlliyämaptinpis Tayta Dios bendisananpämi mañakuyä. Chikiyämaptinpis mana resentikuypam puriyä.

13Wasäkunata rimayaptinpis alli shimïkunallapam parlapäyä. Kananyaqpis pasaypa mana väliqtanö y manakaqtanömi rikayäman.

14Manam qamkunata penqakuyman churanäpätsu tsaynö qellqaykämü, sinöqa kuyay tsurïtanö yätsirmi.

15Chunka waranqa (10,000) yachatsishuqnikikuna kayaptinpis Jesucristuman criyikuyänaykipä jukllayllam puntata willayäshurquyki. Tsay willashuqnikiqa noqam kä. Tsaynöpam qamkunapa papänikinö kä.

16Tsaymi qamkunata yätsï noqa kawanqänö qamkunapis kawayänaykipä.

17Qamkuna kaqchö imanö kawanqätapis yarpätsiyäshunaykipämi Timoteuta mandamurqü. Payqa imayka kuyay tsurïnömi. Tsaynöllam payqa Tayta Dios munanqannö kawan. Llapan iglesiakunachöpis yachatsinqänömi shumaq yachatsiyäshunki.

18Wakikikunaqa mana kutimunäpä kaqta yarparshi pasaypa yachaq tukur kaykäyanki.

19Peru tsaynö yarpäyaptikipis Tayta Dios munaptinqa watukakuq shamushämi. Tsaychönam tsay yachaq tukuqkuna musyayämanqa. Paykunaqa mä rasunpakush Tayta Diospa poderninwan ruraykäyan o kikinpa yarpayllanpitakush parlaykäyan.

20Tayta Diospa mandakuyninchö kawayqa manam yachaq tukur parlanqantsiktsu, sinöqa pay munanqanta rurar kawanqantsikmi.

21Qamkunaqa ¿imatatä munayanki? ¿Rabyashqa chämunätaku o kushishqa chämunätaku?

← Chapter 3 Jump to: Chapter 5 →