Hebrews 12

Quechuan QXO (Biblia en Quechua del sur de Conchucos)

← Chapter 11 Jump to: Chapter 13 →

1Tsay unay runakunaqa yupaytapis mana atipaypämi jiruruparaykämantsik. Tsaynö kaykaptinqa cörriq runa qepinta jaqiqnö llapan jutsantsikta dëjashun. Llallinakuqkuna chäyänanpä kaqman cörriyanqannö noqantsikpis Tayta Dios munanqannö wanunqantsikyaq kawashun.

2Salvamaqnintsik y tantiyatsimaqnintsik Jesucristo imanö kawanqantapis tantiyashun. Paymi runakunata salvar kushikunanpä kanqanta musyar penqakuyta jitaskir cruzchö wanurqan. Tsaymi kananqa Tayta Diospa trönun derëcha lädunchö jamaraykan.

3Tayta Diosman yärakuyanqaykita mana jaqiyänaykipä Jesucristo imanö ñakanqantapis tantiyakuyay. Payqa jutsasapa runakuna contran shäriyaptinpis Tayta Dios munanqannömi imaypis kawarqan.

4Qamkunapa contrayki shärirpis manam mayqaykitapis wanutsiyäshunkirätsu.

5¿Qonqaskiyarquykiku Tayta Dios wamrankunapä palabranchö ninqanta? Tsaychömi nin: «Hïju, Tayta Dios corrigishuptiki ama qallayaytsu. Qallayänaykipa rantin cäsukuy.

6Kuyanqan kaqtam Tayta Dios corrigin. Wamran kananpä qorinqan kaqtaqa yachakunanpämi castigan».

7Pï runapis wamrantaqa corriginmi. Tsaynöllam wamran kayaptiki Tayta Diospis corrigiyäshunki. Tsaymi Tayta Dios corrigiyäshuptiki cäsukuyänayki.

8Tayta Diospis wamran kaqtaqa llapantam corrigin. Mana corrigiyäshuptikiqa manam wamrankunatsu kayanki.

9Papänintsikpis mana cäsukuq kashqam corrigimarquntsik. Corrigimashqapis qallayänantsikpa rantinmi cäsukurquntsik. Tsaynö kaykaptinqa Tayta Dios corrigimashqa masrä cäsukushun. Cäsukurqa mana ushakaq kawaytam tarishun.

10Papänintsikpis poderninchö kanqantsikyaqllam munanqannö kawanantsikpä corrigimantsik. Peru Tayta Diosmi sïqa corrigimantsik pay jutsaynaq kanqannö jutsaynaq kanantsikpä.

11Corrigimanqantsik höra pasaypa llakikurpis cäsukurqa Tayta Dios munanqannömi kawashun.

12Tsaynö kaykaptinqa makiki shawikashqanö kaptinpis y alaywan qonqurniki watakashqanö kaptinpis valorta tsariyay.

13Nänipita mana yaqaypa aywaqnö imaypis allillata rurayay. Tsaynöpam weqru runa ishkiqnö kayankinatsu, sinöqa allishqa runanönam kayanki.

14Pïmaywanpis kuyanakur alli kawayay. Tsaynölla jutsata mana rurar Tayta Dios munanqannö kawayay. Jutsa ruraqkunaqa manam pipis Tayta Diospa puntanman chanqatsu.

15Shumaq tantiyayay. Mayqaykipis jutsa rurayta mana dëjarqa manam salvakuyankitsu. Qallayashqa ama puriyaytsu. Qallayashqa purirqa venënuyuq ayaq jachanö karmi wakinkunatapis qallayätsiyanki.

16Fornicación jutsata ama mayqaykipis rurayankitsu. Tsaynölla Esaúnöqa Tayta Diosta mana cäsuq ama kayankitsu. Esaúqa mayor kay derëchunta juk plätu mikuyllapämi wawqinta rantikurqan.

17Musyayanqaykinömi tsay bendicionta papäninpita chaskiyta munar pasaypa waqarpis chaskirqannatsu.

18Qamkunaqa manam Sinaí jirkaman chaqnötsu kayanki. Tsay jirkachöqa ninapis, tsakaypis y pasaypa vientupis karqanmi.

19Cornëta waqamuqta y Tayta Dios mantsaypä parlamunqanta wiyarmi pasaypa mantsar manana parlamunanpä rugakuyarqan.

20Tsaynöllam pasaypa mantsakäyarqan Tayta Dios niptin: «Runatapis ashmatapis jirkaman witsaq kaqtaqa saqmaypa [o flëchaypa] wanutsiyanki».

21Pasaypa mantsaypä kaptinmi Moiséspis nirqan: «Pasaypa mantsarmi tsuktsukyaykä».

22Qamkunaqa Sión jirkanman y ciëluchö kaykaq Jerusalénman chashqanönam kaykäyanki. Tsay markaqa imayyaqpis kawaq Tayta Diospa markanmi. Tsaychömi yupaytapis mana atipaypä atska angelkuna Tayta Diosta kushishqa alabaykäyan.

23Tayta Diosman llapan yärakuqkunawan qorikashqanömi kaykäyanki. Mayor wamra herenciata chaskiqnö kayaptikim jutikikunapis ciëluchö qellqashqana kaykan. Tsaynöllam pïmayta juzgaq Tayta Diospa puntanman y ciëluchö kaykaq llapan salvashqakunapa puntanman chashqanöna kaykäyanki.

24Tsaynöllam Jesucristupa puntanchö kaykaqnöna kaykäyanki. Paymi wanurqan Tayta Dios mushuq pactuta rurar salvamänantsikpä. Jesucristo yawarninta jichanqan manam Abel yawarninta jichanqannötsu kaykan. Abel yawarninta jichar wanunqanqa wanutsiq runa castigashqa kananpämi karqan. Peru Jesucristo yawarninta jichar wanunqanmi sïqa perdonashqa kanantsikpä kaykan.

25Tsaynö kaykaptinqa Tayta Dios niyäshunqaykita ama yupaytupäyaytsu. Desiertuchö Moisés ninqanta mana cäsukuqkunata Tayta Dios castigaykarqa ciëlupita nimanqantsikta mana cäsukushqa peormi castigamäshun.

26Sinaí jirkachö Tayta Dios parlamuptin tsay jirkapis pasaypam tsuktsukyarqan. Kananpis Tayta Dios palabranchömi nin: «Yapaymi kay patsata tsuktsukyätsishä. Manam kay patsallatatsu tsuktsukyätsishä, sinöqa ciëlutapis tsuktsukyätsishämi».

27«Yapaymi kay patsata tsuktsukyätsishä» nirqa llapan kamanqankunata tsuktsukyätsir ushakätsinanpä kanqantam musyatsimantsik. Tsaynö ruraptinmi mana ushakaqkunallana quëdayanqa.

28Tayta Diospa mandakuyninqa imaypis manam ushakanqatsu. Tsay mandakuytaqa chaskiykantsiknam. Tsaymi agradëcikur llapan shonquntsikwan payta alabashun. Payta cäsukur munanqannö imaypis kawashun.

29Mana cäsukuqkunataqa nina rupar ushanqannömi Tayta Diosnintsik ushakätsinqa.

← Chapter 11 Jump to: Chapter 13 →