Hebrews 9

Quechuan QXO (Biblia en Quechua del sur de Conchucos)

← Chapter 8 Jump to: Chapter 10 →

1Unay pactu kanqan witsanmi Sagrädu Tolduta imanö rurayänanpä y tsaychö payta imanö adorayänanpäpis runakunata Tayta Dios tantiyatsirqan.

2Tsaymi Sagrädu Tolduta ishkay cuartuyuqta rurayarqan. Punta kaq cuartuchömi karqan candilëru, Tayta Diospä churayanqan tanta y tanta churakuna mësapis. Tsay cuartupa jutinmi Lugar Santu.

3Ruri kaq cuartupa jutinmi Lugar Santïsimu karqan. Tsay ishkay cuartukunaqa rakta cortïnawanmi rakishqa karqan.

4Lugar Santïsimuchömi inciensiuta qoshnitsiyänanpä qoripita rurashqa altar karqan. Tsaynöllam tsaychö karqan Pactu Babul. Tsay babulmi jananpa rurinpa qoriwan enchapashqa karqan. Tsaychömi qoripita rurashqa tazón wiñararqan. Tsay tazonchömi maná ninqan mikuy churararqan. Tsaynöllam tsay babulchö wiñararqan Aarónpa tseqllimuq tukrun y läja rumikunachö qellqashqa pactupis.

5Tsay babul tsapanan jananchönam kayarqan qoripita rurashqa chipipiykaq querubinkuna. Tsay querubinkunam babul jananchö älankuna kichashqa kayarqan. Tsaykunapä tantiyatsinäpä masrämi kan.

6Sagrädu Tolduta ruraskiyaptinnam leykuna ninqannö llapanta rurayänanpä punta kaq cuartuman sacerdötikuna qoyay qoyay yaykuyaq.

7Peru Lugar Santïsimumanmi sïqa mandaq sacerdötilla watachö juk kuti yaykuq. Ashmapa yawarninta aparkurmi kikinpa jutsanpita y runakuna mana tantiyakuypa jutsa rurayanqanpita perdonta mañakunanpä yaykuq.

8Lugar Santïsimuman mandaq sacerdötilla yaykuptinmi Espíritu Santu tantiyatsimantsik Sagrädu Toldu kaykanqanyaq Tayta Diospa puntanman mana chänantsikpä kanqanta.

9Tsaynö kaykaptinqa shumaq tantiyakushun: Tsaki mikuy ofrendakunata y ashmakunata altarchö sacerdötikuna rupatsiyaptinpis manam tsaykunawanqa runakuna perdonta tariyantsu.

10Unay pactuchömi qellqashqa kaykan imata mikunantsikpä imata mana mikunantsikpäpis, imata upunantsikpä imata mana upunantsikpäpis y imaykanöpa purificakunantsikpäpis. Tsaykunatam runakuna cumpliyänan karqan Tayta Dios mushuq pactuta ruranqanyaqlla.

11Mushuq pactuchöqa Jesucristunam mandaq sacerdöti kaykan. Payqa manam kay patsachö templumantsu yaykurqan, sinöqa kikin Tayta Dios ruranqan ciëluchö kaykaq templumanmi.

12Ciëluchö kaykaq Lugar Santïsimuman yaykunanpäqa manam kay patsachö sacerdötikuna rurayanqannö chïvupa y becërrupa yawarninta aparkur cada watatsu yaykurqan, sinöqa kikinpa yawarninta jicharmi juk kutilla yaykurqan. Tsaynöpam imayyaqpis salvashqa kanantsikpä rantimarquntsik.

13Törukunapa y chïvukunapa yawarninwan runakunata tsaqtsuyaptin y ternërata rupatsiyanqan uchpata yakuman wiñarkur tsaqtsuyaptinmi janallanpa runakuna purificashqa kayaq.

14Peru Jesucristo yawarninta cruzchö jichashqa kaptinmi janantsikllapatsu purificashqa kantsik, sinöqa shonquntsikpis mana allikunata ruranqantsikpitam purificashqana kaykan. Tsaynö purificashqa karmi imayyaqpis kawaq Tayta Diosta sirvintsik. Jesucristuqa Espíritu Santupa poderninwan Tayta Dios munanqan sacrificiunö kar noqantsik raykur wanuptinmi tsaynö purificashqa kantsik.

15Tsaymi Tayta Dios mushuq pactuta cumplinanpä Jesucristo garantiantsik kaykan. Paymi wanurqan unay pactuta mana cumplinqantsikpita perdonashqa kanantsikpä. Tsaynöpam llapanpis Tayta Dios qayanqan kaqkunaqa awninqan herenciata chaskiyanqa.

16Tayta Dios ruranqan pactuqa testamentunömi. Testamentupis testakuq runa wanuptinrämi välin.

17Testakuq manarä wanuptinqa testamentu manam välinrätsu. Peru wanuskiptinmi sïqa välin.

18Tsaynöllam punta kaq pactu välinanpäqa ashmakunapa yawarninta jichayarqan.

19Tsaymi runakuna qorikäyaptin leykunachö llapan mandamientukunata Moisés liyipaskir becërrukunapa y chïvukunapa yawarninta qorirqan. Tsay yawarman yakuta tallurkurmi hisöpu jachapa rämankunata puka jïluwan juk qeruman watarqan. Tsayta yawarman tullpurmi qellqashqa kaykaq leykunata y llapan runakunatapis tsaqtsur

20nirqan: «Kay yawarqa noqantsikwan Tayta Dios pactuta ruranqan yawarmi».

21Tsaynöllam Sagrädu Toldutapis y llapan manëjunkunatapis tsay yawarllawan Moisés tsaqtsurqan.

22Moisés qellqanqan leykunachömi nin purificashqa kananpäqa yawarwanrä imapis tsaqtsushqa kananpä. Yawarta mana jichaptinqa manam runakunata jutsankunapita Tayta Dios perdonantsu.

23Tsaymi ciëluchö kaykaq templunö Sagrädu Toldutapis y llapan manëjunkunatapis ashmapa yawarninwanrä purificarqan. Peru ciëluchö kaq templutam sïqa mas väliq yawarwan purificarqan.

24Ciëluchö templunö kaptinpis Jesucristo manam runa ruranqan templumantsu yaykurqan, sinöqa ciëlumanmi. Kananqa Tayta Diospa puntanchömi noqantsikpä mañakuykan.

25Tsayman yaykunanpä juk kutillam kikinpa yawarninta jichar wanurqan. Kay patsachö mandaq sacerdötiqa ashmakunapa yawarninta apakurkur wata watam Lugar Santïsimuman yaykun.

26Paykunanölla rurarqa kay patsata kamanqanpita kananyaqqa Jesucristo ayka kutirä wanunman karqan. Peru atska kuti wanunanpa rantinmi juk kutilla wanurqan. Jutsantsikpita perdonashqa kanantsikpämi kay ultimu tiempuchö sacrificiunö kikin wanurqan.

27Tsaynöllam llapan runakunapis juk kutilla wanuyan y tsaypitaqa juzgashqanam kayanqa.

28Jesucristupis juk kutillam atskaq runakunapa jutsankunapita wanurqan. Kay patsaman kutimurqa manam runakunapa jutsankunapita yapay wanunanpätsu kutimunqa, sinöqa payta shuyaqkunata salvananpämi.

← Chapter 8 Jump to: Chapter 10 →