Hebrews 13

Quechuan QXO (Biblia en Quechua del sur de Conchucos)

← Chapter 12 Jump to:

1Tsay castanölla imaypis kuyanakur kawayay.

2Tsaynölla wayikiman patsakuq pï chämuptinpis kushishqalla patsatsiyanki. Tsaynö patsatsiyanqanchömi wakin runakuna mana musyar angelkunata patsatsiyarqan.

3Kikikikuna carcelchö wichqaraykaqnö carcelchö kaykaqkunata yarpäyanki. Kikikikuna ñakayanqaykinö ñakaqkunatapis yanapayanki.

4Llapayki casädu kaqkuna majaykiwan kuyanakur alli kawayay. Adulteriu jutsata ama rurayaytsu. Fornicación jutsata y adulteriu jutsata ruraqkunataqa Tayta Diosmi juzganqa.

5Tsaynölla ama qellaypä mallaqashqa kayaytsu. Tsaypa rantinqa imaykikunapis kanqallanwan contentakuyay. Tayta Diosmi nin: «Manam imaypis jaqishaykitsu ni qonqashaykitsu».

6Tsaynö nikämashqaqa payman yärakur kushishqa nishun: «Tayta Dios yanapamaptinmi imatapis mantsarïtsu. Runakuna conträ shäriyaptinpis manam llakikütsu».

7Tayta Diospa palabranta yachatsishuqnikikunata yarpäyay. Tayta Diosta sirvir allikunata rurayanqanta tantiyar paykuna yärakuyanqannö qamkunapis Tayta Diosman yärakuyay.

8Jesucristuqa unaypis, kananpis y imayyaqpis kanqannöllam kaykan.

9Llutan yachatsikuqkuna yachatsiyanqanta ama chaskiyaytsu. Manam paykuna niyanqannötsu reqishqa mikuykunallata mikur Tayta Dios munanqannö kawantsik, sinöqa Tayta Dios yanapamashqam.

10Noqantsikpa altarnintsikqa manam Sagrädu Tolduchö kaykaq altarnötsu. Altarnintsikpita mikushqapis Sagrädu Tolduchö Tayta Diosta sirviq sacerdötikunaqa manam tsaypita mikuyänanpä derëchun kantsu.

11Unay pactuchöqa runakuna jutsata rurayanqanpitam mandaq sacerdötikuna ashmakunapa yawarninta Lugar Santïsimuman apayaq. Tsay ashmakunapa aytsantanam campamentupita jipiskir rupatsiyaq.

12Tsaynöllam Jesucristutapis markapita jipiskir wanutsiyarqan. Yawarninta jichar wanunqanpitam jutsantsikkunata Tayta Dios perdonamantsik.

13Jesucristo tsaynö ñakaykaptinqa noqantsikpis campamentupita yarqushun. Payta ñakatsiyanqannö ñakatsimashqapis o payta chikiyanqannö chikimashqapis payman imaypis criyikur kawashun.

14Noqantsikpa markantsikqa manam kay patsachötsu. Tsaypa rantinmi kay patsachö qorpanölla kar mana ushakaq markatana shuyaykantsik.

15Tsaynö kaykaptinqa Jesucristuman criyir sacrificiuta altarman churaqnö Tayta Diosta imay hörapis alabashun. Paypa jutinchö alabanqantsikmi alli kaykan.

16Tsaynölla mana qonqaypa allikunata rurayay. Jukniki jukniki imallawanpis yanapanakuyay. Tsaynö kawarmi Tayta Dios munanqan sacrificiukunata payman apaqnö kantsik.

17Mayor wawqikunata cäsuyay. Paykunaqa shumaq rikayäshunaykipämi qoyay qoyay yarpachakuyan. Tsaynöllam alli o mana alli rikayäshunqaykipita Tayta Diosta cuentata qoyanqa. Tsaynö kaykaptinqa ama llakikatsiyaytsu, sinöqa kushi kushilla cuidayäshunaykipä yachatsiyäshunqaykita cäsuyay. Llakikatsiyaptikiqa manam qamkunapäpis allitsu kanqa.

18Noqakunapäpis Tayta Diosta mañakuyay. Musyayämi llutanta mana rurayanqäta. Tayta Dios munanqallantam imaypis rurayta munayä.

19Tsaynölla qamkunaman yapay kutiyämunäpä payta mañakuyay.

20Tayta Diostam qamkunapä mañakü. Paymi alli kawayta qaramantsik. Señor Jesucristutapis kawatsimushqam. Üshankunatapis shumaqmi mitsin. Yawarninta jicharmi imaypis mana ushakaq pactuta noqantsikwan rurashqa.

21Jesucristupa jutinchömi imaypis yanapaykuyäshunaykipä payta mañakuyä. Munanqanta rurayänaykipä alli kaqkunata alistapaykuyälläshuy. Payqa imayyaqpis alabashqa kaykullätsun. [Amén.]

22Wawqikuna y panikuna, wallkallatapis kay cartachö qellqamunqäta chaskikuyay.

23Wawqintsik Timoteupis carcelpita yarqamushqanam. Qamkunaman manarä shamuptï noqa kaqman chämuptinqa ishkäkunam shayämushä.

24Mayor wawqikunata y wakin wawqikunata y panikunatapis saludaykuyällay. Tsaynöllam Italia nacionpita wawqikuna y panikunapis saludayämushunki.

25Tayta Dios kuyapäyäshurniki yanapaykuyälläshuy. [Amén.]

← Chapter 12 Jump to: