Hebrews 2

Quechuan QXO (Biblia en Quechua del sur de Conchucos)

← Chapter 1 Jump to: Chapter 3 →

1Angelkunapitapis Jesucristo mas poderyuq kaykaptinqa willakuyninta wiyanqantsikkunata shumaq cäsushun. Mana cäsurqa mana allitapis rurashwanmi.

2Angelkuna apayämunqan leykunata mana cäsuq runakunatapis Tayta Dios castigaykaptinqa

3¡imanöparä castïgunpita qeshpishun salvamänantsikpä kaq willakuyta mana cäsukurqa! Tsay willakuytam Señor Jesucristo puntata willakurqan. Tsaypitanam willakunqanta wiyaqkuna noqantsikta willamarquntsik.

4Willakuynin rasunpa kanqanta Tayta Dios musyatsimarquntsik señalkunata y espantaypä milagrukunata rurarmi. Tsaynöllam musyatsimarquntsik Espíritu Santuwan habilidäkunata kikin munanqannö qaramarnintsik.

5Mushuq patsata manam angelkunapa makinmantsu Tayta Dios churashqa, sinöqa Jesucristupa makinmanmi.

6Tsaymi palabranchö nin: ¿Imanatä runaqa tsayjinanpa paypä yarpachakunaykipä? ¿Imanatä runaqa alläpa kuyanaykipä?

7Runatam kamarquyki cäsi angelnö poderyuq kananpä. Reytanömi churarquyki munayyuq y respitashqa kananpä. [Llapan kamanqaykitam poderninman churarquyki.]

8Kay patsachö kaqkunataqa llapantam poderninman churarquyki. Poderninman llapanta churanqanta niptinpis manarämi rikantsikrätsu runapa poderninchö llapan kanqanta.

9Tsayta manarä rikarpis y Jesucristo kay patsachö kanqanyaq angelkunapita mënus poderyuq kaykaptinpis musyantsikmi munayyuq y respitashqana kananpä Tayta Dios payta churanqanta. Llapan runakunata salvananpä wanunqanpitam Tayta Dios kuyapäkuq kar payta tsaynö churarqan.

10Jesucristo salvamaqnintsik kananta munarmi llapantapis kamaq y llapanpä poderyuq Tayta Dios payta mandamurqan noqantsik raykur ñakar wanunanpä. Tsaynöpam wamrankunata salvar gloriaman pushanqa.

11Tsaymi runakunata salvaq Jesúspis y salvanqan kaqkunapis tsay Taytallana kantsik. Tsay Taytalla karmi salvanqan kaqkunata Jesucristo mana penqakuypa nimantsik wawqinkuna y paninkuna kanqantsikta.

12Tayta Diospa palabranchömi Jesucristo nin: «Salvakuq kanqaykitam wawqïkunata willashä. Paykunawan qorikaykurmi alabashayki».

13Mastapis ninmi: «Noqaqa payllamanmi yärakushä». Tsaynöllam nin: «Tayta Dios qaramanqan wamräkunawanmi kaychö kaykä».

14Diospa wamrankuna ushakaqlla kayaptinmi Jesucristupis noqantsiknö yurirqan y noqantsiknö wanurqan. Tsaynö wanurmi wanuypä poderyuq diabluta vincirqan.

15Tsaynöpam wanuyta mantsar kawanqantsikpita jipimarquntsik. Kananqa wanuytapis manam mantsantsiknatsu.

16Jesucristuqa manam angelkunata yanapananpätsu shamurqan, sinöqa Abrahampa castankunata yanapananpämi.

17Yanapamänapämi noqantsiknölla kay patsachö runa karqan. Tsaynöpam Tayta Diospa puntanchö kuyapäkuq y llapantapis cumpliq mandaq sacerdöti kayman charqan. Paymi jutsantsikkunapita Tayta Dios perdonamänantsikpä sacrificiu kashqa.

18Jesucristutapis Satanás tentar ñakatsishqa kaptinmi noqantsiktapis tentamashqa Jesucristo yanapamäshun.

← Chapter 1 Jump to: Chapter 3 →