Hebrews 4

Quechuan QXO (Biblia en Quechua del sur de Conchucos)

← Chapter 3 Jump to: Chapter 5 →

1Unay Israel runakunata jamayman yaykutsinanpä awninqannöllam noqantsiktapis Tayta Dios nimantsik jamayman yaykutsimänantsikpä kanqanta. Tsaynö awniykämashqaqa cuidädutä payta mana cäsur tsay jamayman yaykushwantsu.

2Unay Israel runakuna Tayta Diospa willakuyninta musyayanqannömi noqantsikpis musyantsik. Tsay runakunaqa musyaykarpis mana criyiyanqanpitam Tayta Dios awninqan jamayman yaykuyarqantsu.

3Peru noqantsikmi sïqa payman criyir awnimanqantsik jamayman yaykushun. Mana criyiqkunapämi Tayta Dios nirqan: «Rabyarmi jurar nirqä: «Paykunaqa awninqä jamayman manam yaykuyanqatsu». Mana criyiqkuna Tayta Dios awninqan jamayman mana yaykuyaptinpis kay patsata kamanqanpitam tsay jamayman yaykunantsikpä alistashqa kaykan.

4Alistashqa kanqanta musyantsik qanchis kaq junaqpä palabranchö niptinmi: «Llapanta kamayta ushaskirmi qanchis kaq junaqchö Tayta Dios jamarqan».

5Mastapis ninmi: «Paykunaqa awninqä jamayman manam yaykuyanqatsu».

6Tsay ninqannöllam unay Israel runakuna Tayta Diospa willakuyninman criyiykarpis mana cäsukuq kar tsay jamayman yaykuyarqantsu. Tsaynö kaptinpis tsay jamay kaykanrämi yaykunantsikpä.

7Tsay jamayman yaykunantsikpämi Tayta Dios tantiyatsiptin David nirqan: «Tayta Dios ninqanta kanan junaq wiyaykarqa chukru shonqu ama kayaytsu».

8Israel runakunata Canaánman pusharpis Josuéqa manam paykunata jamayman yaykutsirqantsu. Yaykutsishqa kaptinqa Tayta Dios manam yapayqa parlanmantsu karqan.

9Tsaymi Tayta Diosman criyikuq runakunapäqa kaykanrä jamayman yaykuyänanpä.

10Kay patsata kamayta ushaskir Tayta Dios jamanqannömi noqantsikpis tsay jamayman yaykur llapan ñakanqantsikkunapita jamashun.

11Tsaynö kaykaptinqa Tayta Dios alistanqan jamayman yaykunantsikpä yarpachakushun. Israel runakunanö mana cäsukuq karqa noqantsikpis manam yaykushuntsu.

12Tayta Diospa palabran kawaq karmi poderyuq kaykan. Ishkan lädupa alli afilashqa espädapitapis mas fïlu karmi shonquntsikmanpis, yarpaynintsikmanpis y toqshuntsikmanpis chan imanö kanqantsiktapis tantiyatsimänantsikpä.

13Llapan kamanqankunata rikaptinmi Tayta Diospita pakakuyta puëdintsiktsu. Imata rurashqapis payqa rikaykämantsikmi. Imanö kawanqantsikpitam cuentata mañamäshun.

14Tayta Diospa Tsurin Jesucristo gloriachö mandaq sacerdöti kaykaptinqa payman imaypis yärakushun.

15Kay patsachö kaptinmi mandaq sacerdötintsik Jesucristuta noqantsiktanö Satanás imaykanöpa tentarqan. Tsaynö tentaptinpis manam jutsata rurarqantsu. Tsaymi noqantsiktapis Satanás tentamashqa kuyapämarnintsik Jesucristo yanapamantsik.

16Imaypis yanapamänantsikpä kaykaptinqa kuyapäkuq Tayta Diosta mana mantsaypa mañakushun. Payta mañakurqa trönunchö paywan parlaykaqnömi kaykantsik. Tayta Diosta mañakushqaqa ima ñakaychö kashqapis paymi kuyapämarnintsik yanapamäshun.

← Chapter 3 Jump to: Chapter 5 →