1 Samuel 21

Kirundi (Bibliya Yera 1951, 1967 (Burundi))

← Chapter 20 Jump to: Chapter 22 →

1Maze Dawidi aja i Nobu kwa Ahimeleki umuherezi; Ahimeleki aza kumusanganira ahinda agashitsi; aramubaza, ati Vyagenze bite, k’uri wenyene ata waguherekeje?

2Dawidi yishura Ahimeleki umuherezi, at’ Umwami yantumye ku rubanza, arambarira ngo ntihagire umuntu n’umwe amenya ivy’ urwo rubanza yantumyeko, cank’ ico yangeze. Kand’ imikangara yanje nayirangiye ko tuzohūrira ahanaka.

3Mbega nta kazimano? Ntabaza udutsima dutanu, cank’ ico wobona cose.

4Uwo muherezi yishura Dawidi, ati Nta mitsima isanzwe mfise, atar’ iyejejwe; n’imiburiburi iyaba iyo mikangara idaherūkanye n’ abagore.

5Dawidi yishura uwo muherezi, ati Vy’ukuri haciye imisi itatu dutandukanye n’abagore; kandi twavuye i muhira ibintu vy’iyo mikangara vyejejwe, nah’ ar’ urugendo nk’izindi. Non’ uyu musi ibintu vyabo ntibiheza bikarushiriza kuba ivyera?

6Nuk’ uwo muherezi amuha imitsima yejejwe, kukw ata yindi yariho atar’ iy’ ibiterekērwa, iyo bāhora bakūra imbere y’Uhoraho, bagasubizah’ iyigishūshe ku musi bayikūyeho.

7Kur’ uwo musi nyene hār’ umuntu umwe wo mu basavyi ba Sauli yari yashībijwe ngw agume imbere y’Uhoraho, yitwa Dowegi w’Umunyedomu, yar’ umubgiriza w’abungere ba Sauli.

8Dawidi abaza Ahimeleki, ati Mbega nta cumu wogira hano cank’ inkota? Nta nkota nazanye cank’ ikindi kirwanishwa, kuk’ urubanza rw’umwami rwar’ urwo kwihuta.

9Uwo muherezi aramwishura, ati Ya nkota ya Goliyati wa Mufilisitiya watsinda mu mwonga Ela, ehe ngiyi iri hano, izingiriwekw impuzu inyuma ya efodi; ni wagomba kuyijana, uyijane, kukw ata yindi iri hano atar’ iyo. Dawidi aramwishura, ati Nta yiruta iyo; yimpe.

10Uwo musi Dawidi arahaguruka ahunga Sauli, aja kwa Akishi umwami w’i Gati.

11Abantu ba Akishi baramubarira, bat’ Uyu si Dawidi umwami wa ca gihugu? Si we bāvyinira bitabiriza, bati Sauli yishe ibihumbi, Dawidi we yica ibihumbi indiri?

12Ayo magambo atuma Dawidi ahagarika umutima, agirira Akishi umwami w’i Gati ubgoba bginshi.

13Araheza yigira ukundi imbere yabo, yisarishiriza muri bo, aharamba inzugi z’irembo, akarekura urukonda rugashororokera mu bganwa.

14Akishi abarira abo bantu biwe, at’ Aho ntimubona k’uyo muntu yasaze? Icatumye mumunzanira n’iki?

15Mbega har’ abasazi nari nkennye mu ko munzanira uru rugabo kunsarira imbere? Urugabo nk’uru rwongīra mu nzu?

← Chapter 20 Jump to: Chapter 22 →