Song of Solomon 1

Kirundi (Bibliya Yera 1951, 1967 (Burundi))

Jump to: Chapter 2 →

1Indirimbo y’agaheta, ya Salomo.

2N’unsomeshe ugusomana kw’ akanwa kawe: Kuk’ urukundo rwawe ari rwiza kurusha vino.

3Amavuta yawe aratāmirana cane, Izina ryawe rimeze nk’amavuta asutswe; Ni co gituma inkumi zigukunda.

4Mfata nkuje inyuma, twiruke. Umwami yanshikanye i kare: Tuzonezerwa, nawe uzoduhimbara. Tuzokwamamaza urukundo rwawe kurusha uko twokwamamaza vino: Urukundo bagukunda rurakubereye.

5Ndirabura, ariko ndi mwiza, Mwa bakobga b’i Yerusalemu; Mmeze nk’amahema y’i Kedari, Nk’imikingo ya Salomo.

6Ntimumpange amaso, kuko nirabura, Kukw izuba ari ryo ryanyirabuje. Abahungu ba mama bārandakiye, Banzigamishije imirima y’imizabibu, Arik’ urwanje ruzabibu sinaruzigamye.

7Yewe, uwo umutima wanje ukunda, umbarire Ah’ uragira ah’ ari ho, N’ah’ uvyagiza mu mahodoka: None n’iki cotuma ngenda nk’uwitwikiriye mu maso, Nca i ruhande y’imikuku ya bagenzi bawe?

8Asangw’ utahazi, yewe urusha abandi bagore akaranga, Jana inzira y’ibitungwa, Uragire imyagazi y’impene yawe i ruhande y’insago z’abungere.

9Ewe mukunzi wanje, nakugereranije N’ifarasi yo mu zikwega imikogote ya Farawo.

10Imisaya yawe itewe gushaza n’ibitsibo vy’umushatsi wawe, N’izosi ryawe rishazishijwe n’utugenegene tw’igiciro kinini.

11Tuzogutsibira ibitsibo vy’izahabu, Birimw’ intabonwa z’ifeza.

12Umwami akivyagiye, ari ku meza yiwe, Amavuta yanje yatanguye gutāmirana.

13Umukunzi wanje ammereye nk’itu ry’isenga Riri hagati y’amabere yanje.

14Umukunzi wanje ammereye nk’agati kitwa koferu gashuritse udushurwe tw’uturundo Kaba mu nzabibu zo muri Eni‐gedi.

15Ereg’ uri mwiza, mukunzi wanje, n’ukuri uri mwiza pe; Amaso yawe asa n’inuma.

16Ereg’ uri mwiza, mukunzi wanje, mber’ urahimbaye; Ikirwa cacu kigaranzuyek’ ubusaswa busha.

17Imitambikwa y’ingoro yacu n’ibiti vy’amasederi, Ibishoro vyayo n’imiberoshi.

Jump to: Chapter 2 →