Song of Solomon 7

Kirundi (Bibliya Yera 1951, 1967 (Burundi))

← Chapter 6 Jump to: Chapter 8 →

1Ewe kuntu uturenge twawe ari twiza mu nkweto zawe, ga mukobga w’umwami! Amatako yawe ameze nk’ utugenegene tw’utubuyenge Twabājwe n’intoke z’umuhinga.

2Umukondo wawe umeze nk’ agakombe kiburungushuye, Kataburamwo vino ituriranije. Iboco ryawe risa n’ikibeya c’ingano Gikikijwe ibirungu.

3Amabere yawe yompi ameze nk’ivyagazi bibiri Vy’amahasa y’ingeregere.

4Izosi ryawe rimeze nk’umunara wubakishijwe amahembe y’inzovu; Amaso yawe asa n’ibidengeri vy’i Heshiboni, biri kw irembo ry’i Bati‐Rabimu; Izuru ryawe rimeze nk’umunara w’i Lebanoni, Irābana n’i Damasiko.

5Umutwe wawe wemye nk’i Karumeli, Umushatsi wo ku mutwe wawe umeze nk’impuzu y’inyambarabami; Umwami n’imbohe y’ibitsibo vyawo vyamuciye agatēte.

6Ewe kuntu uri mwiza kand’ uteye igomwe, Yewe uwo nkunda ukampimbara!

7Uburebure bgawe buri hano ni nk’ikigazi, N’amabere yawe ameze nk’ imisoko yo kuri co.

8Naravuze, nti Hinge nūrire ico kigazi, Mfate amashami yaco: Amabere yawe n’abe nk’ inzabibu zo ku muzabibu, Ubgaku bg’impwemu zawe bumote nk’amacungwa;

9N’akanwa kawe kamere nka vino irushirije kuba nziza, Ishōka neza ica mu minwa y’abasinziriye.

10Nd’ uw’ umukunzi wanje, Na we ndamuteye igomwe.

11Ngwino mukunzi wanje, dusohoke tuje ku gahinga, Twake indāro mu mihana.

12Tuzinduke mu mirima y’imizabibu, Turābe kw imizabibu ipfunditse, canke kw amashurwe yayo asambuye, N’amakomamanga kw ashuritse; Aho ni ho nzokwerekera urukundo ngufitiye.

13Amadudayimu aratāmirana; Kw irembo ryacu har’ ivyamye vy’igiciro vy’imyuga myinshi, bisha bo n’ivya kera, Ivyo nakuziganirije, ewe mukunzi wanje.

← Chapter 6 Jump to: Chapter 8 →