Song of Solomon 5

Kirundi (Bibliya Yera 1951, 1967 (Burundi))

← Chapter 4 Jump to: Chapter 6 →

1Ndashitse mu murima wanje, mushikanje, mugeni wanje. Nomoroye isenga yanje ku giti, navuvuye imibavu yanje, Nariye ibinyagu vyanje n’ ubūki bganje, Nanyoye vino yanje n’amata yanje. Ni murye, bagenzi, Ni munywe, mbere ni munywe muhimbishwe n’ urukundo.

2Nari nsinziriye, arik’ umutima wanje uri maso: Numva ijwi ry’umukunzi wanje aramutsa, Ati Nyugururira, mushikanje, mukunzi wanje, inanuma wanje, mwiza wanje utagira agasembga; Kuk’ umutwe wanje utonzweko n’urume, N’umushatsi wanje utonzweko n’udutonyanga tw’ ijoro.

3Nti Ko nambuye umwambaro wanje: nowambara nte? Nkaba niyoze ibirenge: novyanduza nte?

4Umukunzi wanje acisha ukuboko mu mwenge w’urugi, Umutima wanje wuzura ikigumbagumba kubgiwe.

5Ndavyuka kwugururira uwo mukunzi wanje; Ibiganza vyanje bitonyangakw isenga, N’intoke zanje zitonyangakw isenga iyaze, Itonyangira ku bihindizo vy’ urugi.

6Maze nugururira umukunzi wanje; Ariko nsanga uwo mukunzi wanje yīgīriye, yāhise: Umutima wanje ucoberezwa n’ivyo yavuze. Ndamurondera, sinamubona; Ndamuhamagara, ntiyanyitaba.

7Duhūra n’abashibamyi bagendura igisagara, Barankubita, barankomeretsa; Abarinzi b’inzitiro z’igisagara bankiza umwitwikiro wanje.

8Ndabihanikirije, mwa bakobga b’i Yerusalemu mwe, ni mwambonera umukunzi wanje, Mumumbgirire yuk’ urukundo runshābije.

9Umukunzi wawe mbeg’ arusha iki abakunzi b’abandi, Yewe urusha abandi bagore akaranga? Umukunzi wawe arusha iki abakunzi b’abandi, Igituma utwihanikiriza urtyo?

10Umukunzi wanje ar’ inzobe y’ikimuri, agenderana amaraso mu maso, N’akarangabgami mu bantu ibihumbi cumi.

11Umutwe wiwe ni nk’izahabu nziza cane, Umushatsi wiwe n’intunda, wirabura nk’igikōna.

12Amaso yiwe ameze nk’inuma ziri ku migezi, Artyorowe n’amata, kand’ ari mu bibanza vyayo neza.

13Mu misaya yiwe hameze nk’ akarima k’imbazi gatāmirana cane, Iminwa yiwe imeze nk’ibirungu, itonyanga isenga iyaze.

14Intoke ziwe n’utuyogoyogo tw’izahabu zashizwek’ utubuyenge twitwa tarushishi, Umutumba wiwe umeze nk’ ihembe ry’inzovu ryabājwe, ryadombagijwek’ utwitwa safiro.

15Amaguru yiwe ameze nk’ inkingi zabājwe mu mabuye yitwa marimari, zashinzwe mu dutereko tw’izahabu nziza. Ukw ameze asa n’i Lebanoni, ni mwiza bihebuje, nk’ ibiti vy’amasederi.

16Akanwa kiwe kavamw’ amajambo aryoshe: mbere wese n’uw’ igikundiro. Uwo ni we mukunzi wanje, ni we mugenzi wanje, Yemwe bakobga b’i Yerusalemu.

← Chapter 4 Jump to: Chapter 6 →