Song of Solomon 3

Kirundi (Bibliya Yera 1951, 1967 (Burundi))

← Chapter 2 Jump to: Chapter 4 →

1Mw ijoro ndi ku buriri narondeye umugabo umutima wanje ukunda: Ndamurondera, ndamubura.

2Ndavuga, nti Hinge mvyuke, ngendagende mu gisagara, Mu nzira no mu hiyaguye haho, Ndondere uwo umutima wanje ukunda: Naramurondeye, ndamubura.

3Duhūra n’abashibamyi bagendura igisagara: Ndababaza, nti Mbega mwabonye wa wundi umutima wanje ukunda?

4Mmaze kubarēngāna gato Mbona uwo umutima wanje ukunda; Ndamufata, nanka kumurekura, Kugeza aho namushikanye mu nzu ya mama, Mu nzu y’uwamvyaye.

5Ndabihanikirije, mwa bakobga b’i Yerusalemu mwe, Nk’uko bagenza ku ngeregere no ku mpongokazi vyo mw ishamba, Ntimunkomere umukunzi, ntimumukangure, Gushitsa ah’ avyigombeye.

6Uriya ni nde, adūga avuye mu bugaragwa Ameze nk’umwotsi upfunduka nk’inkingi, Atāmirana isenga n’imibavu, N’ibimota neza vyose vy’ ibidandazwa?

7Erega n’inderuzo ya Salomo: Har’ abahizi mirongwitandatu bayikikije, Bo mu bahizi b’Abisirayeli.

8Bose bitwaza inkota, kandi n’abahinga bo kurwana: Umuntu wese yambaye inkota kw itako ryiwe, Kubg’ ibiteye ubgoba vyo mw ijoro.

9Umwami Salomo yībāzishirije inderuzo y’intebe, Mu biti vy’i Lebanoni.

10Inkingi z’icugamo yazicurishije mw ifeza, N’icegamo mw izahabu. Icicaro cayo cakoreshejwe impuzu y’agahama, Imbere hashashwe insobane Yajishanywe urukundo n’abakobga b’i Yerusalemu.

11Yemwe bakobga b’i Siyoni, ni musohoke murābe umwami Salomo, Afise igitsibo yambitswe na nyina ku musi w’ubukwe bgiwe, Ni wo musi w’umunezero w’umutima wiwe.

← Chapter 2 Jump to: Chapter 4 →