Song of Solomon 2

Kirundi (Bibliya Yera 1951, 1967 (Burundi))

← Chapter 1 Jump to: Chapter 3 →

1Nd’ ishurwe rya habaseleti ry’i Sharoni, Ikirungu co mu biyaya.

2Nk’ikirungu mu mahwa Ni k’umukunzi wanje ameze mu bandi bakobga.

3Nk’igiti c’icungwa mu bindi biti vyo mw ishamba Ni k’umukunzi wanje ameze mu bandi basore. Mpimbarwa no kwicara mu gitūtu ciwe, Amacungwa yiwe aransosera.

4Yanjanye mu nzu y’amazimano, Ibendera yiwe yari hejuru yanje yar’ iy’ urukundo.

5Ni mumpēmbūze udutore tw’ inzabibu, mundabūze amacungwa, Kuk’ urukundo runshābije.

6Ukuboko kwiwe kw’ukubamfu kuranseguye, Ukuboko kwiwe kw’ukuryo kurampfumbatiye.

7Ndabihanikirije, mwa bakobga b’i Yerusalemu mwe, Nk’uko bagenza ku ngeregere no ku mpongokazi vyo mw ishamba, Ntimunkomere umukunzi, ntimumukangure, Gushitsa ah’ avyigombeye.

8Ijwi ry’umukunzi wanje! Eh’ araje, Yikina amatavu ku misozi, Akinagira ku turambi.

9Umukunzi wanje ameze nk’ ingeregere canke nk’umukangara w’impongo: Eh’ ahagaze inyuma y’inzu yacu, Arungurukira mu madirisha, Yiyerekanira mu nshingo zayo.

10Umukunzi wanje aravuga, arambariye, Ati Va hasi, mukunzi wanje, mwiza wanje, ngwino tugende:

11Kuko rāba, urushana rurashize, Imvura iragiye, iracitse;

12Amashurwe aratanguye gushurika ku misozi, Igihe co kujwiragira kw’ inyoni kirashitse, Ijwi ry’intunguru rirumvikanye mu gihugu cacu;

13Insukoni z’ibitumbge ziratanguye guhishira ku musukoni wazo, Imizabibu irashuritse, Imota ubumote bgayo bgiza. Va hasi, mukunzi wanje, mwiza wanje, ngwino tugende.

14Ewe inanuma wanje, uba mu gihoro co mu gitandara no mw isenga ryo ku gatembge, Reka ndābe mu maso hawe, numve n’ijwi ryawe; Kukw ijwi ryawe ari ryiza, n’uburanga bgawe bukaba buhebuje.

15Ni mudufatire imbgebge, twa tubgebge duto‐duto twonona imirima y’imizabibu, Kukw imizabibu yacu ishuritse.

16Umukunzi wanje n’uwanje nanje nd’uwiwe, Aragira mu birungu.

17Garuka, mukunzi wanje, umere nk’ingeregere canke nk’umukangara w’impongo Wo ku misozi y’i Beteri, Igihe ca ni musi kitarashika, ibitūtu vyo ku kirengazuba bitarazimangana.

← Chapter 1 Jump to: Chapter 3 →