Song of Solomon 6

Kirundi (Bibliya Yera 1951, 1967 (Burundi))

← Chapter 5 Jump to: Chapter 7 →

1Umukunzi wawe yaroye hehe, Yewe urusha abandi bagore akaranga? Umukunzi wawe yakebereje hehe, Ngo tumurondere dufatanije nawe?

2Umukunzi wanje yamanutse aja mu murima wiwe, mu turima tw’imbazi, Kuragira mu matongo, no guca ibirungu.

3Nd’ uw’ umukunzi wanje, umukunzi wanje na we n’uwanje: Aragira mu birungu.

4Ewe mukunzi wanje, uri mwiza nk’i Tirusa, Uteye igomwe nk’i Yerusalemu, Uteye ubgoba nk’igitero c’ ingabo zigendana amabendera.

5Enda se n’unkūrekw amaso yawe, Kuko bindandura umutima. Umushatsi wawe umeze nk’ umukuku w’impene Zivyagiye ku nkēngēra y’i Gileyadi.

6Amenyo yawe n’akāmenge nk’umukuku w’intama Zivuye kwuhagirwa, Zifise amahasa zose, Ata n’imwe muri zo yagumbashe.

7Mu misaya yawe hameze nk’igisate c’ikomamanga, Iboneka mu mwitwikiro wawe.

8Har’ abamikazi mirongwitandatu, n’incoreke mirongumunani, N’abigeme batoharūrika.

9Ariko inanuma wanje we atagira agasembga, ni we wanje wenyene, N’ikinege kuri nyina; N’umutoni kuri nyina yamuvyaye. Abakobga iyo bamubonye bamwita umuhirwe, Mbere n’abamikazi n’incoreke na bo n’uko, baramutazira.

10Uyu ni nde arunguruka ameze nk’umutwenzi utambitse, Ni mwiza nk’ukwezi, Akayangana nk’izuba, Ateye ubgoba nk’igitero c’ ingabo zigendana amabendera?

11Naramanutse nja mu murima w’ibiyōba, Ngo ndābe ibironge bitotahaye vyo mu mwonga, Ndābe yuk’ umuzabibu upfunditse, N’amakomamanga kw ashuritse.

12Ntarabimenya, umutima wanje wanshikanye Mu mikogote ikwegwa n’ amafarasi y’abantu banje b’intōre.

13Garuka, garuka, Mushulamukazi we! Garuka, garuka, ngo tukwitegereze. Mugombera iki kwitegereza Umushulamukazi, Nk’uko mwokwitegereza abiyeretsi b’i Mahanayimu?

← Chapter 5 Jump to: Chapter 7 →