Song of Solomon 4

Kirundi (Bibliya Yera 1951, 1967 (Burundi))

← Chapter 3 Jump to: Chapter 5 →

1Ereg’ uri mwiza, mukunzi wanje, n’ukuri uri mwiza pe; Amaso yawe acishirije mu mwitwikiro wawe asa n’ inuma: Umushatsi wawe umeze nk’ umukuku w’impene Zivyagiye ku nkēngēra y’umusozi w’i Gileyadi.

2Amenyo yawe n’akāmenge nk’umukuku w’intama zākemuwe, Zivuye kwuhagirwa, Zifise amahasa zose, Ata n’imwe muri zo yagumbashe.

3Iminwa yawe imeze nk’urunyuzi rusa n’agahama, Kand’ akanwa kawe ni keza. Mu misaya yawe hameze nk’igisate c’ikomamanga, Iboneka mu mwitwikiro wawe.

4Izosi ryawe rimeze nk’umunara wa Dawidi Wubakiwe kubīkwamw’ ibirwanishwa, Umanitsemw’ inkinzo igihumbi, Inkinzo zose z’abahizi.

5Amabere yawe yompi ameze nk’ivyagazi bibiri vy’amahasa y’ingeregere Birīsha mu birungu.

6Hinge nīgīre ku musozi ubakw isenga, No ku gasozi kabakw imibavu, Igihe ca ni musi kitarashika, ibitūtu vyo ku kirengazuba bitarazimangana.

7Uri mwiza bihebuje ga mukunzi wanje; Nta gasembga ufise.

8Ngwino tuvane i Lebanoni, mugeni wanje, Tuvane i Lebanoni. Manuka uve ku mpinga y’ ahitwa Amana, Uve ku mpinga z’i Seniri n’i Herumoni, Uve ku masenga y’intambge, Uve ku misozi ibamw’ ingwe.

9Uhimbaje umutima wanje, mushikanje, mugeni wanje: Uhimbarishije umutima wanje ijisho ryawe, N’umugufu umwe wo mw izosi ryawe.

10Ewe kuntu urukundo rwawe ari rwiza, mushikanje, mugeni wanje! Urukundo rwawe ukuntu rundutira vino! Gutāmirana kw’amavuta yawe ukuntu kundutira imibavu y’ubgoko bgose!

11Iminwa yawe, mugeni wanje, itonyanga umutsāma: Ubūki n’amata biri musi y’ururimi rwawe; Gutāmirana kw’impuzu zawe kumeze nk’ugutāmirana kw’i Lebanoni.

12Ur’ umurima uzitiriwe, mushikanje, mugeni wanje, Ur’ isōko yīmiriwe, iriba rishizwekw ikimenyetso co kuriziririza.

13Iminago yo kuri wewe n’umurima w’amakomamanga, wama ivyiza; Urimwo koferu n’uduti twa narada,

14Narada na karukoma, Imisigati na mudarasini, n’ibiti vyose vy’imibavu, Isenga n’imbazi n’amoko yose y’ibisosa biruta ibindi.

15Ur’ iriba ryo mu mirima, Ur’isōko y’amazi yiburuka, N’imigezi itemba iva i Lebanoni.

16Kanguka, wa muyaga uva i burārūko, nawe uw’ i bumanuko, n’uze; Muhūhe ku murima wanje, kugira ng’ ubutāmirane bgaho bukwire hose. Umukunzi wanje n’aze mu murima wiwe, Arye ivyiza vyiwe vyamye muri wo.

← Chapter 3 Jump to: Chapter 5 →