2 Samuel 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to: Chapter 5 →

1I šundiá Iievosfiejo, Sauloskiro čhavó, so myjá Avieníro dro Xievróno, i obmeknepe léskire vastá, i saró Izrailjo strahadyja.

2Iievosfiejoste, Saulóskire čhavéste, sys duj xaladéngire barydyrá; lav jekheskiro – Baana, i lav javireskiro – Rihavo, Biejerofianinoskire-Riemonoskire čhavé, Vieniaminóskire rodóstyr, pal-dová so i Biejerofo otlydžalaspe ke Vieniamino.

3I našné Biejerofiani dre Gifaima, i jačnépe odój manušénca javire rigátyr ke davá dyvés.

4Ionafanoste, Saulóskire čhavéste, sys langalo čhavó. Pandž berš sys léske, kiéli javdiá zan (zvies') pal Sauloste i Ionafanoste Izriejeljostyr, i nian'ka léskiri, lyi les, nastiá. I kiéli joj sýges prastándyja, tedy jov pyjá i kerdiápe langalesa. Lav léskiro sys Miemfivosfiejo.

5I giné Biejerofianinoskire-Riemonoskire čhavé, Rihavo i Baana, i javné dro dyveseskiro baró xačkiribén ke Jevosfiejoskiro kher; a jov sys sutó dre paš dyvés.

6Rihavo i Baana, léskiro pšal, zaginé andré dro kher, sýrby vaš dová, sob (kaj) te len parnó giv; i čhindlé les dro per, i našné.

7Kiéli jone zaginé dro kher, Iievosfiejo sys paštó pe péskiro čhuibén, dre soibnytko péskiri štúba; i jone zamardé les, i muliakirdé les, i otčhingirde léskiro šeró, i lyné léskiro šeró pésa, i giné čhučé dromésa sarí rat;

8i jandlé šeró Iievosfiejoskiro ke Davído dro Xievróno, i phende kralíske: “Ĥáda, isyn Iievosfiejoskiro šeró, Saulóskire čhavéskiro, tyré vergoskiro, savó rodyja tyró di; kakaná Raj Devél otdyjá pal miré xulaste, kralíste, Saulóske i léskire rodóske.”

9I otphendiá Davído Rihavoske i Baanaske, léskire pšaléske, Biejerofianinoskire-Riemonoskire čhavénge, i phendiá lénge: “Te javél džidó Raj Devél, savó zrakhciá miro di kažnoné bidatyr!

10Kóli doles, kon jandiá mánge zan (zvies'), phení: “Ĥáda, myjá Sáulo”, i kon gindia pes, so jov jandiá lačhí zvies', to me uhtyldjom i zamardjom les dro Siekielago, zamiést dová, sob (kaj) te dav léske mazúri (nagrada),

11tedy kakaná, kiedy nalačhé manušá zamardé manušés, savó isyn nabango dro léskiro kher pe léskiro čhuibén, naúšto me na zrodava léskiro rat tumaré vastéstyr i na tradava tumen phuvjátyr?”

12I priphendiá Davído dynar'jénge, i zamardé len, i otčhingirde lénge vastá i ĥerá, i ublade len pašýl venderi (prudo) dro Xievróno. A šeró Jevosfiejoskiro lyné i garadé dre koplíca Avieniroskiri, dro Xievróno.

← Chapter 3 Jump to: Chapter 5 →