Song of Solomon 1

Romani Baltic Latin (Biblija - Pe Baltitko Romani čib (Romanes) 2019)

Jump to: Chapter 2 →

1Gilý giliendyr, saví sčhudia o Solomóno.

2Mek jov te čamudel man péskire ušténca; pal-dová so léskiro piramnipén (kamiben) isyn fedýr, syr mol (vino).

3Pal-dová so, syr kuč drab te khosen déla gudlý sung(aromáto); tyró lav isyn kuč drab te khosen, so čhuvélape angíl, paldavá patyvalé terné džuvliá otdena iló pal túte.

4Pritýrde man ke pe, i ame našasa túsa. Králi jandiá man dre péskire-kralitka komory (xaromy), sob (kaj) ame te javas ráda i zoralés te radynaspe; ame javása te ripiras tyró piramnipén (kamiben) butýr, syr mol. Nane dívo, so patyvalé čhaja otdena iló pal túte.

5Jerusalimóskire čhajale! Me som c'miano, ne me som šukarni džuvlý, me som syr Kidaroskire šátry, me som syr začhude (zaviesy) Solomonóskire.

6Na dykhén adiáke pe mánde, so me som kaljori, pal-dová so khamoro pekcia man. Miré-dákire čhavé xoliasyne pe mánde; jone čhudé man te rakhav vinagradýtko únta [(drakhin)] (sado), ne me na rakhcjom mirí vinagradýtko únta.

7Phen tu mánge, konés me kamám, kaj tu čaravesa péskire bakrengiri stády, kaj jone javéna te otkhinjon dro paš dyvés? Sóske mánge trej te čaravav pale tyré drogoné-malengire (drugengire) stády.

8Kóli tu na džinesas, naj gožedyr maškír džuvliende, džá pir bakréngire špery (sliady), i čarav péskire buznoren (kozloren) pašýl čhupnar'jengire šátry,

9Me priravnindjom (priparudjom) tut, mirí piramníje (kamly), miré naj drogedyr grasniasa dro Faraonóskiro maribnýtko vurdén.

10Tyré čhama (ščoki) isyn gožedyr mirikliendyr, Tyrí men isyn ĥožakirdy suvnakuné zandiror'jenca.

11Ame kerása túke šukár suvnakuný vierigori (podviazka) rupuvé jakhor'jenca.”

12Kiéli králi isyn beštó pal léskiro skamínd, miro nardo déla lačhé-sungakiro khandypen.

13Sýrby drógo bužoro mirostyr vaš mánge, miro piramnó (kamlo), kiéli jov isyn paštó ratý pašýl miré kolyna.

14Miro piramnó vaš mánge isyn sýrby randjori xnatyr (kipierostyr), saví luludjola (cvecinela), dre vinagradýtko únta [(drakhin)] Jengieda (En-Gieda).

15O, saví gožo-šukár tu san, mirí piramníje, – tyré jakhorja isyn syr golumbicate.

16O, savó gožo-šukár tu san, miro piráno, savó gudló i amaró čhuibén isyn adiáke-pac' syr vyčhudo zelenyben.

17Amaré kheréskire strehi isyn syr kiedrytko veš, i amaré-bergakire bel'ki (stropily) isyn syr kiparisoskire kaštá!

Jump to: Chapter 2 →