Song of Solomon 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1Pe miro čhuibén me rodyjom ratý kodolés, ke savó miro di prityrdela: me rodyjom les, ne me na lathjom (lastjom) les.

2Me uštava fedýr i obprastava fóro, vulícy (gásy) i štéty, kaj manušá kedenape; me javáva te rodav les, ke savó miro di prityrdela; me rodyjom les, ne me na lathjom (lastjom) les.

3Rakhibnaskire (stražy), savé psiréna pir fóro, lathné man – me phucjompe: “Ci dykhné tumé kodolés, ke savó miro di tyrdelape.”

4Nábut me gijom krig léndyr, kiéli me lathjom (lastjom) kodolés, ke savó me tyrdavape: me rikirdjom les i me na mekavas les, angíl, syr me lydžáva les dre miré-dákiro kher, i dre lákire kherítka komory (xaromy), kon bijandiá man.

5Zasovlahava tumen, Jerusalimóskire čhajale, gazelienca i feldytkone mirgenca (lanienca), sob (kaj) tumé te na džangaven, te na ĥazdén miro iló angíl, syr javéla lačhó léske.”

6“Kon adavá isyn, savó uštéla čhučé prahendyr, sýrby baró thuv ĥazdélape, savó isyn thuvliakirdo mirósa i gudlé smolasa, i kažnoné lačhé-sungakire drabenca tylgar'jendyr (kupcendyr).

7Dykhén! Ake, isyn Solomonóskire-kralítko čhuibén: bidaripnaskire šovdešá muršá isyn pašýl léste, jone isyn naj zoraledýr dro Izrailjo.

8Lénde sarénde isyn kurtála, jone isyn spiecy te marénpe; kažnoné manušéste isyn kurtála pašýl léskiri ĥerój, sob (kaj) te na darén ratý.

9Králi Solomóno kerdiá péske trono, so sčhuvelape.

10Jov kerdiá rupuvé stylbicy dro trono, léskiri phalia te čhuvél kuniá (lokotniki) isyn suvnakástyr, léskiro štéto te bešél isyn purpurostyr; Jerusalimóskire čhaja vykhude andrál davá trono péskire ilésa.

11Džán te dykhén, Sionóskire čhajale, ake, isyn králi Solomóno, dre kralítko stadyk (viánka), saví léskiri daj čhudiá pe šeró, dro dyvés, kiéli jov lyjá sovláh, dro dyvés, kiéli léskiro iló radyndiape.

← Chapter 2 Jump to: Chapter 4 →