Song of Solomon 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1Me som Šaronoskiro narcyso, me som lilija maškír doly.

2Syr lilija isyn maškír phusadýtka xrústy, adiáke-pac' isyn mirí piramni maškír patyvalé terné džuvliende.

3Syr phabelyn, saví isyn maškír vešytka kaštá (drevy), adiáke-pac' isyn miro piramnó maškír ternende. Mánge isyn pir iló te bešav dre lákiri zer (tien'), i lákire barjakirdé (plódy) isyn gudlé vaš miro muj.

4Jov jandiá man dro kher, savó sys pherdó moliása (vinosa), jov sýrby čhudiá sciago, so léske drógo som me.

5Podrikér man te na perav moliása (vinósa), neviakirén man phabénca, pal-dová so me nábut so na meráva piramnipnástyr (kamlypnastyr).

6Léskiro zérvo (liévo) vast isyn tel miro šeró, i léskiro čačó (pravo) vast oblela man.

7Me zasovlahava tumen, Jerusalimóskire čhajale, gazelienca ci feldakire mirgénca (siernenca), sob (kaj) tumé te na džangaven, te na ĥazdén rat angíl dová, syr javéla lačhó léske.

8Ake, miré piramnéskiri zan. Ĥáda, jov džála? Jov piriuhtela pir bérgi? Jov uhtela pir bérgicy.

9Miro drúgo (mal) isyn syr gazel', ci syr ternó šynguno (olienjo). Ake, jov isyn terdó pal vánta, Jov dykhéla pirdál feštry, Jov prodykhela pirdál sastruné ratnícy (stavni).

10Miro piramnó lyjá te rakirél i phendiá mánge: “Uštý, mirí piramníje, mirí šukarni, i jav javrí.

11Dykh ža! Ivant (zima) progijá (nakhtija), bryšýnd pirijaciá i nane butýr:

12luludiá sykadjona pe phuv, i čirikliá lyné te bagán, lákiro bagipen šunéla amarí phuv.

13Inžyritkone-kaštengire zelena phabá loljona, i vinagradýtko kaštoro luludjola i déla lačhé-sungakiro khandypen. Uštý, mirí piramníje, mirí šukarni, i jav ke me.

14Mirí golumbica isyn dre skalengire nišy, dre garadé štéty pir sámo krutyma, mánge te dykháv tyró muj, mánge te šunav tyrí zanori, pal-dová so tyrí zan (glos) isyn gudly, tyró mujoro isyn šukár.”

15Uhtylén lokhnien (lisicen), tykné lokhnor'jen, savé xasiakirena vinagradýtko bar; pal-dová so amaré vinagradýtka barja luludjona.

16Miro piramnó isyn miro, i me som léskiri. Jov čaravela (léskire-bakrengiri stada) maškír lilii,

17Angíl, syr dyviesjola, i zerjá (tieni) našéna, risjov, miro pirámnie: jav syr gazel', ci syr ternó šynguno maškír bérgi.

← Chapter 1 Jump to: Chapter 3 →