Song of Solomon 4

Romani Baltic Latin (Biblija - Pe Baltitko Romani čib (Romanes) 2019)

← Chapter 3 Jump to: Chapter 5 →

1O, saví šukarni tu san, mirí piramníje, o saví šukarni tu san; syr golumbicate tyré jakhá dykhéna tel krenco čhur (kosa); tyré balá isyn sýrby buznengiri stada, saví džála telé bergátyr Galaadoskirjatyr.

2Tyré dandá isyn dasavé parné syr občhindlé bakriá, savé ziainena, i savé javné moribnastyr, kažno léndyr janéla pir duj blizniatki (dujore), i nijékh nane jalovo (nakhabný) maškír lénde.

3Tyré uštá isyn syr jarko loló thavoro, i tyró muj isyn dasavo šukár. A tyré čhamá (ščoki), so isyn tel krenco čhur, isyn syr kuskicy granatytkone phabendyr.

4Tyrí men isyn syr Davidóskiro stýlbo, so kerdó te čhuvén sastyrá maribnýtka: odój ublade bar sastruné ščýty, syr isyn zoralypnaskire-muršeskire ščýty.

5Tyré kolyna isyn sýrby duj tyknore-blizniatki date-gazeliate, saví čaravela len maškír lilii.

6Angíl dová, syr javéla dyveseskiro ránko, i syr zerja (tieni) našéna krig, me džáva péske pe mirroskiri bérga, i pe gudlé-smolákiri (fimiamoskiri) bérgica.

7Saví šukarni tu san, mirí piramníje, i nisaví doš nane dre túte.

8Jav mánca Livanostyr, mirí terný, jav mánca Livanostyr; jav sygedýr telé Amanoskire vučipnástyr, Sieniroskire i Jermonoskire vučé šteténdyr, jav xaščéndyr/venténdyr (logovéndyr), kaj ščerá (lievy) dživéna, bergendyr, kaj isyn lieopardy.

9Tu zadivakirdian miro iló, mirí phen, mirí terný; tu zadivakirdian miro iló dykhibnasa tyré jakhéndyr, jekhe zandirorjasa tyré mirikliendyr.

10Syr šukár tyrí láska isyn, mirí phen, mirí terný! I pe kicý fedýr lačhé-sungakiro khandypen saré aromatytkone makhibnendyr.

11Tyré uštendyr, mirí terný, thadéla žužó avgín, avgín i thud isyn tel tyrí čib; i lačhí sung tyré idiendyr isyn sýrby lačhí sung Livanostyr.

12Mirí phen, mirí terný, isyn sýrby zaphandly únta (sado), sýrby pitomniko, so isyn pe klydyn, sýrby ĥanýng, so isyn pe čergenorí (piečat').

13Jone barjona syr luludiá dre raitko únta, kaj isyn granatytka phabelynia vykedyné phabenca i lačhé-sungakire xnasa i nardoskire randjorjasa.

14Odój isyn nardo i šafrano, ajero i karica, i saré xrústy gudlé smolasa, mirro i aloe, saré rangire aromatytkone makhibnenca.

15Fontano (folahár), dre únta džidé-panieskiri ĥanýng, i sygna rekicy Livanostyr.”

16“Džangadjov, paš-ratiakiri balvál, i jav, paš-dyvesýtko balvál! Phúrde pe mirí únta, sob (kaj) te rozdžanpe lákire aromatýtka sungá. Mek te javél miro piramnó dre léskiri únta (sado) i mek jov te xal gudlé phabá léskire.”

← Chapter 3 Jump to: Chapter 5 →