Song of Solomon 5

Romani Baltic Latin (Biblija - Pe Baltitko Romani čib (Romanes) 2019)

← Chapter 4 Jump to: Chapter 6 →

1“Me javdjom dre péskiri únta (sado), mirí phen, mirí terný; me skedyjom miro mirro miré pripravenca; me xajom péskiro avginytko soto miré avginesa; me pijom péskiri mol (vino) thudesa.” “Han, míre malóre, p'jen, i p'jen čalés, miré piramne [dróga míre manušále-ju.o.]!”

2“Me som suty, ne miro iló isyn na sutó. Ĥáda, isyn zan, miré piramnéskiri! Jov marela dro vudár: “Otphande mánge, mirí phen, mirí piramnoríje, mirí golumbica, mirí naj fededýr. Pal-dová so miro šeró isyn učhakirdo pahlyniasa (rosasa), miré krenca balá isyn ratitkoné sapanypnasa.

3Me zlyjom miro uribén kustykasa syr me saštý te urjavav pale les? Me mordjom péskire ĥerá, syr me saštý te meliakirav len?

4Miro piramnó čhudiá péskiro vast dre vudareskiri ščel'; i miro iló andrál mánde potyrdyjape ke jov.

5Me uštyjom te otphandav miré piramneske, i miré vastá sapaniné mirrósa, i miré angušta (pal'cy) jačné kindle mirrosa pe klydynéskiro vastoró.

6Me otphandjom miré piramneske; ne miro piramnó dyjape pale, jov gijá krig: miro di košelaspe javrí, kiéli jov rakirdiá, me rodyjom les, ne me na lathjom les; me khardjom les, ne jov na otphendiá mánge.

7Rakhibnaskire (stražy), savé obdžana fóro, lathné man; jone pekade man, jone dukhade man; rakhibnaskire pe foritko vánta lyné krig mándyr mirí dlengi cérga [saví rakhelas vánta-r.s.].

8Me zasovlahava tumen, Jerusalimóskire čhajale! Kóli tumé lathéna miré piramnes, so tumé phenéna léske? So Me meráva piramnipnástyr!”

9Sósa fedýr isyn tyró piramnó (kamlo) javire piramne manušéndyr, Tu, kon san naj šukaredyr maškír džuvliende? Sósa ž fedýr isyn tyró piramnó javire piramne manušéndyr, so tu adiáke zasovlahasa amen?

10Miro piramnó isyn parnó i lolé-čhamengiro (ščokengiro), jov isyn raj manúš maškír dešé tysjoncy manušénde,

11léskiro šeró isyn sýrby vykedyno suvnakái, léskire krenca balá kuninenape, jone isyn kalé syr korakoste (voronoste).

12Léskire jakhá isyn syr golumbicate, so isyn pašýl sygna rekicy, savé isyn syr morde dro thud, savé isyn zor i zoralés bešté.

13Léskire čhama isyn syr bétki (griady), kaj pripravy barjona, syr vučé betki gudlé-sungákire čar'jenca, léskire uštá isyn syr lilii, savéndyr thadéla thaduno mirro.

14Léskire vastá isyn syr suvnakuné desté, so isyn počhude xrizolitenca; léskiro per isyn ziaindlone slonoskire kokalostyr, savó isyn piričhudo sapfirenca.

15Léskire ĥerá isyn syr stýlby mramorostyr, so čhudé pe fundámiento vykedyné suvnakástyr; léskire-moskiri mina isyn sýrby Livanoskiro baripén, naj kučedyr, syr kiedry.

16Léskiro muj isyn naj gudledyr; čačó, jov isyn šukár pir saró. Ake, savó isyn miro piramnó, ĥáda, isyn miro mal, – tumé, Jerusalimóskire čhajale!

← Chapter 4 Jump to: Chapter 6 →