Deuteronomy 14

Romani Sinte 2024 (O Debleskro Lab 2024 (Sinte-Manouche))

← Chapter 13 Jump to: Chapter 15 →

1T'mer han i čave t'maro baro Deblestar. An ko tsiro, kay rovenn i mouleske, ma činenn t'maro mass leske! Oun ma činenn i balla pral t'mare yaka!

2T'mer han o baro Debleskre menshe. Yob hi t'maro Devel. T'men rodas lo vin dran i tsele themma ap i phoub, te venn i natsyona, hoy leske hi.

3Tou rhas či, hoy glan o baro Debleskre yaka pale-čiddo hi.

4Kalla hi i firhe, hoy nay rhan: Grumya, bakre, bouzya,

5tserfe oun vesheskre bouzya, divye bakre oun bouzya, antilope,

6oun hako firho, koles pre-phagede pire hi, tseles pre-phagedo hounte venn le, oun hoy o rhapen douy kope rhal. Kolen nay rhan.

7Mank kolende, kay o rhapen douy kope rhan, hi save, hoy hounte rhan t'mer gar: I khamela oun o shoshoy, oun o bergetikro shoshoy. Kolen hi kek pre-phagede pire. Pale-čiddo venn le t'menge.

8Oun o bales hounte rhan gar, ninna te hi les pre phagede pire. O balo rhal o rhapen gar douy kope. Pale-čiddo vell lo t'menge. O mass kek kal firhendar hounte rhan. Vitar gar taprenn len an, te hi le moulo.

9Kalla hi i firhe, hoy nay rhan t'mer kolendar, kay an o pani djivenn: Halauter, hoy len flosse oun shouppe hi, nay rhan.

10Halauter, hoy len kek flosse oun kek shouppe hi, ma rhan! Pale-čiddo venn le t'menge!

11Hi čirkle koy, kay nay rhan t'mer, oun vavar kay nay rhan gar. Kolla venn t'menge pale-čiddo.

12Kalla hi i čirkle, hoy t'mer nay rhan gar: i adlarya, kay rhan tikne bakre, karhya oun mače,

13vavar massengre čirkle,

15ninna i straussetikre karhya oun i moulengre čirkle, panyeskre meve oun o habichto oun hake čirkle dran leskri familja;

16oun o tikno ratsyakro čirklo, o panyeskro čirklo, hoy kharell cormorano, oun o baro ratsyakro čirklo;

17vavar ratsyakre čirkle oun i moulo-massengre čirkle;

18oun o storko oun hake mačengre čirkle; oun o vesheskro bashno oun i čirklengre kermuse.

19Oun i tsele tikne firhe, hoy pral i phoub djan, hoy len čirklengre moussya hi, venn t'menge pale-čiddo. T'mer rhan len gar!

20I tsele čirkle, hoy gar pale-čiddo hi, nay rhan t'mer.

21T'mer hounte rhan kek mass i firhestar, hoy moules trouyel čiddo hi. I vi-themares, kay djivell an t'maro foro, koles nay denn les, te rhal yob les. Ninna nay bikrenn les ap yekeste dran o vi-them. T'mer han menshe, kay hi o baro Debleske koy, kay t'maro Devel hi. Tou keress gar i bouzyakro ternepen an o thoud leskri datar.

22Hako bersh čivess tou o baro Debleske ap i rig o deshto kotar halauterestar, hoy ap tiri harhetikri phoub bares vas.

23An ko deshto kotar tiro djobestar, tiri molyatar oun tiro djetestar glan tiro baro Debleste ap koy platsa, hoy yob peske vin rodella, te vell lo kote an-mangedo. An leske ninna kol groumya, bakre oun bouzya, kay hi o phoureder lengre dayendar. Rha kote ko rhapen oun ko mass kal firhendar. Yaake bistreh gar, te djivess tiro baro Debleha tiro tselo djipen.

24Te čivell tiro baro Devel peskri barht ap toute, oun tout vell boud rhapen, oun koy platsa, hoy yob peske vin rodas, te vell yob kote an-mangedo, hi yaake dour krik toutar, te nay hidjreh gar ko deshto kotar kote,

25palle bike kova lauter, oun le kol love oun dja pash koy platsa, hoy tiro baro Devel peske vin rodas,

26oun gin touke halauter, hoy tiro dji kamell: groumya, bakre, mool oun vavar zorelo pipen, oder vavar koova, hoy tiro dji kamell, oun rha kote glan tiro baro Debleste! Oun ab barhtelo, tou oun tiri familya oun tire boudepangre,

27ninna i Levitarya, kay an tiro foro djivenn; kolen dess tou ninna tiro rhapastar. Yon lan o baro Deblestar kek them oun kek phoub, har tou lal.

28Hako triinto bersh less o tselo deshto kotar halauterestar, hoy tou dren anal an ko bersh, oun čivess les an tiro foro.

29Palle nay venn i Levitarya, kolen kek phoub hi, kay an tiro foro djivenn, ninna i vi-themarya, i čave, kolen kek dad bouder hi, oun i djouvya, kolengro rom meras, oun yon te rhan oun venn čales. Te krenn t'mer yaake, čivell t'maro baro Devel peskri barht ap halauter, hoy krenna.

← Chapter 13 Jump to: Chapter 15 →