Deuteronomy 26

Romani Sinte 2024 (O Debleskro Lab 2024 (Sinte-Manouche))

← Chapter 25 Jump to: Chapter 27 →

1An ko tsiro, kay val an ko them, hoy tiro baro Devel tout dell, te vell lo tiro, oun tou djiveh koy,

2palle less tou ko ersto djob, hoy ap tiro phoub bares vas. Oun tou čivess les an i korba oun aness les pash koy platsa, kay yob kamell, te vell lo kote an-mangedo.

3Oun tou djas pash o rashayeste, kay an kol divessa koy hi, oun peness ap leste: “Me moukau kava dives tiro baro Debles te djinell, te vom an ko them, kolestar o baro Devel pes sovel das glan mare phourende, te dell lo les mende.”

4Oun ko rashay lell koy korba dran tiro vast oun čivell lat glan i rhačepaskri, kay o baro Debleske rhapen oun firhe rhačedo venna.

5Oun tou peness glan o baro Debleste, kay tiro Devel hi: “Miro phouro dad his i Aramari, koles kek them his, kay lo khere his. Oun yob djas peskri familyah an o them Egiptia, oun his kote i vi-themari. Leskre menshe his gar boudeder har i vast pherdo, oun kote van le boud oun boudeder, i bari zoreli natsyona.

6Oun i Egiptarya kran menge čilačepen oun rikran men tele. Mer hounte boudran lenge tel dava.

7Kote dam mer gole ap o baro Debleste, kay o Devel mare phourendar his. Oun o baro Devel shounas mari gole, oun dikas mari bibarht oun mari daar oun maro pharo djipen.

8Oun o baro Devel kras baro oun zorelo koova, hoy kek vavar nay krell, oun anas bari traash ap i Egiptarya, oun anas men peskro zorelo vasteha dran o them Egiptia vin.

9Oun yob anas men kay oun das men kava them, hoy yaake lačo hi te nashell thoud oun gvin koy.

10Kanna anau ko ersto djob, hoy bares vas an ko them, hoy o baro Devel man das.” Palle čivess tou les glan tiro baro Debleste tele, oun vitsress tout tele glan leste, te mangess les an.

11Ab barhtelo pral ko tselo lačo koova, hoy yob tout oun tiri familya das. De ninna kolestar kol Levitaryen oun kol vi-themaryen, kay mank t'mende hi.

12Hako triinto bersh aness tou o deshto kotar khetne halauterestar, hoy ap tiri phoub bares vas. Oun tou dess les i Levitaryen oun i vi-themaryen oun kol čaven, kolen kek dad bouder hi, oun kol romyen, kolengro rom meras, te vell yon ninna doha rhapaske an tiro foro.

13Oun tou peness glan o baro Debleste, kay tiro Devel hi: “Me anom mandar kova, hoy tiro hi, oun dom les o Levitaryen oun o vi-themaryen oun kol čaven, kolen kek dad bouder hi oun kol romyen, kolengro rom meras. Pal halauter krom me har tou penal. Oun me rikrom tire laba oun bistrom kek lendar.

14Me shounom ap toute, miro baro Debleste oun krom lauter yaake, har tou mange penal: An ko tsiro, kay rovom i mouleske, rhom kek rhapen, hoy tout dino his. Oun taprom či kolestar, har pale-čiddo homs. Oun dom či kolestar i moulenge.

15Dik tele ap mende dran tiro bolepaskro kheer! Oun čip tiri barht ap mende, tire menshende Israel, oun ap ko them, hoy tou men dal, yaake har tou tout glan mare phourende sovel dal, te deh men i them, hoy yaake lačo hi, te nashell thoud oun gvin koy dren.”

16O Mose penas: “Israel, kava dives penell tiro baro Devel touke, te kress halauter, hoy yob toutar kamell, oun djivess pal kol tsele čačepaskre laba. Rike len tiro tselo djiyeha oun tiri tseli zoryah.

17Kava dives penas o baro Devel touke, te hi lo tiro Devel, oun kamell, te djas tou ap leskre dromma oun kress, hoy lo toutar kamell, oun djivess pal leskre laba oun leskro čačepen, oun shouness ap leste.

18Kava dives penan t'mer glan leste: Ava, mer kamah leskre menshe te vell, yaake har yob penas, oun kamah leskre tsele laba te rikrell.

19Oun yob krell, te veh tou o pralstouno pral i tsele vavar natsyone, hoy yob kras, te vess hadedo, sharedo oun raylo. T'mer venn o baro Debleskre menshe, kay leske kokres koy hi, oun kek vavareske har lengro Debleske. Kova penas yob.”

← Chapter 25 Jump to: Chapter 27 →