Deuteronomy 30

Romani Sinte 2024 (O Debleskro Lab 2024 (Sinte-Manouche))

← Chapter 29 Jump to: Chapter 31 →

1Kanna penom t'menge kal tsele laba, te nay rodenn vin: Kamenn t'mer, te vell o Debleskri barht pral t'mende? Kamenn t'mer te vell leskro praasepen pral t'mende? Te vell koy bibarht pral t'mende, oun t'mer djivenn an i vavar themma, kay t'maro baro Devel t'men tradas, venn t'menge kal laba an o dji.

2Te djan t'mer palle pale pash t'maro baro Debleste, t'mer oun t'mare čave, oun shounenn ap leste t'maro tselo djiyestar oun t'mari tseli zoryah an halauter, hoy me t'menge kava dives penom,

3palle krell t'maro baro Devel peskro dji t'menge pre oun lell t'men dran o pandepen vin. Oun yob anell t'men pale khetne oun pale pale dran i tsele themma, kay lo t'men tradas.

4Te vans t'mendar yaake dour krik tradedo bis an o palstouno them ap kay phoub, ninna kotar anell t'men t'maro baro Devel khetne oun pale pale.

5T'maro baro Devel anell t'men an ko them, koles t'mare phourenge his. Oun t'mer lenn les t'menge dren. Oun yob dell t'men boud bravlepen, oun krell t'mendar boudeder har t'mare phoure his.

6T'maro baro Devel dell t'men djia, hoy shounenn oun krenn, hoy lo t'mendar kamell. T'men oun kolen, kay t'mendar venna, dell lo save djia, yaake te kamenn t'mer t'maro baro Debles o tselo djiyestar oun t'mari tseli zoryah. Oun t'mer ačenn djido.

7Koy tseli bibarht čivell t'maro baro Devel ap kolende, kay rikran t'men tele, oun his rhoyedo ap t'mende, oun lan t'men palla.

8Oun t'mer djan pale ap o baro Debleskro drom oun shounenn ap leste oun rikrenn t'men ap kol tsele laba, hoy t'menge kava dives penom.

9T'maro baro Devel dell t'men barht an halauter, hoy t'mer krenn; t'mer lenn boud čave, boud firhe oun boud djob ap t'mari harhetikri phoub, te djal t'menge lačeder har mishto. Leske hi shoukar te krell lo t'menge lačepen, yaake har leske shoukar his, te kras lo lačepen ap t'mare phourende.

10Shounenn ap leste, djivenn pal leskre laba, hoy an kava čačepaskro liil činlo hi, oun krenn, hoy yob t'mendar kamell! T'mer hounte venn pale pash leste t'maro tselo djiyestar oun t'mari tseli zoryah.

11Kava činlo lab, hoy t'menge kava dives penom, te rikrenn t'men ap leste, hi gar yaake pharo oun yaake dour krik, te nay hayvenn oun rikrenn les gar.

12Kava lab hi gar an o bolepen, yaake te nay penans t'mer: “Koon djal menge an o bolepen pre oun anell les menge, te nay shounas les oun djivas koy pal?”

13Kava lab hi gar ap i vavar rig o baro panyestar, yaake te nay penans t'mer: “Koon djal menge ap i vavar rig o baro panyestar oun anell les menge, yaake te nay shounas mer les oun djivas koy pal?”

14Na-a, kava lab hi pash t'mende, an t'mare mouya oun an t'mare djia, te nay djivenn koy pal.

15Dikenn, me moukau t'men kava dives vin te rodell mank o lačepen oun o čilačepen, mank o djipen oun o merepen.

16Te krenn t'mer, hoy me t'menge kava dives penom, oun kamenn t'maro baro Debles oun djan ap leskre dromma, oun djivenn pal leskre laba oun krenn, hoy yob t'mendar kamell oun rikrenn t'men ap leskre čačepaskre laba, palle ačenn t'mer djido. Oun t'mendar venn boud menshe. Oun t'maro baro Devel čivell peskri barht ap t'mende an o them, kay dren djan, te lenn les t'menge dren.

17Te krenn t'mer gar, hoy t'maro baro Devel t'mendar kamell, oun shounenn gar ap leskre laba, oun moukenn t'men tele te anell leskro dromestar, oun mangenn vavar deblen an,

18palle penau me t'menge kava dives: T'mer djivenn gar i rah tsiro an ko them vergel o pani Yordan, an koleste t'mer djan, te lenn les t'menge dren.

19Kava dives dau gole ap o bolepen oun ap i phoub, te dikenn le: O djipen oun o merepen čivom me glan t'mende, o Debleskri barht oun i bibarht. Yaake rodenn t'menge o djipen vin, te ačenn djido, t'mer oun kolla, kay t'mendar venna.

20Kamenn t'maro baro Debles! Shounenn ap leste, oun rikrenn t'men ap leste! Kova hi t'maro djipen. Oun yaake nay djivenn boud bersha an ko them, kolestar o baro Devel pes sovel das glan t'mare phourende, glan o Abraham, o Isaak oun o Yakob, te dell lo les lende.

← Chapter 29 Jump to: Chapter 31 →