Deuteronomy 19

Romani Sinte 2024 (O Debleskro Lab 2024 (Sinte-Manouche))

← Chapter 18 Jump to: Chapter 20 →

1Ap ko tsiro, kay tradas t'maro baro Devel kol vavar menshen vin dran ko them, hoy lo t'mende dell, oun t'mer lan ko them dren, oun djivenn an lengre forya oun an lengre khera, palle hounte rodenn t'menge triin forya vin, kay nay djan kolla dren, kay naashepangre hi.

3Krenn ko tselo themestar triin kotya, an hako kotar yek savo foro, yaake te hi ko drom koy gar dour koleske, kay yekes moulo das oun hounte nashell peske.

4Savo foro hi koleske, kay das yekes moulo oun kamas kova gar, oun les his kek rholi ap leste. Kova nay nashell koy, te ačell lo djido.

5Kova nay vas yaake: Douy morsha djan an o veesh, te denn le kasht tele, oun ko yek hadell peskro vast, an koya i tover hi, oun lell vin, te dell an o kasht, oun o saster phagell tele oun djal an koleste, kay pashel hi, oun kova merella. Savo nay nashell an sau foro oun ačell djido.

6Te vals an o tselo them kokres yek sau foro, nay vals ko drom dour koleske, kay hounte nashell peske kote. Oun kova, kay kamell o rat o moulestar pale te anell ap o shero kolestar, kay maras les, oun lell les pherdi rholi palla, kova nay lals les dren oun dals les moulo – koles, kay kek doosh ap leste hi, kolake yob hounte merals. Yob his glan kova gar rhoyedo ap o vavareste.

7Doleske penau me t'menge, te rodenn triin forya vin.

8Te krenn t'mer halauter, hoy t'menge kava dives penau, te hounte krenn, te kamenn t'maro baro Debles o tselo djiyeha oun djan ap leskre dromma, palle krell t'maro baro Devel t'maro them bareder, yaake har yob pes glan t'mare phourende sovel das. Ap ko tsiro, kay das lo t'men o tselo them, palle rodenn t'menge triin vavar forya vin!

10Yaake hi t'men doha forya kay nay nashell yek dren. Oun yaake krenn t'mer, te vell an t'maro them, hoy t'maro baro Devel t'menge dell, kek mensho maredo, ap koleste kek doosh hi. Te vals savo mensho maredo, anans bari doosh ap t'mende.

11Hi vavarčandes yekeha, kay his rhoyedo ap yekeste oun khatrell pes, oun dell yak te taprell lo les, oun djal ap leste pre oun dell les moulo. Te nashell savo mensho an sau foro,

12palle hounte bičrenn i phoureder dran leskro foro morshen koy, te lenn le les khere, oun denn les an i vasta kolestar, kay anell o rat ko moulestar pale ap o koleskro shero, kay das les moulo.

13Yob te khaytell t'men gar! Savo marepaskro hounte merell, te djal t'menge mishto an Israel. Yob maras yekes, ap koleste kek doosh his.

14An ko tsiro, kay djivenn an ko them, hoy t'maro baro Devel t'men dell, te lenn les t'menge dren, palle hounte čivess gar kol barra ap i rig, hoy sikrenn har baro hi ko kotar them kolestar, kay langs toute djivell. Kolla his tire phoure, kay čivan kol barra koy.

15Te vell i čilačo koova glan i čačepangre anlo, hi gar doha, te dikas kokres yek morsh kova. Na-a douy te triin hounte penenn, te dikan le koles koy pashel, har lo kava koova kras. Palle nay denn le les i phagi.

16Te anell yek rhorhepah čomone ap i vavareste pre,

17palle venn kol douy, kolen čingepen pentsa hi, pash o baro Debleskro kheer, glan i rashayende oun glan i čačepangre morshende, kolla an kol divessa koy hi.

18Oun kol čačepangre morsha hounte rodenn mishto palla, hoy čačo hi. Te hatsenn le, te hi kova i rhorheno, hoy rhorhepen ap peskro phraleste pre anas,

19palle krenn leha kova, hoy kamas yob peskro phraleha te krell. Yaake lenn t'mer o čilačepen mashkral t'mende krik.

20Oun halauter an Israel hounte shounenn, har ko rhorheno peskri phagi las, te darenn le oun krenn bouder gar savo koova mashkral t'mende.

21Ko rhorheno hounte khaytell t'men gar! Krenn yaake: Yek djipen i djipaske, yek yak i yakeske, yek dand i dandeske, yek vast i vasteske, yek piro i pireske!

← Chapter 18 Jump to: Chapter 20 →