Deuteronomy 21

Romani Sinte 2024 (O Debleskro Lab 2024 (Sinte-Manouche))

← Chapter 20 Jump to: Chapter 22 →

1Te vell i moulo mensho vin glan o foro čiddo hatslo an o them, hoy t'maro baro Devel t'men dell, te lenn t'mer les dren, oun kek djinell, koon les moulo das,

2palle djan i phoureder oun i čačepangre morsha vin pash koy platsa, kay lo čiddo hi, oun dikenn palla, har dour hi bis pash kol forya, hoy kote čiddo hi.

3Oun i phoureder dran ko foro, hoy o glanstouno pash ko mouleste tardo hi, kolla lenn i terni groumni, hoy boudras gomme gar ap i harhetikri phoub,

4oun anenn lat tele an i telstouno them, kay i pani nashell, oun hoy kek harhetikri phoub hi, oun kote phagenn le koy terni groumyake i meen.

5Palle stakrenn i rashaya dran o kheer Levi glan. Kolen rodas t'maro baro Devel vin, te krenn le leskri boudi, oun te rakrenn le leskri barht vin pral i menshende. Oun an i čingepen oun pal i marepen rakrenn le o čačepen vin.

6Oun kol tsele phoureder dran ko foro, hoy o glanstouno tardo hi pash ko mouleste, kolla thovenn pengre vasta panyeha tele pral koy mouli terni groumni.

7Oun yon hounte penenn: “Mer dran kava foro, mer dam gar ko menshes moulo, oun mare yaka dikan gar, koon kova kras.

8Baro Devel, mangah tout, le kay doosh mendar, tire menshendar Israel, kolen tou dran o pandepen vin lal. Ma dik ap mende, har te vams mer kolla, kay maram i menshes, ap koleste kek doosh čiddo hi.” Palle lell o baro Devel koy doosh lendar krik.

9Yaake krenn t'mer, hoy mishto hi glan o baro Debleskre yaka, oun čivenn ko čilačepen krik mashkral t'mende. Oun yob dikell gar ap t'mende, har te vans t'mer, kay dan koles moulo.

10Te djan t'mer an o kourepen, oun t'maro baro Devel dell kolen, kay kourenn pen t'mentsa an t'maro vast, yaake te anenn t'mer lendar pandlen krik,

11oun yek t'mendar dikell i shoukar djouvel mank kol pandlende, oun kamell lat oun kamell te romedinerell lo lat,

12palle nay anell lo lat an peskro kheer. Kote hounte činell li peskre shereskre bal oun peskre naya.

13Oun yoy rivell peskre ripya vin, hoy ap late his, har li pandli vas. Oun yoy ačell an leskro kheer oun rovell i tselo čon pral peskro dad oun peskri day. Pal ko tsiro nay djal ko morsh pash late, te romedinerell lo lat.

14Te vell i tsiro, kay kamell lo lat bouder gar, hounte moukell lo lat te djal, kay li kamell. Yek koova hounte krell yob gar: Yob nay bikrell lat gar lovenge, oun nay rikrell lat gar, te vell li leskri boudepaskretsa! Yoy his leskri romni.

15Te hi i morshes douy romya, oun yob kamell koy yek boudeder har koy vavar, oun hakeni las lestar yek morsh čavo, oun o phoureder morsh čavo hi kolatar, kolat yob gar kamell,

16ap ko dives, kay kamell ko morsh peskro bravlepen peskre čavende te dell, nay dell lo gar koleste boudeder, kay hi kolatar, hoy kamas lo, har te vals yob o phoureder.

17Na-a, yob hounte dell ko vavares douy kope yaake boud, yob hi o phoureder, ninna te his lo koy romyatar, kolat kamell lo gar. Yob vas glanstounes boldo oun leske hi o čačepen, te lell lo, hoy o phoureder lell.

18Te hi i romes i morsh čavo, kay hi bipandlo, oun krell halauter pal peskro shero oun shounell gar ap peskro dadeste oun peskri date, ninna te čingrenn le ap leste oun denn les dava,

19palle hounte anenn o dad oun i day les pash i phourende an ko foro ap i platsa, kay venn le khetne.

20Oun penenn ap lende: “Kava hi maro morsh čavo. Yob hi bipandlo, oun krell halauter pal peskro shero, oun shounell gar ap mende. Yob hi i pipaskro oun i rhapaskro.”

21Oun i tsele morsha dran ko foro hounte vitsrenn barra ap leste, bis te hi lo moulo. Yaake vitsrenn t'mer o čilačepen dran t'mende vin. Oun i tsele Israelitarya hounte shounenn kolestar oun darenn.

22Te kras yek i čilačo koova, koleske yob moulo dino hounte vell, oun yob vas maredo oun ap i kasht pre pandlo,

23palle ačell ko moulo gar pral i rat ap ko kashteste. Na-a, yob hounte vell paskedo ap ko emligo dives, te vell ko them gar pale-čiddo, hoy t'maro baro Devel t'men dell. Pash leste hi kova praasedo, kay hi pre-pandlo ap i kasht.

← Chapter 20 Jump to: Chapter 22 →