Deuteronomy 22

Romani Sinte 2024 (O Debleskro Lab 2024 (Sinte-Manouche))

← Chapter 21 Jump to: Chapter 23 →

1Te nashrell pes i groumni oder i bakro, hoy i vavar Israelitares hi, oun tou dikeh les, palle vess leske ap i rig oun aness les tiro phraleske pale.

2Te djivell lo dour toutar krik, oun tou prindjreh les ninna gar, palle less ko firhes an tiro kheer pre, te ačell lo pash toute, yaake rah bis te tiro phraal vella oun les rodell. Oun palle de les leste pale.

3Oun yaake kress tou ninna, te nashras lo peskri bourika, peskre koola oun vavar koova, oun tou hatsal les. Tou nay tserdeh tout kote gar vin.

4Te dikeh tou, har peras i bourika ap o drom, ninna i groumni, hoy tiro phraleske hi, palle ab late ap i rig oun hade lat pale pre!

5I djouvel rivell kek morshengre koola an. Oun i morsh rivell kek djouvyengre koola an. Koon sau koova krell, kova krell hoy djoungeles hi glan t'maro baro Debleskre yaka.

6Te hatseh tou i čirklengro kheer ap i rouk oder ap i phoub, oun i day hi beshdo ap i čave oder ap i yare, palle less tou gar i day khetne i čaventsa.

7I čaven nay leh, te kameh. I dat moukess te djal, te djal touke mishto oun te djivess i rah djipen.

8Te kreh tou touke i nevo kheer, pale čivess i rikepen troul i dacha, te perell kek tele oun tout hi doosh ap leskro merepen.

9Ap tiro molyengro them čivess tou gar drake an i phoub oun ninna djob mashkral lende, te vell gar halauter o Debleske, hoy touke bares vas, o djob oun i mool.

10Tou boudress gar ap i harhetikri phoub i morsh groumyah khetne i bourikah, te rissrenn le i phoub trouyel.

11Tou rivess gar koola an, hoy dran douy thaba kerdo hi: dran bakrengro bal khetne sido layntikre thabentsa.

12Ap tiri baya sivess khetne pandle dorya ap kol star rigya.

13Te romedinerell i morsh i čat, oun pal i tsiro kamell lo lat bouder gar,

14oun yob anell i djounglepen ap late pre oun penell: “Kay čat romedinerom, oun har pash late dren djom, hatsom vin, te his lat i vavarestar an-tapedo”,

15palle djal o dad oun i day koy terni čatar ap o foreskri platsa oun lenn koy plarhta pentsa, hoy sikrell, te his koy čay kek morshestar an-tapedo. Oun koy plarhta sikrenn le i phourende koy.

16Oun o dad koy terni čatar penell ap lende: “Me dom miri čat kava morshes te romedinerell lo lat. Oun kanna kamell lo lat bouder gar,

17oun anell čilačo rakepen ap late pre oun penell: Me hatsom, te hi li i vavarestar an-tapedo. Oun kate hi kay plarhta, hoy sikrell, te tapras kek vavar morsh lat glan leste an.”

18Oun kol phoureder ko forestar hounte lenn ko romes, oun denn les dava,

19oun penenn leske, te hounte dell lo sheel roupene beme lakro dadeste. Kova hi leskri phagi. Yob anas i čilačo rakepen pre ap i terni čate an Israel. Yob hounte rikrell lat, oun yob nay moukell lat gar an peskro tselo djipen.

20Te his kova o čačepen, te vas koy čay i vavarestar an-tapedo,

21palle hounte vell li vin anlo glan o kheer lakro dadestar. Oun i morsha dran ko foro vitsrenn barra ap late, bis te mouli hi li. Yoy kras i vi-ladjedo koova mank i Israelitarya, har loubras li trouyel an peskro dadeskro kheer. Yaake čivenn t'mer o čilačepen mank t'mende vin.

22Te hatsell yek i morshes, kay hi čiddo pash i djouvel, koya i vavareskri romni hi, palle hounte merenn kol douy: ko morsh, kay pash late čiddo his, oun koy djouvel. Yaake čivenn t'mer o čilačepen dran Israel vin.

23Te hi i čay, kolat kek morsh gomme an-tapras, oun lat hi i pirno, oun i vavar morsh hatsell lat an o foro, oun čivell pes pash late,

24palle lenn kol douyen oun anenn len vin glan o foro, oun vitsrenn barra ap lende, bis te hi le moulo: Koy čay, kay gar gole das, ninna te his li an o foro, kay nay vals li shounlo. Oun ko morshes, kay ladj ap i pirnyate i vavarestar anas. Yaake čivenn t'mer o čilačepen mank t'mende vin.

25Te hatsell ko morsh i čat vin ap o them, oun koy čat hi i pirno, oun ko vavar morsh taprell lat oun čivell pes pash late, palle hounte merell ko morsh kokres, kay pes pash late čivas.

26Koy čake krenn či! Lat hi kek doosh, kolake yoy hounte merell. Kava koova hi yaake, har te djals yek morsh ap i vavareste pre, oun dals les moulo.

27Yob hatsas koy terni čat vin ap o them. Oun koy čay, kolat i pirno his, das gole, oun kek his koy, kay ap lakri rig vas.

28Te hatsell i morsh i terni čat, kolat kek pirno hi, oun taprell lat, oun čivell pes pash late, oun yon venn hatslo,

29palle hounte dell ko morsh, kay pash late čiddo his, lakro dadeste i paash--sheel roupene beme, doleske kay yob ladj ap late anas. Oun yoy vell leskri romni. Oun yob nay moukell lat gar peskro tselo djipen.

← Chapter 21 Jump to: Chapter 23 →