Joshua 20

Sindhi Bible (Muslim) (مقدس ڪلام توريت، زبور ۽ نبين جون ٻيو لکتون ۽ انجيل شريف)

← Chapter 19 Jump to: Chapter 21 →

1پوءِ خداوند يشوع کي فرمايو تہ

2”بني اسرائيل کي چئُہ تہ ’جن پناهہ جي شهرن بابت مون موسيٰ جي معرفت اوهان کي چيو هو سي مقرر ڪريو.

3اهو انهيءَ لاءِ تہ جيڪو اتفاق سان يا بناارادي ڪنهن کي ماري وجھي، سو اوڏانهن ڀڄي وڃي خون جي بدلي وٺڻ واري کان پناهہ ۾ رهي.

4جڏهن هو انهن شهرن مان ڪنهن هڪڙي ڏانهن ڀڄي وڃي تڏهن شهر جي ٻاهرين دررازي تي بيهي انهيءَ شهر جي اڳواڻن کي پنهنجو احوال ٻڌائي. پوءِ هو انهيءَ کي شهر اندر وٺي وڃن ۽ اتي رهڻ لاءِ کيس هڪڙي جاءِ ڏين.

5جيڪڏهن خون جي بدلي وٺڻ وارو سندس پيڇو ڪري اچي اتي پهچي تہ شهر جا ماڻهو خونيءَ کي انهيءَ جي حوالي نہ ڪن، ڇاڪاڻ تہ هن اهو خون بناارادي ڪيو هو ۽ مقتول سان اڳ ۾ سندس ڪابہ دشمني ڪانہ هئي.

6پوءِ هو تيستائين انهيءَ شهر ۾ رهي جيستائين هن جي کُلي عدالت نہ ٿئي ۽ هو بي‌ڏوهي ثابت نہ ٿئي. تنهن بعد هو انهيءَ شهر ۾ ئي رهي، جيستائين انهيءَ وقت وارو سردار ڪاهن نہ مري. ان کان پوءِ هو ڀلي پنهنجي گھر انهيءَ شهر ڏانهن موٽي وڃي جتان هو ڀڄي نڪتو هو.‘“

7سو هنن اردن درياءَ جي اولهہ طرف هي پناهہ جا شهر مقرر ڪيا: نفتاليءَ واري جابلو علائقي جي گليل واري حصي ۾ قادس شهر، افرائيم جي جابلو علائقي ۾ سڪم شهر، يهوداہ جي جابلو علائقي ۾ قريت‌اربع يعني حبرون شهر.

8اردن درياءَ جي اوڀر طرف يريحو شهر جي اوڀر واري بياباني ميدان ۾ روبن جي علائقي ۾ بصر شهر، جد قبيلي واري علائقي جِلعاد ۾ رامہ شهر، منسيءَ قبيلي واري علائقي بسن ۾ جولان شهر.

9هي آهن اُهي پناهہ جا شهر، جيڪي بني اسرائيل ۽ منجھن رهندڙ ڌارين لاءِ مقرر ڪيا ويا. اهو انهيءَ لاءِ تہ جيڪو ڪنهن ماڻهوءَ کي اتفاق سان ماري وجھي سو اوڏانهن ڀڄي وڃي خون جي بدلي وٺڻ واري کان پناهہ ۾ رهي ۽ تيستائين کيس نہ ماريو وڃي، جيستائين سندس کُلي عدالت نہ ٿئي.

← Chapter 19 Jump to: Chapter 21 →