1 Corinthians 1

Shan

Jump to: Chapter 2 →

1ၵဝ် ပေႃးလူႉ ဢၼ်လႆႈၶၢမ်ႇတၢင်းဢၼ်ၶၢၼ်းဝႆႉၼႂ်းဢရႃႇတမၢၼ်ႇၸဝ်ႈၵွပ်ႈပိူဝ်ႈဢလူဝ်ႇၽြႃးပဵၼ်ၸဝ်ႈဢိၵ်ႇတင်း ၼွင်ႉႁဝ်း သုတ်ႉသိၼ်ႇ ၼႆႉ၊-

2ပၼ်ငိၼ်းၵႂႃႇတီႈၸိူဝ်းၸဝ်ႈၽြႃးပဵၼ်ၸဝ်ႈဢၼ်မီးၼႂ်းဝဵင်း ၵေႃးရိၼ်ႇထူႉ ၊ ဢၼ်ဝႃႈၶဝ်ၸိူဝ်းဢၼ်ၵၢင်းလွတ်ႈတင်းဢပႅတ်ႈ ၵွပ်ႈပိူဝ်ႈ ယေႇသူႉၶရိၸ်ႈ လႄႈလႆႈၶၢမ်ႇတၢင်းဢၼ်ၶၢၼ်းဝႆႉ ၼႂ်းဢရႃႇၵူၼ်းမူတ်းၸၢင်ႇတင်းလၢႆ ဢိၵ်ႇတင်းၶဝ်ၸိူဝ်းဢၼ် ႁဵတ်းသူးတွင်းပထၼႃႇၵႃႈတီႈၼႃႇမႃႉၸိုဝ်ႈသဵင်ၸဝ်ႈႁဝ်း ယေႇသူႉ ၵူႈတီႈၵူႈလႅၼ် ၵႃႈမီးတင်းသဵင်ႈတင်းလူင်ဢေႃႈ။ ၸဝ်ႈၼၼ်ႉပဵၼ်ၸဝ်ႈႁဝ်းၵူၺ်းဢမ်ႇၸႂ်ႈ။ ၸဝ်ႈသူၵေႃႈပဵၼ်ဢေႃႈ။-

3ႁႂ်ႈသူႉၵျေးၸူးဢိၵ်ႇတင်းတၢင်းၼိမ်ဢၼ်ပဵၼ်မႃးၵႃႈတီႈ ၸဝ်ႈ ယေႇသူႉၶရိၸ်ႈ တင်းပေႃႈႁဝ်းၽြႃးပဵၼ်ၸဝ်ႈၼၼ်ႉ မီးၼိူဝ်သူသေၵမ်းလူၺ်ႈ။

4ၵဝ်ထွၵ်ႈလူၺ်ႈၵျေးၸူးဢၼ်ၽြႃးပဵၼ်ၸဝ်ႈ ပၼ်တီႈသူၼႂ်း ယေႇသူႉၶရိၸ်ႈ ၼၼ်ႉသေလႄႈ ယွင်ႈယေႃးၽြႃးပဵၼ်ၸဝ်ႈၵဝ် လူၺ်ႈလွင်ႈသူယူႇတႃႇသေႇဢမ်ႇထၢတ်ႇ၊-

5ၵွပ်ႈပိူဝ်ႈဢၼ်သူမၢၵ်ႈမီးပျေႉၸုမ်ႇတင်း တၢင်းလၢတ်ႈတၢင်းၸႃဢိၵ်ႇတင်းၺၢၼ်ႇၼႂ်းၵူႈၸိူဝ်ႉၵူႈပိူင် ၵွပ်ႈပိူဝ်ႈမၼ်းၸဝ်ႈၼၼ်ႉ၊-

6ၵႃႈၼင်ႇဢၼ်သၢၵ်ႈသေႇၸဝ်ႈၶရိၸ်ႈ လႆႈမီးတၢင်းဢၼ်တႄႇယူႇၼႂ်းသူ မိူဝ်ႈဢွၼ်ၼႆႉၼၼ်ႉဢေႃႈ။-

7ပိူဝ်ႈၼႆလႄႈ ၼႂ်းမိူဝ်ႈဢၼ် သူမုင်ႈထႃႈမွင်းထႃႈတၢင်းဢၼ်ၸဝ်ႈႁဝ်း ယေႇသူႉၶရိၸ်ႈ တၵ်းပေႃႇမႃးၼၼ်ႉလႄႈယူႇၼၼ်ႉၸိုင် သူယင်းဢမ်ႇလုတ်ႈဢမ်ႇယွမ်းသူႉၵျေးၸူးၸဝ်ႈသေၸိူဝ်ႉသေပိူင်လႄႈ လႆႈမီးတၢင်းဢၼ်ၸေးၸုမ်ႇယူႇဢေႃႈ။-

8ၼင်ႇႁိုဝ်သူတၵ်းၵၢင်းလွတ်ႈတင်းဢၶႂၢင်ႉတီႈတၵ်းတၢင်ႇဢပႅတ်ႈၼႂ်းဝၼ်းၸဝ်ႈႁဝ်း ယေႇသူႉၶရိၸ်ႈ ၼၼ်ႉၸိုင် မၼ်းၸဝ်ႈတၵ်းႁႂ်ႈသူမၼ်ႈၶိူင်ႇတေႃႇထိုင်ႁွတ်ႈတီႈသုတ်းတီႈၵွႆပုၼ်ႉဢေႃႈ။-

9ၽြႃးပဵၼ်ၸဝ်ႈဢၼ်ပၼ်ၵျေးၸူး တၢင်းဢၼ်သိူၵ်ႈသမ်ႇၵၼ်တင်းၸဝ်ႈႁဝ်း ယေႇသူႉၶရိၸ်ႈ တီႈသူၼၼ်ႉ ပျေႉၸုမ်ႇဝႆႉတင်းသဵတ်ႈၸႃႇဢေႃႈ။

10ပီႈၼွင်ႉၶဝ်ဢိူၺ်း၊ ၼင်ႇႁိုဝ်သူၵႃႈမီးတၵ်းလၢတ်ႈၵႂၢမ်းဢၼ်လဵဝ်ၵၼ်လႄႈ ၵေႃႉၼိုင်ႈလႄႈၵေႃႉၼိုင်ႈဢမ်ႇၽၢတ်ႇဢမ်ႇၽႄၵၼ်၊ ၸေးၸုမ်ႇၺီႇၽွမ်ႉတင်းၸႂ်သၽေႃးဢၼ်လဵဝ်ၵၼ်တင်းတၢင်းဢၼ်ႁၼ်ဢၼ်လဵဝ်ၵၼ်ယူႇၸိုင်ၵဝ်ဢိင်ၼႃႇမႃႉၸိုဝ်ႈသဵင်ၸဝ်ႈႁဝ်း ယေႇသူႉၶရိၸ်ႈ လႄႈ တိုၵ်းယူင်းတွင်းပၢၼ်ႇသူဢေႃႈ။-

11လွင်ႈမၼ်းၸမ်ႉ ပီႈၼွင်ႉၶဝ်ဢိူၺ်း၊ သူၵေႃႉၼိုင်ႈလႄႈၵေႃႉၼိုင်ႈယင်းဢမ်ႇထုၵ်ႇဢမ်ႇပေႃးၵၼ်လႄႈမီးတၢင်းဢၼ်ၽိတ်းၵၼ်ယူႇဝႃႈၼႆ၊ ၵူၼ်းႁိူၼ်းၵူၼ်းယေး ၶလေႃးဢေး ၵမ်ႈၽွင်ႈမွၵ်ႇလၢတ်ႈတီႈၵဝ်ဢေႃႈ။-

12ပိူဝ်ႈဢၼ်သူလၢတ်ႈႁင်းၽႂ်ႁင်းမၼ်းလႄႈဝႃႈ၊ ၵဝ်ပဵၼ်တပႄး ပေႃးလူႉ ဢေႃႈ။ ၵဝ်ပဵၼ်တပႄး ဢႃႇပေႃးလူႉ ဢေႃႈ။ ၵဝ်ပဵၼ်တပႄး ၵေႇၽႃႉ ဢေႃႈ။ ၵဝ်ပဵၼ်တပႄးၸဝ်ႈၶရိၸ်ႈဢေႃႈ၊ ဝႃႈၼင်ႇၼႆၼၼ်ႉယူႇလႄႈ ၵဝ်ၸင်ႇလႆႈလၢတ်ႈလႆႈဝႃႈတီႈသူဢေႃႈ။-

13ၸဝ်ႈၶရိၸ်ႈၼၼ်ႉမီးတၢင်းဢၼ်ၽၢတ်ႇၽႄၵၼ်ႁိုဝ်။ ပေႃးလူႉ ၶၢမ်ႇတၢင်းဢၼ်တွၵ်ႇဝႆႉၵႃႈတီႈသဝ်လၵ်းဝႃးၵၢပ်ႈၼၼ်ႉပုၼ်ႈသူႁိုဝ်။ ဢမ်ႇၼၼ်လႄႈ၊ သူလႆႈၶၢမ်ႇ ပပ်ႉတီႉၸမ်ႇ ၼႂ်းၼႃႇမႃႉၸိုဝ်ႈသဵင် ပေႃးလူႉ ယဝ်ႉႁိုဝ်။-

14လိူဝ်သေ ၵရီႉပူႉ တင်း ၵႃႇယူႉ ၼၼ်ႉ၊ ၼႂ်းသူပိူဝ်ႈဢၼ်ၵဝ်ဢမ်ႇပၼ် ပပ်ႉတီႉၸမ်ႇ တီႈၽူႈလႂ်လႄႈ ၵျေးၸူးၽြႃးပဵၼ်ၸဝ်ႈမီးဢေႃႈ။-

15ပိူဝ်ႈၼႆလႄႈလွင်ႈဢၼ်ၽူႈလႂ်တၵ်းလၢတ်ႈလႄႈဝႃႈ၊ ပေႃးလူႉ ပၼ် ပပ်ႉတီႉၸမ်ႇ ၼႂ်းၼႃႇမႃႉၸိုဝ်ႈသဵင်တူဝ်ၸဝ်ႈၵဝ်ႇဢေႃႈ၊ ဝႃႈၼင်ႇၼႆၼၼ်ႉဢမ်ႇမီး။-

16ၵႃႈတီႈၵူၼ်းႁိူၼ်းၵူၼ်းယေး သထေႇၽၢၼ်ႇ ၵေႃႈ ၵဝ်ပၼ် ပပ်ႉတီႉၸမ်ႇ ယဝ်ႉ။ လိူဝ်သေၼၼ်ႉ၊ ၵဝ်ပၼ် ပပ်ႉတီႉၸမ်ႇ တီႈၵူၼ်းတၢင်ႇၵေႃႉဝႃႈၼႆ၊ ၵဝ်ဢမ်ႇတွင်းဝႆႉ။

17ၸဝ်ႈၶရိၸ်ႈပွႆႇၸႂ်ႉၵဝ်ႁႂ်ႈလႆႈပၼ် ပပ်ႉတီႉၸမ်ႇ ဢမ်ႇၸႂ်ႈ။ မၼ်းၸဝ်ႈပွႆႇၸႂ်ႉၵဝ်ႁႂ်ႈလႆႈႁေႃးလၢတ်ႈတြႃးသတၢင်းသိူဝ်းပျေႃႇဢေႃႈ။ ၵူၺ်းၵႃႈၼင်ႇႁိုဝ်သဝ်လၵ်းဝႃးၵၢပ်ႈၸဝ်ႈၶရိၸ်ႈၼၼ်ႉ တၵ်းဢမ်ႇလႆႈပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ၸိုင်၊ မၼ်းၸဝ်ႈယင်းဢမ်ႇပၼ်ဢၶႂၢင်ႉပိင်ႇၺႃႇၵႃႈတီႈသူပ်းလႄႈယူႇဢေႃႈ။

18လွင်ႈမၼ်းၸမ်ႉ တြႃးသဝ်လၵ်းဝႃးၵၢပ်ႈၼႆႉ ပဵၼ်တြႃးဢၼ်မိူၵ်ႈတီႈၶဝ်ၸိူဝ်းဢၼ်ႁွတ်ႈထိုင် တၢင်းဢၼ်သုမ်းဢၼ်ၸွမ်းၼၼ်ႉဢေႃႈ။ တီႈႁဝ်းၸိူဝ်းဢၼ်ႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼႆႉၸမ်ႉ၊ တြႃးၼၼ်ႉပဵၼ်တၼ်းၶူဝ်းၽြႃးပဵၼ်ၸဝ်ႈဢေႃႈ။-

19ၵျၢမ်းလိၵ်ႈမီးမႃးလႄႈဝႃႈၸမ်ႉ၊ ၵဝ်တၵ်းယႃႉပႅတ်ႈ ပိင်ႇၺႃႇၶဝ်ၸိူဝ်းဢၼ်မီးပိင်ႇၺႃႇၼၼ်ႉဢေႃႈ။ ၺၢၼ်ႇၶဝ်ၸိူဝ်းဢၼ်မီးၺၢၼ်ႇၼၼ်ႉၵေႃႈ ၵဝ်တၵ်းပႄႇပႅတ်ႈဢေႃႈ၊ ဝႃႈၼင်ႇၼႆဢေႃႈ။

20ၵေႃႉဢၼ်မီးပိင်ႇၺႃႇၸမ်ႉ၊ မီးၵႃႈလႂ်။ သြႃႇဢၼ်ထုတ်ႇၵျၢမ်းၸမ်ႉ၊ မီးၵႃႈလႂ်။ သြႃႇဢၼ်တိူင်ႇပၢင်ႇလၢတ်ႈၸႃလွင်ႈပျၢတ်ႈသၼႃႇၸမ်ႉ၊ မီးၵႃႈလႂ်။ ၽြႃးပဵၼ်ၸဝ်ႈ ႁႂ်ႈပိင်ႇၺႃႇလေႃးၵီႇၼႆႉမိူၵ်ႈဢမ်ႇၸႂ်ႈႁိုဝ်။-

21ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ မႅၼ်ႈၼင်ႇဢၼ်ပိင်ႇၺႃႇၽြႃးပဵၼ်ၸဝ်ႈၸီႇယၢင်ႇဝႆႉၼၼ်ႉ၊ မိူဝ်ႈဢၼ်ၵူၼ်းလေႃးၵီႇတင်းလၢႆၸွမ်းလူၺ်ႈပိင်ႇၺႃႇတူဝ်ၸဝ်ႈၵဝ်ႇသေလႄႈ ဢမ်ႇႁူႉၸၵ်းၽြႃးပဵၼ်ၸဝ်ႈလႄႈယူႇၼၼ်ႉၸိုင်၊ ၽြႃးပဵၼ်ၸဝ်ႈၸွမ်းလူၺ်ႈတၢင်းမိူၵ်ႈ တေႇသၼႃႇၸဝ်ႈသေလႄႈ မီးၸႂ်ၸေႇတၼႃႇႁႂ်ႈလႆႈၵႄႇၶျွတ်ႈဢဝ်ၶဝ်ၸိူဝ်းဢၼ်ယုမ်ႇမၢတ်ႈၼၼ်ႉဢေႃႈ။-

22ၵူၼ်း ယူႉတႃႉ တင်းလၢႆၸၢင်ႈယွၼ်းဢဝ် ၼီႉမိၵ်ႈလၢၵ်ႈၶၼႃႇဢေႃႈ။ ၵူၼ်း ႁေႇလသႃႉ တင်းလၢႆ ၸၢင်ႈႁႃဢဝ်ပိင်ႇၺႃႇဢေႃႈ။-

23ႁဝ်းၸမ်ႉ၊ ႁေႃးလၢတ်ႈလွင်ႈၸဝ်ႈၶရိၸ်ႈဢၼ်ၶၢမ်ႇတၢင်းတၢႆၵႃႈၼိူဝ်သဝ်လၵ်းဝႃးၵၢပ်ႈၼၼ်ႉဢေႃႈ။ လွင်ႈၼၼ်ႉၸမ်ႉ၊ ပဵၼ်လွင်ႈဢၼ်တၵ်းတိူဝ်ႉမႅၼ်ႈလႄႈလူမ်ႉတီႈၵူၼ်း ယူႉတႃႉ တင်းလၢႆဢေႃႈ။ ပဵၼ်တၢင်းဢၼ်မိူၵ်ႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။-

24ၼႂ်းဝႃႈၼၼ်သေၵေႃႈ တီႈၵူၼ်း ယူႉတႃႉ သေဢမ်ႇဝႃႈ၊ တီႈၵူၼ်း ႁေႇလသႃႉ သေဢမ်ႇဝႃႈ၊ ပဵၼ်တြႃးၸဝ်ႈၶရိၸ်ႈ ဢၼ်ဝႃႈတၼ်းၶူဝ်းၽြႃးပဵၼ်ၸဝ်ႈ ဢိၵ်ႇတင်းပိင်ႇၺႃႇၽြႃးပဵၼ်ၸဝ်ႈတီႈၶဝ်ၸိူဝ်းဢၼ်မၼ်းၸဝ်ႈႁွင်ႉဢဝ်ၼၼ်ႉဢေႃႈ။-

25တၢင်းဢၼ်ၽြႃးပဵၼ်ၸဝ်ႈမိူၵ်ႈၼၼ်ႉ ယဵင်ႈၶႅၼ်းမီးပိင်ႇၺႃႇၼႃႇသေၵူၼ်းတင်းလၢႆဢေႃႈ။ တၢင်းဢၼ်ၽြႃးပဵၼ်ၸဝ်ႈ ႁႅင်းလဵၵ်ႉၼၼ်ႉ၊ ယဵင်ႈၶႅၼ်းမီးႁႅင်းၼႃႇသေၵူၼ်းတင်းလၢႆဢေႃႈ။

26ပီႈၼွင်ႉၶဝ်ဢိူၺ်း၊ ၶႆႈၸႂ်လူၺ်ႈလွင်ႈတၢင်းဢၼ်မၼ်းၸဝ်ႈ ႁွင်ႉဢဝ်သူၼၼ်ႉတႃႉ။ ၼႂ်းသူၼႆႉဢမ်ႇပႃးၵူၼ်းဢၼ်မီးပိင်ႇၺႃႇ လေႃးၵီႇၼမ်ၼႃႇ၊ ဢမ်ႇပႃးၵူၼ်းယႂ်ႇၵူၼ်းလူင်ၼမ်ၼႃႇ၊ ဢမ်ႇပႃးၵူၼ်းဢၼ်ပဵၼ်ၸိူဝ်ႉၶိူဝ်းၶုၼ်ၼမ်ၼႃႇ။-

27ၽြႃးပဵၼ်ၸဝ်ႈလိူၵ်ႈၵဵပ်းဢဝ်ၶဝ်ၸိူဝ်းဢၼ်မိူၵ်ႈ ၵႃႈၼႂ်းတၢင်းဢၼ်ၸၢပ်ႈသႅင်ႇၵၼ်တင်းလေႃးၵႃႉၼႆႉႁႂ်ႈၶဝ်ၸိူဝ်းဢၼ် မီးပိင်ႇၺႃႇၼၼ်ႉလႆႈဢူၵ်းလႆႈဢၢႆဢေႃႈ။ မၼ်းၸဝ်ႈလိူၵ်ႈၵဵပ်းဢဝ်ၶဝ်ၸိူဝ်းဢၼ်ႁႅင်းလဵၵ်ႉႁႅင်းၵေႇ ၵႃႈၼႂ်းတၢင်းဢၼ် ၸၢပ်ႈသႅင်ႇၵၼ်တင်းလေႃးၵႃႉၼႆႉ ႁႂ်ႈၶဝ်ၸိူဝ်းဢၼ်ၸၢင်ႈတၢတ်ႈၼိူင်ႇလႆႈၼၼ်ႉလႆႈဢူၵ်းလႆႈဢၢႆဢေႃႈ။-

28မၼ်းၸဝ်ႈလိူၵ်ႈၵဵပ်းဢဝ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ်၊ ၶဝ်ၸိူဝ်းဢၼ်ဢမ်ႇပွင်ႇလွင်ႈၵႃႈသင်၊ ၶဝ်ၸိူဝ်းဢၼ်ယုတ်ႈဢၼ်ယွမ်းၵႃႈၼႂ်းတၢင်းဢၼ်ၸၢပ်ႈသႅင်ႇၵၼ်တင်းလေႃးၵႃႉၼႆႉ ႁႂ်ႈၶဝ်ၸိူဝ်းဢၼ်မျၢတ်ႈၼၼ်ႉလႆႈဢူၵ်းလႆႈဢၢႆဢေႃႈ။-

29ပိူဝ်ႈၼႆလႄႈၽူႈလႂ်ဢမ်ႇမီးလွင်ႈဢၼ်တၵ်းလႆႈဢုပ်ႇဝၢဝ်း ၵႃႈတီႈၽၢႆႇၼႃႈၽြႃးပဵၼ်ၸဝ်ႈ။-

30ၵွပ်ႈပိူဝ်ႈၽြႃးပဵၼ်ၸဝ်ႈၼၼ်ႉလႄႈ သူတႄႇယူႇၼႂ်း ယေႇသူႉၶရိၸ်ႈ ဢၼ်ပဵၼ်ပိင်ႇၺႃႇဢိၵ်ႇတင်းတၢင်းသိုဝ်ႈတေႃႇ၊ တၢင်းမူတ်းၸၢင်ႇ၊ တၢင်းဢၼ်ထုတ်ႇဢဝ်ဢၼ်ပဵၼ်မႃးၵႃႈတီႈၽြႃးပဵၼ်ၸဝ်ႈၼၼ်ႉတီႈႁဝ်းဢေႃႈ။-

31ၵွပ်ႈႁွႆးၼႆႉလႄႈ မႅၼ်ႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ ႁႂ်ႈၵေႃႉဢၼ်ၶႂ်ႈဢုပ်ႇဝၢဝ်းၼၼ်ႉ ဢုပ်ႇဝၢဝ်းၼႂ်းထႃႇဝရႃႉၽြႃးၵူၺ်းသေၵမ်းလူၺ်ႈ၊ ဝႃႈၼင်ႇၼႆၼၼ်ႉဢေႃႈ။

Jump to: Chapter 2 →