1 Corinthians 14 — Shan

1ၸွမ်းႁႂ်ႈၶိုတ်းတၢင်းႁၵ်ႉမႅတ်ႈတႃႇတႃႉ။ မီးဢလူဝ်ႇၶႂ်ႈလႆႈသူႉၵျေးၸူးဝီႉၺိၺ်ႇၼႃႇလူင်လၢင်တႃႉ။ ၵူၺ်းၵႃႈ ယဵင်ႈၶႅၼ်းမီးၸႂ်ဢၼ်ၶႂ်ႈလႆႈဢၶႂၢင်ႉဢၼ်လႆႈႁဵတ်းပရေႃးၽႅတ်ႈၼၼ်ႉတႃႉ။-

2လွင်ႈမၼ်းၸမ်ႉၵေႃႉဢၼ်ဢဝ်တင်းၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်လၢတ်ႈၼၼ်ႉ ဢမ်ႇလၢတ်ႈတီႈၵူၼ်းတင်းလၢႆ၊ လၢတ်ႈတီႈၽြႃးပဵၼ်ၸဝ်ႈဢေႃႈ။ ၽူႈလႂ်ဢမ်ႇႁူႉၵႂၢမ်းမၼ်းၼၼ်ႉသေၵေႃႉသေၵူၼ်း၊ မၼ်းဢဝ်တင်းဝီႉၺိၺ်ႇၸဝ်ႈလၢတ်ႈတၢင်းဢၼ်လိုၵ်ႉဢၼ်လမ်ႇတင်းလၢႆဢေႃႈ။-

3ၵေႃႉဢၼ်ႁဵတ်းပရေႃးၽႅတ်ႈၸမ်ႉ၊ ႁေႃးလၢတ်ႈပုၼ်ႈတၢင်းဢၼ်တႄႇႁဵတ်း၊ တၢင်းဢၼ်တိုၵ်းယူင်းၸူဝ်းဢဝ်၊ တၢင်းဢၼ်သၢၵ်ႈသႃႇၸိူဝ်းၼၼ်ႉတီႈၵူၼ်းတင်းလၢႆဢေႃႈ။-

4ၵေႃႉဢၼ်ဢဝ်တင်းၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်လၢတ်ႈၼၼ်ႉ တႄႇႁဵတ်းတူဝ်ၸဝ်ႈၵဝ်ႇၵူၺ်းဢေႃႈ။ ၵေႃႉဢၼ်ႁဵတ်းပရေႃးၽႅတ်ႈၸမ်ႉ၊ တႄႇႁဵတ်းၸိူဝ်းၸဝ်ႈဢေႃႈ။

5ၵဝ်မီးဢလူဝ်ႇၶႂ်ႈႁႂ်ႈသူဢဝ်တင်းၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်လၢတ်ႈဢေႃႈ။ ၵူၺ်းၵႃႈၵဝ်ယဵင်ႈၶႅၼ်းမီးဢလူဝ်ႇၶႂ်ႈႁႂ်ႈသူႁဵတ်းပရေႃးၽႅတ်ႈဢေႃႈ။ လွင်ႈမၼ်းၸမ်ႉ ၼင်ႇႁိုဝ်တၵ်းလႆႈတႄႇႁဵတ်းၸိူဝ်းၸဝ်ႈၸိုင်၊ ၵေႃႉဢၼ်ႁဵတ်းပရေႃးၽႅတ်ႈၼၼ်ႉယဵင်ႈၶႅၼ်းမျၢတ်ႈသေၵေႃႉဢၼ်ဢဝ်တင်းၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်လၢတ်ႈလႄႈဢမ်ႇၽုၺ်ႇၼႄဢထိၵ်ႈပႄႇၼၼ်ႉဢေႃႈ။

6ပီႈၼွင်ႉၶဝ်ဢိူၺ်း၊ ပိၵ်ႉသမ်ႉၵဝ်မႃးၵႃႈတီႈသူလႄႈဢဝ်တင်းၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်ႁေႃးလၢတ်ႈသေၵေႃႈ၊ ပေႃးၵဝ်ဢမ်ႇႁဵတ်းတၢင်းဢၼ်ပျၢၼ်ႇလၢတ်ႈပျႃႇတိၵ်ႈၸဝ်ႈ၊ ဢမ်ႇၼၼ်တၢင်းဢၼ်သွၼ်ဢတၢတ်ႈပိင်ႇၺႃႇ၊ ဢမ်ႇၼၼ်တၢင်းဢၼ်ႁဵတ်းပရေႃးၽႅတ်ႈ၊ ဢမ်ႇၼၼ်တၢင်းဢၼ်သင်ႇသွၼ်သုင်းမႃႉလႄႈလၢတ်ႈတီႈသူၸိုင်၊ သူတၵ်းမီးဢၵျူဝ်းၵႃႈသင်။-

7မိူၼ်ၼင်ႇၼၼ် ပေႃးၶိူင်ႈပိူင်ဢႃႉဝုၺ်ႇၺႃႇၼၵႃႉ ၊ ပီႇဢၼ်ၸၢင်ႈသဵင်လင်သဵင်မေႃးၼၼ်ႉ ပဵၼ်ပီႇသေဢမ်ႇဝႃႈ၊ ပဵၼ်တိင်ႇသေဢမ်ႇဝႃႈ၊ ဢမ်ႇမီးတင်းသဵင်ဢၼ်ပႅၵ်ႇပိူင်ႈၵၼ်လင်မေႃးၸိုင်၊ တၵ်းႁူႉလွင်ႈဢၼ်ပႃးသဵင်ၶိုၼ်ႈသဵင်လူင်းၼႂ်းတၢင်းဢၼ်ပဝ်ႇပီႇလဵတ်းတိင်ႇၼၼ်ႉလႆႈၸိူဝ်ႉၼင်ႇႁိုဝ်။-

8ၼႄးၶရႃႇၵေႃႈပေႃးဢမ်ႇႁဵတ်းတင်းသဵင်ဢၼ်မၢၼ်ႇဢၼ်မႅၼ်ႈလႄႈမေႃးလင်ၸိုင် ၽူႈလႂ်တၵ်းမႄးႁႅၼ်းတူဝ်ၸဝ်ႈၵဝ်ႇဝႆႉ ပုၼ်ႈဢၼ်တၵ်းတိုၵ်းသိုၵ်း။-

9မိူၼ်ၼင်ႇၼၼ် ပေႃးသူဢမ်ႇဢဝ်တင်းသူပ်းၵႂၢမ်းဢၼ်ႁူႉငၢႆႈၼၼ်ႉလၢတ်ႈၸိုင်၊ ၽူႈလႂ်တၵ်းႁူႉၵႂၢမ်းဢၼ်လၢတ်ႈၼၼ်ႉလႆႈ၊ မိူၼ်ၸိူဝ်ႉၼင်ႇၵေႃႉဢၼ်လၢတ်ႈၵႂၢမ်းတေႃႇလူမ်းဢႃႇၵႃႇသႃႉၵၢင်ႁၢဝ်ၼၼ်ႉဢေႃႈ။

10မဵဝ်းၵႂၢမ်းၽႃႇသႃႇၼႂ်းမိူင်းၵူၼ်းၼႆႉၼမ်ၼႃႇလူင်လၢင်ထၢၼ်ႇၼႆႉလႄႈ ၵႃႈမီးတင်းသဵင်ႈတင်းလူင်ပျေႉၸုမ်ႇတင်းဢထိၵ်ႈပႄႇဝႃႈၼႆ၊ ႁႂ်ႈၸႂ်ႈသေလူးၵွၼ်ႇတႃႉ။-

11ပေႃးၵဝ်ဢမ်ႇႁူႉဢထိၵ်ႈပႄႇၵႂၢမ်းၽႃႇသႃႇၼၼ်ႉၸိုင်၊ ၵဝ်တၵ်းပဵၼ်ၵူၼ်းရိူင်းတီႈၵေႃႉဢၼ်လၢတ်ႈၼၼ်ႉဢေႃႈ။ ၵေႃႉဢၼ်လၢတ်ႈၼၼ်ႉၵေႃႈ တၵ်းပဵၼ်ၵူၼ်းရိူင်းတီႈၵဝ်ဢေႃႈ။-

12ပေႃးပဵၼ်ၸိူဝ်ႉၼင်ႇၼၼ်ၸိုင်၊ ၼႂ်းမိူဝ်ႈဢၼ်သူမီးဢလူဝ်ႇၶႂ်ႈလႆႈသူႉၵျေးၸူးဝီႉၺိၺ်ႇၼႃႇလူင်လၢင်ၼၼ်ႉ၊ ၵႆႉၵျူဝ်းၸႃး ႁႂ်ႈလႆႈပျေႉၸုမ်ႇလိူင်ႇၸႂ်ႁႂ်ႈထၼ်ႈပေႃးလႆႈတႄႇႁဵတ်းၸိူဝ်းၸဝ်ႈတႃႉ။

13ပိူဝ်ႈၼႆလႄႈ ႁႂ်ႈၵေႃႉဢၼ်ၸၢင်ႈလၢတ်ႈၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်ၼၼ်ႉသူးတွင်းႁႂ်ႈလႆႈၽုၺ်ႇဢွၵ်ႇၼႄပျႃး ဢထိၵ်ႈပႄႇလႆႈတႃႉ။-

14ပဵၼ်လွင်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ပေႃးၵဝ်ဢဝ်တင်းၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်သူးတွင်းၸိုင်၊ ပိၵ်ႉသမ်ႉႁူဝ်ၸႂ်ၵဝ်သူးတွင်းသေၵေႃႈ၊ ၺၢၼ်ႇၵဝ်ဢမ်ႇပၼ်ဢၵျူဝ်း။-

15ပေႃးပဵၼ်ၸိူဝ်ႉၼင်ႇၼႆၸိုင်၊ တၵ်းလႆႈႁဵတ်းၸိူဝ်ႉၼင်ႇႁိုဝ်။ ၵဝ်တၵ်းလႆႈဢဝ်တင်းႁူဝ်ၸႂ်ဢိၵ်ႇတင်းၺၢၼ်ႇသူးတွင်းဢေႃႈ။ ၵဝ်တၵ်းလႆႈဢဝ်တင်းႁူဝ်ၸႂ်ဢိၵ်ႇတင်းၺၢၼ်ႇႁဵတ်းၵႂၢမ်းဢေႃႈ။-

16ဢမ်ႇၼၼ်ၵေႃႈ မိူဝ်ႈဢၼ်မႂ်းဢဝ်တင်းႁူဝ်ၸႂ်ယွင်ႈယေႃးၵျေးၸူးၸဝ်ႈၼၼ်ႉၸိုင်၊ ၵေႃႉဢၼ်ၶဝ်ႈပႃးၼႂ်းမူႇၵူၼ်းၽုင်ၵူၼ်းဢၼ်ဢမ်ႇမေႃၼၼ်ႉတၵ်းၸွမ်းတၢင်းဢၼ်ယွင်ႈယေႃးၵျေးၸူးၸဝ်ႈသေလႄႈဝႃႈ၊ ဢႃႇမိၼ်ႇ၊ ဝႃႈၼင်ႇၼႆ ၵွပ်ႈပိူဝ်ႈဢၼ်ဢမ်ႇႁူႉၵႂၢမ်းမႂ်းၼၼ်ႉလႆႈၸိူဝ်ႉၼင်ႇႁိုဝ်။-

17မႂ်းယွင်ႈယေႃးၵျေးၸူးၸဝ်ႈလီလီငၢမ်းငၢမ်းဝႃႈၼႆ ႁႂ်ႈၸႂ်ႈသေလူးၵွၼ်ႇတႃႉ။ ပိူၼ်ႈတၢင်ႇၵေႃႉၸမ်ႉ၊ ဢမ်ႇမီးဢၵျူဝ်းတၢင်းဢၼ်တၵ်းတႄႇႁဵတ်း။

18ၵဝ်ယဵင်ႈၶႅၼ်းဢဝ်တင်းၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်ႁေႃးလၢတ်ႈၼႃႇသေသူၵႃႈမီးတင်းသဵင်ႈတင်းလူင်ဝႃႈၼႆ၊ ၵဝ်ယွင်ႈယေႃးၵျေးၸူးၽြႃးပဵၼ်ၸဝ်ႈဢေႃႈ။-

19ၼႂ်းဝႃႈၼၼ်သေၵေႃႈ ၼႂ်းၸိူဝ်းၸဝ်ႈၸိုင်ၵဝ်ယဵင်ႈၶႅၼ်းမီးဢလူဝ်ႇၶႂ်ႈလႆႈတၢင်းဢၼ်ဢဝ်တင်းၺၢၼ်ႇလၢတ်ႈၵႂၢမ်းႁႃႈၵမ်းၵူၺ်း ႁႂ်ႈလႆႈသင်ႇသွၼ်ပိူၼ်ႈၼၼ်ႉၼႃႇသေ တၢင်းဢၼ်ၸၢင်ႈလၢတ်ႈၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်မိုၼ်ႇၼိုင်ႈဢေႃႈ။

20ပီႈၼွင်ႉၶဝ်ဢိူၺ်း၊ ၼႂ်းၺၢၼ်ႇၸိုင်ယႃႇပေပဵၼ်လုၵ်ႈဢွၼ်ႇသေၵမ်း။ ၼႂ်းဢမူႉဢၼ်ဢမ်ႇတြႃးၸိုင်ပဵၼ်လုၵ်ႈဢွၼ်ႇတႃႉ၊ ၼႂ်းၺၢၼ်ႇၸိုင်ပဵၼ်ၵေႃႉဢၼ်ဢသၢၵ်ႈယႂ်ႇၼၼ်ႉတႃႉ။-

21ဢၼ်မႃးၼႂ်းၵျၢမ်းပိင်းၺၢပ်ႈတီႉၸမ်ႉ၊ ၵဝ်တၵ်းဢဝ်တင်းသူပ်းတၢင်ႇတီႈတၢင်ႇလႅၼ်ဢိၵ်ႇတင်းလိၼ်ႉတၢင်ႇတီႈတၢင်ႇလႅၼ် လၢတ်ႈတီႈၵူၼ်းမဵဝ်းၼႆႉဢေႃႈ။ ၵူၺ်းၵႃႈ ၶဝ်ဢမ်ႇထွမ်ႇဢမ်ႇဢဝ်၊ ဝႃႈၼႆထႃႇဝရႃႉၽြႃးလၢတ်ႈဝႃႈၼင်ႇၼႆဢေႃႈ။

22ပေႃးပဵၼ်ၸိူဝ်ႉၼင်ႇၼႆၸိုင်၊ ၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်ၼၼ်ႉ ပဵၼ်ၼီႉမိၵ်ႈလၢၵ်ႈၶၼႃႇတီႈၶဝ်ၸိူဝ်းဢၼ်ယုမ်ႇမၢတ်ႈၼၼ်ႉဢမ်ႇၸႂ်ႈ။ ပဵၼ်ၼီႉမိၵ်ႈလၢၵ်ႈၶၼႃႇတီႈၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉဢေႃႈ။ တၢင်းဢၼ်ႁဵတ်းပရေႃးၽႅတ်ႈၸမ်ႉ၊ ပဵၼ်ၼီႉမိၵ်ႈ လၢၵ်ႈၶၼႃႇ တီႈၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉဢမ်ႇၸႂ်ႈ။ ပဵၼ်ၼီႉမိၵ်ႈလၢၵ်ႈၶၼႃႇတီႈၶဝ်ၸိူဝ်းဢၼ်ယုမ်ႇမၢတ်ႈၼၼ်ႉဢေႃႈ။-

23ပိူဝ်ႈၼႆလႄႈၼႂ်းမိူဝ်ႈဢၼ်ၵူၼ်းၶဝ်ႈၸိူဝ်းၸဝ်ႈတင်းသဵင်ႈတင်းလူင်ၸူႉၵၼ်တုမ်ၵၼ်လႄႈဢဝ်တင်းၵႂၢမ်းၽႃႇသႃႇ တၢင်ႇၸိူဝ်ႉတၢင်ႇပိူင်ႁေႃးလၢတ်ႈယူႇၼၼ်ႉ၊ ပေႃးၵေႃႉဢၼ်ဢမ်ႇယုမ်ႇမၢတ်ႈ၊ ၵေႃႉဢၼ်ဢမ်ႇမေႃၼၼ်ႉၶဝ်ႈမႃးၸိုင် မၼ်းတၵ်းဝႃႈသူပဵၼ်ၵူၼ်းယွင်ႇဢမ်ႇၸႂ်ႈႁိုဝ်။-

24ဢမ်ႇၼၼ်ၵေႃႈ ၼႂ်းမိူဝ်ႈဢၼ်ၵူၼ်းၶဝ်ႈၸိူဝ်းၸဝ်ႈတင်းသဵင်ႈတင်းလူင် ႁဵတ်းပရေႃးၽႅတ်ႈယူႇၼၼ်ႉ၊ ပေႃးၵေႃႉဢၼ်ဢမ်ႇယုမ်ႇမၢတ်ႈ၊ ၵေႃႉဢၼ်ဢမ်ႇမေႃၼၼ်ႉၶဝ်ႈမႃးၸိုင် ၵူၼ်းၶဝ်ႈၸိူဝ်းၸဝ်ႈတင်းသဵင်ႈတင်းလူင်ၽုၺ်ႇၼႄဢပႅတ်ႈမၼ်းလႄႈၸႅတ်ႈထၢမ်ၸီႇယၢင်ႇမၼ်းဢေႃႈ။-

25ၼင်ႇၼၼ်လႄႈ လွင်ႈတၢင်းဢၼ်ဢမ်ႇထၢင်ႇသႃး ၵႃႈၼႂ်းႁူဝ်ၸႂ်မၼ်းၼၼ်ႉ တၵ်းလႆႈၶၢမ်ႇတၢင်းဢၼ်ထၢင်ႇသႃးမႃးလႄႈမၼ်းတၵ်းၶုပ်ႉမူပ်ႇယူႇသေလႄႈၵူဝ်းၵႂၢႆႇၽြႃးပဵၼ်ၸဝ်ႈဢေႃႈ။ မၼ်းတၵ်းၶၢမ်ႇသၢၵ်ႈသေႇလႄႈဝႃႈ၊ ၽြႃးပဵၼ်ၸဝ်ႈမီးၵႃႈၼႂ်းသူဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။

26ပီႈၼွင်ႉၶဝ်ဢိူၺ်း၊ ပဵၼ်ၸိူဝ်ႉၼင်ႇႁိုဝ်။ မိူဝ်ႈဢၼ်သူၸူႉၵၼ်တုမ်ၵၼ်ယူႇၼၼ်ႉၸိုင်၊ ၵေႃႉဢၼ်လႆႈတၢင်းဢၼ် ႁဵတ်းၵႂၢမ်းသႃႇလၢမ်ႇ၊ ၵေႃႉဢၼ်လႆႈၵႂၢမ်းတၢင်းဢၼ်သင်ႇသွၼ်သုင်းမႃႉပၼ်၊ ၵေႃႉဢၼ်လႆႈၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်၊ ၵေႃႉဢၼ်လႆႈပျႃႇတိၵ်ႈၸဝ်ႈ၊ ၵေႃႉဢၼ်လႆႈလွင်ႈတၢင်းဢၼ်ၽုၺ်ႇၼႄဢထိၵ်ႈပႄႇၸိူဝ်းၼၼ်ႉ မီးႁင်းၽႂ်ႁင်းမၼ်းဢေႃႈ။ ၸီႇယၢင်ႇလွင်ႈတၢင်းၵႃႈမီးတင်းသဵင်ႈတင်းလူင်ႁႂ်ႈလႆႈတႄႇႁဵတ်းတႃႉ။-

27ပေႃးမီးၵေႃႉဢၼ်ဢဝ်တင်းၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်ႁေႃးလၢတ်ႈၼၼ်ႉၸိုင်၊ သွင်ၵေႃႉသေဢမ်ႇဝႃႈ၊ တီႈၼမ်သုတ်းမၼ်းၸမ်ႉ၊ သၢမ်ၵေႃႉသေဢမ်ႇဝႃႈ၊ ႁႂ်ႈၵေႃႉၼိုင်ႈယဝ်ႉၵေႃႉၼိုင်ႈလၢတ်ႈလႄႈ ႁႂ်ႈၵေႃႉၼိုင်ႈၽုၺ်ႇၼႄဢထိၵ်ႈပႄႇမၼ်းတႃႉ။-

28ပေႃးဢမ်ႇမီးၵေႃႉဢၼ်ပျၢၼ်ႇၵႂၢမ်းၸိုင်ႁႂ်ႈၵေႃႉဢၼ်ႁေႃးလၢတ်ႈၼၼ်ႉယူႇတဵတ်ႇတဵတ်ႇၵႃႈၼႂ်းၸိူဝ်းၸဝ်ႈလႄႈ လၢတ်ႈတီႈတူဝ်ၸဝ်ႈၵဝ်ႇဢိၵ်ႇတင်းၽြႃးပဵၼ်ၸဝ်ႈၵူၺ်းတႃႉ။

29ၼႂ်းပရေႃးၽႅတ်ႈတင်းလၢႆ ႁႂ်ႈသွင်ၵေႃႉသၢမ်ၵေႃႉႁေႃးလၢတ်ႈလႄႈ ႁႂ်ႈပိူၼ်ႈတၢင်ႇၵေႃႉၸႅတ်ႈထၢမ်ၸီႇယၢင်ႇတႃႉ။-

30ပေႃးမၼ်းၸဝ်ႈၽုၺ်ႇၼႄသေၸိူဝ်ႉသေပိူင် တီႈၵေႃႉဢၼ်ၼင်ႈယူႇၵႃႈတီႈႁိမ်းႁွမ်းၼၼ်ႉၸိုင် ႁႂ်ႈၵေႃႉဢၼ်ႁေႃးလၢတ်ႈဢွၼ်တၢင်းၼၼ်ႉယူႇတဵတ်ႇတဵတ်ႇသေ။-

31လွင်ႈမၼ်းၸမ်ႉ လွင်ႈၼင်ႇႁိုဝ်ၶဝ်ၵႃႈမီးတင်းသဵင်ႈတင်းလူင်တၵ်းသွၼ်ဢဝ် ဢိၵ်ႇတင်းလွင်ႈၼင်ႇႁိုဝ် ၶဝ်ၵႃႈမီးတင်းသဵင်ႈတင်းလူင်တၵ်းသၢၵ်ႈသႃႇၸိုင်၊ သူၵေႃႉၼိုင်ႈယဝ်ႉၵေႃႉၼိုင်ႈႁင်းၽႂ်ႁင်းမၼ်း မီးဢၶႂၢင်ႉဢၼ်လႆႈႁဵတ်းပရေႃးၽႅတ်ႈဢေႃႈ။-

32ပရေႃးၽႅတ်ႈတင်းလၢႆၵေႃႈၶျုၵ်ႈၸႂ်ဝီႉၺိၺ်ႇတူဝ်ၸဝ်ႈၵဝ်ႇလႆႈဢေႃႈ။-

33ၽြႃးပဵၼ်ၸဝ်ႈ ဢမ်ႇပွင်ႁဵတ်းတၢင်းဢၼ်ဢူၼ်ဢဵၼ်ႁူၼ်ႈမေႃး။ ၸိူဝ်ႉၼင်ႇဢၼ်ပဵၼ်ၵႃႈၼႂ်းၸိူဝ်းၸဝ်ႈၵူၼ်းမူတ်းၸၢင်ႇၶဝ်တင်းသဵင်ႈတင်းလူင်ၼၼ်ႉ မၼ်းၸဝ်ႈပွင်ႁဵတ်းတၢင်းဢၼ်ၼိမ်လႄႈယူႇထုၵ်ႇထုၵ်ႇဢေႃႈ။

34ႁႂ်ႈၽူႈယိင်းသူတင်းလၢႆ ယူႇတဵတ်ႇတဵတ်ႇယဵၼ်ယဵၼ်ၵႃႈၼႂ်းၸိူဝ်းၸဝ်ႈတႃႉ။ ဢၶႂၢင်ႉဢၼ်ၶဝ်လႆႈႁေႃးလၢတ်ႈဢမ်ႇမီး။ ၶဝ်ၼၼ်ႉတၵ်းလႆႈၶၢမ်ႇတၢင်းဢၼ်ၵူၼ်းၸၢႆးဢုပ်ႉပိူင်ႇၵႃႈၼင်ႇဢၼ်ပိင်းၺၢပ်ႈတြႃးၸီႇယၢင်ႇဝႆႉၼၼ်ႉဢေႃႈ။-

35ပေႃးၽူႈယိင်းတင်းလၢႆၶႂ်ႈသွၼ်ဢဝ်သေၸိူဝ်ႉသေပိူင်ၸိုင်၊ ႁႂ်ႈၶဝ်ထၢမ်တီႈၽူဝ်ၶဝ်ၵႃႈတီႈႁိူၼ်းလူးၵွၼ်ႇတႃႉ။ ပေႃးၽူႈယိင်းႁေႃးလၢတ်ႈၵႃႈၼႂ်းၸိူဝ်းၸဝ်ႈၸိုင်ပဵၼ်လွင်ႈဢၼ်လီဢူၵ်းလီဢၢႆဢေႃႈ။

36ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈ ဢွၵ်ႇၵႃႈတီႈသူမႃးႁိုဝ်။ ဢမ်ႇၼၼ်လႄႈႁွတ်ႈထိုင်ၵႃႈတီႈသူၵူၺ်းႁိုဝ်။-

37ပေႃးသေၵေႃႉသေၵူၼ်း ထၢင်ႇတူဝ်ၸဝ်ႈၵဝ်ႇပဵၼ်ပရေႃးၽႅတ်ႈ၊ ပဵၼ်ၵေႃႉဢၼ်လႆႈၶၢမ်ႇဢဝ်သူႉၵျေးၸူးဝီႉၺိၺ်ႇၸိုင်၊ ႁႂ်ႈမၼ်းႁပ်ႉတုင်းဢဝ်လွင်ႈဢၼ်ၵႂၢမ်းဢၼ်ၵဝ်တႅမ်ႈပၼ်တီႈသူၼႆႉ ပဵၼ်ပိင်းၺၢပ်ႈၸဝ်ႈၽြႃးၼၼ်ႉတႃႉ။-

38ပေႃးသေၵေႃႉသေၵူၼ်းဢမ်ႇႁူႉၸိုင် ႁႂ်ႈမၼ်းယင်းဢမ်ႇႁူႉလႄႈယူႇတႃႉ။-

39ပိူဝ်ႈၼႆလႄႈ ပီႈၼွင်ႉၶဝ်ဢိူၺ်း၊ ၼင်ႇႁိုဝ်သူတၵ်းလႆႈႁဵတ်းပရေႃးၽႅတ်ႈၸိုင်သူမီးဢလူဝ်ႇၼႃႇလူင်လၢင်တႃႉ။ လွင်ႈတၢင်းဢၼ်ဢဝ်တင်း ၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်ႁေႃးလၢတ်ႈၼၼ်ႉၵေႃႈ ယႃႇပေႁႄႉပေၶႅၼ်။-

40ၸီႇယၢင်ႇသၢင်ႈႁဵတ်း လွင်ႈတၢင်းၵႃႈမီးတင်းသဵင်ႈတင်းလူင်လီလီထုၵ်ႇထုၵ်ႇ ၸွမ်းၵႃႈၼင်ႇဢၼ်ၸႅၼ်ႇတၢမ်းၵၼ်ၼၼ်ႉတႃႉ။