1 Corinthians 6

Shan

← Chapter 5 Jump to: Chapter 7 →

1ပေႃးသူၼင်ႇၵၼ်ၵၼ်မီးဢမူႉတီႈၵၼ်ၸိုင်၊ ၵေႃႉဢၼ်ယင်းဢမ်ႇၶၢမ်ႇတၢင်းဢၼ်ၸီႇယၢင်ႇတြႃးၵႃႈတီႈၽၢႆႇၼႃႈၵူၼ်းမူတ်းၸၢင်ႇတင်းလၢႆလႄႈ ႁတ်းၶၢမ်ႇၵႃႈတီႈၽၢႆႇၼႃႈၵူၼ်းသႃႇသၼႃႇပႃႉတင်းလၢႆၼၼ်ႉ မီးသေၵေႃႉသေၵူၼ်းႁိုဝ်။-

2သူဢမ်ႇႁူႉလွင်ႈဢၼ်ၵူၼ်းမူတ်းၸၢင်ႇတင်းလၢႆ တၵ်းၸီႇယၢင်ႇတြႃးတီႈမိူင်းလေႃးၵီႇႁိုဝ်။ ပေႃးသူတၵ်းၸီႇယၢင်ႇမိူင်းလေႃးၵီႇၸိုင်၊ သူဢမ်ႇထိူၵ်ႈၸီႇယၢင်ႇဢမူႉဢၼ်လဵၵ်ႉသေပိူၼ်ႈၸိူဝ်းၼၼ်ႉႁိုဝ်။-

3သူဢမ်ႇႁူႉလွင်ႈဢၼ်ႁဝ်းတၵ်းၸီႇယၢင်ႇတြႃး တီႈတမၢၼ်ႇၵၢင်ႁၢဝ်တင်းလၢႆႁိုဝ်။ ၵွပ်ႈႁွႆးၼႆႉလႄႈ ထိူၵ်ႈၸီႇယၢင်ႇဢမူႉဢၼ်ၸၢပ်ႈသႅင်ႇၵၼ်တင်းဢသၢၵ်ႈၼႆႉၼၼ်ႉဢမ်ႇၸႂ်ႈႁိုဝ်။-

4ပိူဝ်ႈၼႆလႄႈ ပေႃးသူမီးလွင်ႈတၢင်းဢၼ်တၵ်းၸီႇယၢင်ႇဢမူႉဢၼ်ၸၢပ်ႈသႅင်ႇၵၼ်တင်းဢသၢၵ်ႈၼႆႉၼၼ်ႉၸိုင် ဢဝ်ၶဝ်ၸိူဝ်းဢၼ်ဢမ်ႇပေႃးမီးသရေႇၼၼ်ႉ ၶၢၼ်းဝႆႉၼႂ်းဢရႃႇၵေႃႉဢၼ်တၵ်းၸီႇယၢင်ႇတြႃးတႃႉ။

5မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်၊ ၵဝ်လၢတ်ႈႁႂ်ႈသူဢူၵ်းဢၢႆဢေႃႈ။ ၼႂ်းသူၼၼ်ႉဢမ်ႇမီးၵေႃႉဢၼ်မီးပိင်ႇၺႃႇသေၵေႃႉသေၵူၼ်းႁိုဝ်။ ဢမ်ႇမီးၵေႃႉဢၼ်ၸီႇယၢင်ႇၽေႇၽျၢၼ်ႇဢမူႉပီႈၼွင်ႉ ၼင်ႇၵၼ်ၵၼ်လႆႈၼၼ်ႉသေၵေႃႉသေၵူၼ်းႁိုဝ်။-

6ပီႈၼွင်ႉၼင်ႇၵၼ်ၵၼ်ႁဵတ်းဢမူႉတီႈၵၼ်ဢမ်ႇၵႃး၊ ႁဵတ်းဢမူႉတီႈၵၼ်ၵႃႈတီႈၽၢႆႇၼႃႈၶဝ်ၸိူဝ်းဢၼ်ဢမ်ႇယုမ်ႇၼၼ်ႉလူင်ပႄႇ။-

7ၼင်ႇၼၼ်လႄႈ သူမီးဢပႅတ်ႈဢၼ်ယႂ်ႇၼႃႇၼႂ်းလွင်ႈတၢင်းဢၼ် သူၼင်ႇၵၼ်ၵၼ်ႁဵတ်းဢမူႉတီႈၵၼ်ၼၼ်ႉဢေႃႈ။ ယင်းဢမ်ႇႁဵတ်းဢမူႉလႄႈႁဵတ်းသင်သူဢမ်ႇၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးလႄႈယူႇၼင်ႇႁိုဝ်။ ႁဵတ်းသင်လႄႈသူဢမ်ႇၶၢမ်ႇတၢင်းဢၼ်ဢုၵ်ႉၸႃႇတူဝ်ၸဝ်ႈၵဝ်ႇသုမ်းၼင်ႇႁိုဝ်။-

8ပိူဝ်ႈဢၼ်သူဢမ်ႇၶၢမ်ႇၸိူဝ်ႉၼင်ႇၼၼ်လႄႈ ပီႈၼွင်ႉၵၼ်ၵေႃႉၼိုင်ႈလႄႈၵေႃႉၼိုင်ႈၼိၵ်ႈၸၢၵ်ႈငႅၼ်းသႄးၵၼ်လႄႈ ႁိမ်ဢဝ်ဢုၵ်ႉၸႃႇပီႈၼွင်ႉၵၼ်လူင်ပႄႇ။-

9သူဢမ်ႇႁူႉလွင်ႈဢၼ်ၶဝ်ၸိူဝ်းဢၼ်ဢမ်ႇတြႃးၼၼ်ႉ တၵ်းဢမ်ႇလႆႈၶၢမ်ႇဢမူၺ်ႇမိူင်းၽြႃးပဵၼ်ၸဝ်ႈၼၼ်ႉႁိုဝ်။ ယႃႇပေဢဝ်ၽိတ်းဢဝ်ပိူင်ႈ။ ၵေႃႉဢၼ်ဢိင်မေႇထုင်ႇဢၼ်ဢမ်ႇတြႃးလႂ်၊ ၵေႃႉဢၼ်ၵူဝ်းၵႂၢႆႇရုၵ်ႈထူႉလႂ်၊ ၵေႃႉဢၼ်ၽိတ်းပိူင်ႈမေးပိူၼ်ႈလႂ်၊ ၵေႃႉဢၼ်ႁဵတ်းမေႇထုင်ႇၽူႈၸၢႆးၼင်ႇၵၼ်လႂ်၊ ၵေႃႉဢၼ်ၶၢမ်ႇဢဝ်ဢမူႉၼၼ်ႉလႂ်၊-

10ၵေႃႉဢၼ်လၵ်ႉဢဝ်ဢုၵ်ႉၸႃႇပိူၼ်ႈလႂ်၊ ၵေႃႉဢၼ်လေႃးၽႃႉပူၼ်ႉလိူဝ်လႂ်၊ ၵေႃႉဢၼ်ၵိၼ်လဝ်ႈလႄႈမဝ်းလႂ်၊ ၵေႃႉဢၼ်ၸၢင်ႈလႃႇၸၢင်ႈလင်လႂ်၊ ၵေႃႉဢၼ်ႁဵတ်းပႄႉႁဵတ်းၼႅင်ႇလႄႈႁိမ်ဢဝ်လႂ်ၸိူဝ်းၼၼ်ႉ တၵ်းဢမ်ႇလႆႈၶၢမ်ႇဢမူၺ်ႇမိူင်းၽြႃးပဵၼ်ၸဝ်ႈၵူၺ်ႉ။

11မိူဝ်ႈဢွၼ်ၼႆႉၼၼ်ႉ ပိၵ်ႉသမ်ႉၼႂ်းသူၵမ်ႈၽွင်ႈပဵၼ်ၵူၼ်းၸိူဝ်ႉၼင်ႇၼၼ်ယူႇသေၵေႃႈ၊ တေႃႈလဵဝ်ၼႆႉသူလႆႈႁွတ်ႈထိုင်တီႈဢၼ်သုၵ်ႈပွတ်ႈမူတ်းၸၢင်ႇလႄႈသိုဝ်ႈတေႃႇၼႂ်းၼႃႇမႃႉၸိုဝ်ႈသဵင် ၸဝ်ႈ ယေႇသူႉ ဢိၵ်ႇတင်းၼႂ်းဝီႉၺိၺ်ႇၽြႃးပဵၼ်ၸဝ်ႈႁဝ်းၼၼ်ႉယဝ်ႉ။

12ၵဝ်ယင်းဢမ်ႇထုၵ်ႇဢပႅတ်ႈလႄႈ ႁဵတ်းလွင်ႈတၢင်းၵႃႈမီးတင်းသဵင်ႈတင်းလူင်လႆႈဢေႃႈ။ ၵဝ်ထုၵ်ႇလီႁဵတ်းလွင်ႈတၢင်းၵႃႈမီးတင်းသဵင်ႈတင်းလူင်ဢမ်ႇၸႂ်ႈ။ ၵဝ်ယင်းဢမ်ႇထုၵ်ႇဢပႅတ်ႈလႄႈ ႁဵတ်းလွင်ႈတၢင်းၵႃႈမီးတင်းသဵင်ႈတင်းလူင်လႆႈဢေႃႈ။ ၵူၺ်းၵႃႈ တီႈလွင်ႈတၢင်းဢၼ်လႂ်သေဢမ်ႇဝႃႈ၊ ၵဝ်ဢမ်ႇၶၢမ်ႇႁဵတ်းၶႃႈ။-

13တၢင်းၵိၼ်တၢင်းၶူပ်းၸိုင်ပဵၼ်ပုၼ်ႈတွင်ႉဢေႃႈ။ တွင်ႉၵေႃႈပဵၼ်ပုၼ်ႈတၢင်းၵိၼ်တၢင်းၶူပ်းဢေႃႈ။ ၼႂ်းဝႃႈၼၼ်သေၵေႃႈ။ ၽြႃးပဵၼ်ၸဝ်ႈတၵ်းယႃႉပႅတ်ႈတင်းသွင်ၸိူဝ်ႉသွင်ပိူင်ဢေႃႈ။ တူဝ်ၶၼ်ႇထႃႇၸိုင်ပဵၼ်ပုၼ်ႈမေႇထုင်ႇဢၼ်ဢမ်ႇတြႃးဢမ်ႇၸႂ်ႈ။ ပဵၼ်ပုၼ်ႈၸဝ်ႈၽြႃးဢေႃႈ။ ၸဝ်ႈၽြႃးၵေႃႈပဵၼ်ပုၼ်ႈတူဝ်ၶၼ်ႇထႃႇဢေႃႈ။-

14ၽြႃးပဵၼ်ၸဝ်ႈႁႂ်ႈၸဝ်ႈၽြႃးလုၵ်ႉၶိုၼ်းလႄႈ ႁဝ်းၵေႃႈမၼ်းၸဝ်ႈတၵ်းႁႂ်ႈလုၵ်ႉၶိုၼ်းၵွပ်ႈပိူဝ်ႈတၼ်းၶူဝ်းၸဝ်ႈဢေႃႈ။

15သူဢမ်ႇႁူႉလွင်ႈဢၼ်တူဝ်ၶၼ်ႇထႃႇသူပဵၼ်ဢၢင်ႇၵႃႇၸဝ်ႈၶရိၸ်ႈၼၼ်ႉႁိုဝ်။ ပေႃးပဵၼ်ၸိူဝ်ႉၼင်ႇၼႆၸိုင်ၵဝ်လီဢဝ်ဢၢင်ႇၵႃႇၸဝ်ႈၶရိၸ်ႈလႄႈ ႁႂ်ႈပဵၼ်ဢၢင်ႇၵႃႇမႄႈမွၵ်ႇယႃႈႁိုဝ်။ ဢမ်ႇပဵၼ်ၸိူဝ်ႉၼင်ႇၼၼ်။-

16ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ သူဢမ်ႇႁူႉလွင်ႈဢၼ်ၵေႃႉဢၼ်ဢိင်မႄႈမွၵ်ႇယႃႈၼၼ်ႉ ပဵၼ်ၼိူဝ်ႉဢၼ်လဵဝ်ၵၼ်တူဝ်ဢၼ်လဵဝ်ၵၼ်တင်းမႄႈမွၵ်ႇယႃႈၼၼ်ႉႁိုဝ်။ မၼ်းၸဝ်ႈဝႃႈၶဝ်သွင်ၵေႃႉၼၼ်ႉတၵ်းလႆႈပဵၼ်ၼိူဝ်ႉဢၼ်လဵဝ်ၵၼ်တူဝ်ဢၼ်လဵဝ်ၵၼ်၊ ဝႃႈၼင်ႇၼႆဢေႃႈ။-

17ၵေႃႉဢၼ်ၸပ်းယူႇတီႈၸဝ်ႈၽြႃးၼၼ်ႉပဵၼ်ၸႂ်ဢၼ်လဵဝ်ၵၼ်ဝီႉၺိၺ်ႇဢၼ်လဵဝ်ၵၼ်တင်းၸဝ်ႈၼၼ်ႉဢေႃႈ။-

18ဝႄႈပႅတ်ႈမေႇထုင်ႇဢၼ်ဢမ်ႇတြႃးတႃႉ။ တူႉၸရိူၵ်ႈဢပႅတ်ႈတၢင်ႇၸိူဝ်ႉတၢင်ႇဢၼ် ဢၼ်ၵူၼ်းၸၢင်ႈႁဵတ်းၵႃႈမီးတင်းသဵင်ႈတင်းလူင်ၼၼ်ႉၸိုင်မီးၽၢႆႇၼွၵ်ႈၵူၼ်းဢေႃႈ။ ၵေႃႉဢၼ်ႁဵတ်းမေႇထုင်ႇဢၼ်ဢမ်ႇတြႃးၼၼ်ႉၸမ်ႉ၊ ၽိတ်းပိူင်ႈတူဝ်ၶၼ်ႇထႃႇတူဝ်ၸဝ်ႈၵဝ်ႇဢေႃႈ။-

19ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်ႉ၊ သူဢမ်ႇႁူႉလွင်ႈဢၼ်တူဝ်ၶၼ်ႇထႃႇသူ ပဵၼ်ပိၵ်ႈမၢၼ်ႇဝီႉၺိၺ်ႇဢၼ်မူတ်းၸၢင်ႇၸဝ်ႈ ဢၼ်ၵိင်းဝၢပ်ႈယူႇၵႃႈၼႂ်းသူ ဢၼ်ၽြႃးပဵၼ်ၸဝ်ႈဢဵတ်းလူပၼ်တီႈသူ ဢိၵ်ႇတင်းလွင်ႈဢၼ်တူဝ်ၸဝ်ႈၵဝ်ႇ ဢမ်ႇပိူင်ႇတူဝ်ၸဝ်ႈၵဝ်ႇၼၼ်ႉႁိုဝ်။-

20ပိူဝ်ႈဢၼ်သူပဵၼ်ၵေႃႉဢၼ်မၼ်းၸဝ်ႈဢဝ်တင်းၵႃႈမၼ်းၶၼ်မၼ်းသိုဝ်ႉဢဝ်လႄႈ ဢဝ်တင်းတူဝ်ၶၼ်ႇထႃႇသူႁႂ်ႈမုၼ်ၽုင်းၽြႃးပဵၼ်ၸဝ်ႈထၢင်ႇသႃးသေၵမ်းတႃႉ။

← Chapter 5 Jump to: Chapter 7 →