1 Corinthians 3

Shan

← Chapter 2 Jump to: Chapter 4 →

1ပီႈၼွင်ႉၶဝ်ဢိူၺ်း၊ ဢၶႂၢင်ႉဢၼ်လႆႈႁေႃးလၢတ်ႈတီႈသူ ၸိူဝ်ႉၼင်ႇဢၼ်ၵဝ်ႁေႃးလၢတ်ႈတီႈၵူၼ်းဝီႉၺိၺ်ႇတင်းလၢႆ မိူဝ်ႈဢွၼ်ၼႆႉၼၼ်ႉ ယင်းဢမ်ႇမီးလႄႈၵဝ်လႆႈႁေႃးလၢတ်ႈတီႈသူၸိူဝ်ႉၼင်ႇဢၼ် ႁေႃးလၢတ်ႈတီႈၵူၼ်းၸႃႇတီႉပၵတီႉ ဢိၵ်ႇတင်းလုၵ်ႈဢွၼ်ႇတင်းလၢႆၼႂ်းၸဝ်ႈၶရိၸ်ႈၼၼ်ႉဢေႃႈ။-

2ပိူဝ်ႈဢၼ်သူ ဢမ်ႇပႄႉၼႅင်ႇတၢင်းၵိၼ်တၢင်းၶူပ်းလႄႈ၊ ၵဝ်ဢမ်ႇပၼ်ၵိၼ်။ ၵဝ်လႆႈတိုၵ်းပၼ်ၼမ်ႉၼူမ်းၵူၺ်းတေႃႇထိုင်ႁွတ်ႈမိူဝ်ႈလဵဝ်ၼႆႉဢေႃႈ။ တေႃႈလဵဝ်ၼႆႉၵေႃႈသူဢမ်ႇပႆႇပႄႉၼႅင်ႇလႆႈ။-

3တေႃႈလဵဝ်ၼႆႉၵေႃႈသူယင်းပဵၼ်ၵူၼ်းၸႃႇတီႉပၵတီႉယူႇဢေႃႈ။ ပိူဝ်ႈဢၼ်မီးတၢင်းဢၼ်ၶေႉၶဵင်ႇၵၼ်၊ တၢင်းဢၼ်ၽိတ်းၵၼ်၊ တၢင်းဢၼ်ၽၢတ်ႇၽႄၵၼ်ယူႇလႄႈ သူပဵၼ်ၵူၼ်းၸႃႇတီႉပၵတီႉယူႇဢမ်ႇၸႂ်ႈႁိုဝ်။ သူၵမ်ၵျၢင်ႉၸွမ်းၼင်ႇထုင်းၸၢမ်ႇၵူၼ်းလေႃးၵီႇယူႇဢမ်ႇၸႂ်ႈႁိုဝ်။-

4မိူဝ်ႈဢၼ်ၵေႃႉၼိုင်ႈဝႃႈ၊ ၵဝ်ပဵၼ်တပႄး ပေႃးလူႉ ဢေႃႈ။ ၵေႃႉၼိုင်ႈဝႃႈ၊ ၵဝ်ပဵၼ်တပႄး ဢႃႇပေႃးလူႉ ဢေႃႈ၊ ဝႃႈၼင်ႇၼႆႁင်းၽႂ်ႁင်းမၼ်းယူႇၼၼ်ႉၸိုင်၊ သူပဵၼ်ၵူၼ်းၸႃႇတီႉပၵတီႉယူႇဢမ်ႇၸႂ်ႈႁိုဝ်။

5ပေႃးလူႉ ၸမ်ႉ၊ ပဵၼ်ၽူႈလႂ်။ ဢႃႇပေႃးလူႉ ၸမ်ႉ၊ ပဵၼ်ၽူႈလႂ်။ ပဵၼ်ၵူၼ်းတၢင်ႇတီႈသီႇလႅၼ်ဢမ်ႇၸႂ်ႈ။ ၵႃႈၼင်ႇဢၼ်ထႃႇဝရႃႉၽြႃး ဢဵတ်းလူပၼ်ဢၶႂၢင်ႉႁင်းၽႂ်ႁင်းမၼ်းၼၼ်ႉ ပဵၼ်ထမ်ႇမႃႉသြႃႇ ဢၼ်ႁႂ်ႈသူႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။-

6ၵဝ်ပဵၼ်ၵေႃႉဢၼ်ၽုၵ်ႇသွမ်းဢေႃႈ။ ဢႃႇပေႃးလူႉ ပဵၼ်ၵေႃႉဢၼ်ႁူတ်းၼမ်ႉဢေႃႈ။ ၵေႃႉဢၼ်ႁႂ်ႈတူၼ်ႈမၼ်းယႂ်ႇမႃးၼၼ်ႉၸမ်ႉ၊ ပဵၼ်ၽြႃးပဵၼ်ၸဝ်ႈဢေႃႈ။-

7ၵေႃႉဢၼ်ၽုၵ်ႇသွမ်းၼၼ်ႉဢမ်ႇတၢတ်ႈၼိူင်ႇလႆႈ။ ၵေႃႉဢၼ်ႁူတ်းၼမ်ႉၼၼ်ႉၵေႃႈဢမ်ႇတၢတ်ႈၼိူင်ႇလႆႈ။ ၽြႃးပဵၼ်ၸဝ်ႈဢၼ်ႁႂ်ႈယႂ်ႇမႃးၼၼ်ႉၵူၺ်းတၢတ်ႈၼိူင်ႇလႆႈဢေႃႈ။-

8ၵူၺ်းၵႃႈ ၵေႃႉဢၼ်ၽုၵ်ႇသွမ်းဢိၵ်ႇတင်းၵေႃႉဢၼ်ႁူတ်းၼမ်ႉၼၼ်ႉပဵၼ်ဢၼ်လဵဝ်ၵၼ်လႄႈ ၸွမ်းၼင်ႇဢၼ်တူဝ်ၸဝ်ႈၵဝ်ႇႁဵတ်း ႁင်းၽႂ်ႁင်းမၼ်းၼၼ်ႉတၵ်းလႆႈၶၢမ်ႇဢၵျူဝ်းတူဝ်ၸဝ်ႈၵဝ်ႇဢေႃႈ။

9ႁဝ်းပဵၼ်ၵေႃႉဢၼ် ႁဵတ်းႁူမ်ႈၵၼ်တင်းၽြႃးပဵၼ်ၸဝ်ႈဢေႃႈ။ သူပဵၼ်ဢူးယဵၼ်ႇၽြႃးပဵၼ်ၸဝ်ႈဢေႃႈ။ တိူၵ်ႈၵျွင်းၽြႃးပဵၼ်ၸဝ်ႈၵေႃႈပဵၼ်ဢေႃႈ။-

10ၸွမ်းၼင်ႇဢၼ်ၵဝ်လႆႈၶၢမ်ႇၵျေးၸူးၽြႃးပဵၼ်ၸဝ်ႈၼၼ်ႉ ၵဝ်ပဵၼ်ၸိူဝ်ႉၼင်ႇလၢၵ်ႈသမႃးသြႃႇလူင်ဢၼ်လၵ်းလႅမ်ၼၼ်ႉ လႄႈၶျႃးငဝ်ႈႁၢၵ်ႈတိူၵ်ႈဢေႃႈ။ ၵူၼ်းတၢင်ႇၵေႃႉထၢပ်ႈထႅင်ႈလႄႈတႄႇႁဵတ်းဢေႃႈ၊ ၼႂ်းဝႃႈၼၼ်သေၵေႃႈထၢပ်ႈထႅင်ႈလႄႈတႄႇႁဵတ်းၸိူဝ်ႉၼင်ႇႁိုဝ်ဝႃႈၼႆ၊ ႁႂ်ႈၵူႈၵေႃႉၵူႈၵူၼ်းႁဵတ်းသတီႉသေၵမ်း။-

11လွင်ႈမၼ်းၸမ်ႉ လိူဝ်သေငဝ်ႈႁၢၵ်ႈတိူၵ်ႈဢၼ်ၶျႃးဝႆႉမီးယူႇဢၼ်ဝႃႈ ယေႇသူႉၶရိၸ်ႈ ၼၼ်ႉ၊ ၽူႈလႂ်ဢမ်ႇၶျႃးငဝ်ႈႁၢၵ်ႈတိူၵ်ႈတၢင်ႇၸိူဝ်ႉတၢင်ႇဢၼ်လႆႈ။-

12ၵႃႈၼိူဝ်ငဝ်ႈႁၢၵ်ႈတိူၵ်ႈၼၼ်ႉ ပေႃးၶဝ်ထၢပ်ႈထႅင်ႈလႄႈတႄႇႁဵတ်းၶမ်း၊ ငိုၼ်း၊ သႅင်လီ၊ မႆႉ၊ တူၼ်ႈယိူဝ်ႈ၊ ၽိူင်းၸိုင်၊-

13တၢင်းႁဵတ်းၽႂ်တၢင်းႁဵတ်းမၼ်းတၵ်းထၢင်ႇသႃးဢေႃႈ။ ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ ၶိင်ႇဝၼ်းဢၼ်ၽုၺ်ႇဢွၵ်ႇၼႄပျႃးၼၼ်ႉ တၵ်းဢဝ်တင်းၽႆးသေလႄႈ ႁႂ်ႈထၢင်ႇသႃးဢေႃႈ။ တၢင်းႁဵတ်းဢၼ်ၵူၼ်းၵူႈၵေႃႉႁဵတ်းၼၼ်ႉ ပဵၼ်တၢင်းႁဵတ်းၸိူဝ်ႉၼင်ႇႁိုဝ်ဝႃႈၼႆ၊ ၽႆးၼၼ်ႉတၵ်းၸႅတ်ႈထၢမ်ၸၢမ်းတူၺ်းဢေႃႈ။-

14ပေႃးတၢင်းႁဵတ်းၵေႃႉဢၼ် ထၢပ်ႈထႅင်ႈလႄႈ တႄႇႁဵတ်းၵႃႈၼိူဝ်ငဝ်ႈႁၢၵ်ႈတိူၵ်ႈၼၼ်ႉ မၼ်ႈၶိူင်ႇၸိုင်၊ ၵေႃႉၼၼ်ႉ တၵ်းလႆႈၶၢမ်ႇဢၵျူဝ်းဢေႃႈ။-

15ပေႃးတၢင်းႁဵတ်းၵေႃႉၼၼ်ႉမႆႈၽႆးလိူမ်ႈမူတ်းၵႂႃႇၸိုင်၊ ၵေႃႉၼၼ်ႉ တၵ်းလႆႈၶၢမ်ႇတၢင်းသုမ်းဢေႃႈ။ ၵူၺ်းၵႃႈမၼ်းတၵ်းႁွတ်ႈထိုင် တၢင်းဢၼ်ၵႄႇၶျွတ်ႈဢဝ်မိူၼ်ၸိူဝ်ႉၼင်ႇဢၼ်လွတ်ႈတင်းၽႆးၼၼ်ႉယူႇဢေႃႈ။

16သူဢမ်ႇႁူႉလွင်ႈဢၼ်သူပဵၼ်ပိၵ်ႈမၢၼ်ႇၽြႃးပဵၼ်ၸဝ်ႈလႄႈ၊ ဝီႉၺိၺ်ႇၽြႃးပဵၼ်ၸဝ်ႈၵိင်းဝၢပ်ႈယူႇၼႂ်းသူၼၼ်ႉႁိုဝ်။-

17ပေႃးၵေႃႉၼိုင်ႈယႃႉပႅတ်ႈပိၵ်ႈမၢၼ်ႇၽြႃးပဵၼ်ၸဝ်ႈၸိုင်၊ ၽြႃးပဵၼ်ၸဝ်ႈတၵ်းယႃႉမၼ်းၼၼ်ႉပႅတ်ႈဢေႃႈ။ ပိၵ်ႈမၢၼ်ႇၽြႃးပဵၼ်ၸဝ်ႈၼၼ်ႉလႆႈမူတ်းၸၢင်ႇဢေႃႈ။ သူၵေႃႈပဵၼ်ပိၵ်ႈမၢၼ်ႇၸဝ်ႈၼၼ်ႉဢေႃႈ။

18ယႃႇႁႂ်ႈၽူႈလႂ်ပႅတ်ႉလႅၼ်တူဝ်ၸဝ်ႈၵဝ်ႇ။ ၼႂ်းသူပေႃးသေၵေႃႉသေၵူၼ်းထၢင်ႇတူဝ်ၸဝ်ႈၵဝ်ႇ မီးပိင်ႇၺႃႇၼႂ်းလေႃးၵႃႉၼႆႉၸိုင်၊ ႁႂ်ႈၵေႃႉၼၼ်ႉပဵၼ်ၵူၼ်းမိူၵ်ႈ ႁႂ်ႈလႆႈထိုင်ပဵၼ်ၵေႃႉဢၼ်မီးပိင်ႇၺႃႇသေၵမ်းလူၺ်ႈ။-

19လွင်ႈမၼ်းၸမ်ႉ ပိင်ႇၺႃႇလေႃးၵီႇၼႆႉပဵၼ်တၢင်းဢၼ်မိူၵ်ႈၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။ ဢၼ်မႃးၼႂ်းၵျၢမ်းလိၵ်ႈ လႄႈဝႃႈၸမ်ႉ၊ မၼ်းၸဝ်ႈဢဝ်ပရီႉယႄႇၶဝ်ၸိူဝ်းဢၼ်မီးပိင်ႇၺႃႇၼၼ်ႉသေလႄႈ တီႉဢဝ်ၶဝ်ဢေႃႈ၊ ဝႃႈၼင်ႇၼႆဢေႃႈ။-

20သမ်ႉမႃးထႅင်ႈၵမ်းၼိုင်ႈလႄႈဝႃႈၸမ်ႉ၊ ထႃႇဝရႃႉၽြႃးႁူႉလွင်ႈဢၼ်တၢင်းၵျၢမ်ႇတၢင်းပွင် ၶဝ်ၸိူဝ်းဢၼ်မီးပိင်ႇၺႃႇၼၼ်ႉပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉယူႇဢေႃႈ၊ ဝႃႈၼင်ႇၼႆဢေႃႈ။

21ပေႃးပဵၼ်ၸိူဝ်ႉၼင်ႇၼႆၸိုင် ယႃႇပေႁႂ်ႈၽူႈလႂ်ဢိင်ၵူၼ်းသေလႄႈ ဢုပ်ႇဝၢဝ်း။ လွင်ႈတၢင်းၵႃႈမီးတင်းသဵင်ႈတင်းလူင် ပဵၼ်ပုၼ်ႈသူဢေႃႈ။-

22ပေႃးလူႉ သေဢမ်ႇဝႃႈ၊ ဢႃႇပေႃးလူႉ သေဢမ်ႇဝႃႈ၊ ၵေႇၽႃႉ သေဢမ်ႇဝႃႈ၊ လေႃးၵႃႉၼႆႉသေဢမ်ႇဝႃႈ၊ တၢင်းဢၼ်ဢသၢၵ်ႈလိပ်းသေဢမ်ႇဝႃႈ၊ တၢင်းဢၼ်တၢႆသေဢမ်ႇဝႃႈ၊ လွင်ႈတၢင်းဢၼ်သိုဝ်ႈၼႃႈတႂ်ႈတႃၼႆႉသေဢမ်ႇဝႃႈ၊ လွင်ႈတၢင်းဢၼ်တၵ်းမႃးၵမ်းလိုၼ်းၼၼ်ႉသေဢမ်ႇဝႃႈ၊ လွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼႆႉပဵၼ်ပုၼ်ႈသူဢေႃႈ။-

23သူပဵၼ်ပုၼ်ႈၸဝ်ႈၶရိၸ်ႈဢေႃႈ။ ၸဝ်ႈၶရိၸ်ႈၵေႃႈ ပဵၼ်ပုၼ်ႈၽြႃးပဵၼ်ၸဝ်ႈဢေႃႈ။

← Chapter 2 Jump to: Chapter 4 →