1 Corinthians 16

Shan

← Chapter 15 Jump to:

1လွင်ႈဢၼ်လူႇတၢၼ်းလႄႈၸူႉသိမ်းဝႆႉပုၼ်ႈၵူၼ်းမူတ်းၸၢင်ႇတင်းလၢႆၼၼ်ႉၸမ်ႉ၊ သူႁဵတ်းၸိူဝ်ႉၼင်ႇဢၼ်ၵဝ်သင်ႇလၢတ်ႈဝႆႉ တီႈၸိူဝ်းၸဝ်ႈတင်းလၢႆၵႃႈၼႂ်းမိူင်း ၵလႃႇတီႉ ၼၼ်ႉတႃႉ။-

2လွင်ႈၼင်ႇႁိုဝ်တၵ်းဢမ်ႇလႆႈမီးတၢင်းဢၼ်တၵ်းလႆႈၸူႉလႆႈသိမ်းတၢင်းလူႇတၢင်းတၢၼ်း မိူဝ်ႈဢၼ်ၵဝ်ႁွတ်ႈမႃးၼၼ်ႉၸိုင်၊ ၼႂ်းၸဵတ်းဝၼ်းဝၼ်းပထမႃႉ၊ ဢဝ်ၵႃႈၼႂ်းဢုၵ်ႉၸႃႇတူဝ်ၸဝ်ႈၵဝ်ႇဢွၵ်ႇပုၼ်ႈၼိုင်ႈႁင်းၽႂ်ႁင်းမၼ်းလႄႈၸူႉသိမ်းဝႆႉၵႃႈၼင်ႇဢၼ်တူဝ်ၸဝ်ႈၵဝ်ႇလႆႈမၢၵ်ႈလႆႈမီးၼၼ်ႉတႃႉ။-

3မိူဝ်ႈဢၼ်ၵဝ်ႁွတ်ႈမႃးၼၼ်ႉၸိုင် ၵဝ်တၵ်းပၼ်လိၵ်ႈလၢၵ်ႈမၢတ်ႈတီႈၶဝ်ၸိူဝ်းဢၼ်သူမီးဢလူဝ်ႇၼၼ်ႉလႄႈ ပွႆႇၸႂ်ႉၶဝ်ၵႂႃႇသူင်ႇတၢင်းလူႇတၢင်းတၢၼ်းဢၼ်သူလူႇတၢၼ်းၼၼ်ႉ ၵႃႈတီႈဝဵင်း ယေႇရူႉသလႅမ်ႇ ပုၼ်ႉဢေႃႈ။-

4ဢမ်ႇၼၼ်ၵေႃႈ ပေႃးတူဝ်ၵဝ်ထုၵ်ႇလီၵႂႃႇၸိုင် ၶဝ်တၵ်းလႆႈၸွမ်းလူၺ်ႈၵၼ်တင်းၵဝ်ဢေႃႈ။

5ၵွပ်ႈပိူဝ်ႈဢၼ်ၵဝ်တၵ်းၸွမ်းတၢင်းၵႂႃႇၵႃႈတီႈမိူင်း မႃႇၵေႇတေႃးၼီႉ လႄႈ ၵဝ်ၸွမ်းတၢင်းၵႂႃႇၵႃႈတီႈမိူင်းၼၼ်ႉသေယဝ်ႉ၊ တၵ်းမႃးတီႈဢၼ်သူမီးၼၼ်ႉဢေႃႈ။-

6လိုၼ်းၼၼ်ႉၵဝ်ၸၢင်ႈၶႄးတၵ်းသွၼ်ႈပိုင်ႈယူႇၵႃႈတီႈဢၼ်သူမီးၼၼ်ႉလႄႈ ႁႂ်ႈၶိင်ႇၵတ်းထၼ်ႈပေႃးသဵင်ႈႁႂ်ႈလႆႈၶၢမ်ႇၵျေးၸူး တၢင်းဢၼ်သူၸွမ်းသူင်ႇၼႂ်းမိူဝ်ႈဢၼ်ၵဝ်ၵႂႃႇတၢင်ႇတီႈတၢင်ႇလႅၼ်ၼၼ်ႉဢေႃႈ။-

7ၼႂ်းမိူဝ်ႈဢၼ်ယင်းတိုၵ်ႉၵႂႃႇယူႇတေႃႈလဵဝ်ၼႆႉၸိုင် ၵဝ်ဢမ်ႇမီးဢလူဝ်ႇၶႂ်ႈထူပ်းႁၼ်သူ။ ၵမ်းလိုၼ်း ပေႃးၸဝ်ႈၽြႃးပၼ်ဢၶႂၢင်ႉၸိုင်၊ ၵဝ်မီးတၢင်းဢၼ်မုင်ႈထႃႈမွင်းထႃႈႁႂ်ႈလႆႈယူႇလူၺ်ႈၵၼ်တင်းသူႁၢမ်ႉႁိုင်ႁိုင်ဢေႃႈ။-

8ၵဝ်တၵ်းလႆႈယူႇၵႃႈတီႈဝဵင်း ဢေးၽႅတ်ႈ တေႃႇထိုင်ႁွတ်ႈဝၼ်းပွႆး ပဵၼ်ႇတေႇၵုၵ်ႉတေႇ ဢေႃႈ။-

9လွင်ႈမၼ်းၸမ်ႉၽၵ်းတူဢၼ်ယႂ်ႇၼႃႇလႄႈသၢင်ႇထုၵ်ႇၼၼ်ႉ ၽုၺ်ႇဝႆႉမီးယူႇတီႈၵဝ်ဢေႃႈ။ ၶဝ်ၸိူဝ်းဢၼ်ႁႄႉၶႅၼ်ၵေႃႈမီးၼမ်ၼႃႇဢေႃႈ။

10ပေႃး တီႉမေႃးသေႇ ႁွတ်ႈထိုင်ၵႃႈတီႈသူၼၼ်ႉယဝ်ႉၸိုင်၊ ႁဵတ်းသတီႉႁႂ်ႈမၼ်းဢမ်ႇလႆႈမီးလွင်ႈတၢင်းဢၼ်လီၵူဝ်လီႁႄလႄႈယူႇလူၺ်ႈၵၼ်တင်းသူတႃႉ။ မၼ်းပဵၼ်ၵေႃႉဢၼ်ပွင်ႁဵတ်းဢမူႉၸဝ်ႈၽြႃးမိူၼ်ၸိူဝ်ႉၼင်ႇၵဝ်ဢေႃႈ။-

11ပိူဝ်ႈၼႆလႄႈယႃႇပေႁႂ်ႈၽူႈလႂ်ႁဵတ်းဢမ်ႇပေႃးၼင်ႇႁိုဝ်တီႈမၼ်း။ ၼင်ႇႁိုဝ်မၼ်းတၵ်းလႆႈၶိုၼ်းမႃးၵႃႈတီႈၵဝ်ၼိမ်ၼိမ်လီလီၸိုင် ႁဵတ်းၵျေးၸူးတၢင်းဢၼ်ဢဝ်သူင်ႇတႃႉ။ ၵဝ်မုင်ႈထႃႈမွင်းထႃႈလွင်ႈဢၼ်မၼ်းတၵ်းမႃးလူၺ်ႈၵၼ်တင်းပီႈၼွင်ႉတၢင်ႇၵေႃႉတၢင်ႇၵူၼ်းၼၼ်ႉယူႇဢေႃႈ။

12လွင်ႈၼွင်ႉၵဝ် ဢႃႇပေႃးလူႉ ၸမ်ႉ၊ ပိၵ်ႉသမ်ႉၵဝ်ၶျေႃးမၼ်းၼႃႇလူင်လၢင်လႄႈ တွင်းပၢၼ်ႇႁႂ်ႈမၼ်းၵႂႃႇၵႃႈတီႈသူလူၺ်ႈၵၼ်တင်းပီႈၼွင်ႉတင်းလၢႆသေၵေႃႈ၊ မၼ်းဢမ်ႇမီးဢလူဝ်ႇၶႂ်ႈၵႂႃႇမိူဝ်ႈလဵဝ်ၼႆႉသေဢိတ်း။ ၵမ်းလိုၼ်းမိူဝ်ႈဢၼ်ၶိင်ႇမၼ်းထုၵ်ႇၸိုင်မၼ်းတၵ်းၵႂႃႇဢေႃႈ။

13သူၸိုင် ႁဵတ်းသတီႉလႄႈပႂ်ႉယူႇတႃႉ။ တႄႇယူႇၼႂ်းတၢင်းဢၼ်ယုမ်ႇမၢတ်ႈတႃႉ။ ႁဵတ်းမိူၼ်ၸိူဝ်ႉၼင်ႇၵူၼ်းၸၢႆးတႃႉ။ ၸေးၸုမ်ႇဝႆႉတင်းႁႅင်းတႃႉ။-

14သူပႃးတင်းၸႂ်မႅတ်ႈတႃႇတၢင်းႁၵ်ႉသေလႄႈ ပွင်ႁဵတ်းဢမူႉၵိၵ်ႉၸႃႉၵႃႈမီးတင်းသဵင်ႈတင်းလူင်တႃႉ။

15ပီႈၼွင်ႉၶဝ်ဢိူၺ်း၊ ၵႃႈၼင်ႇဢၼ်သူႁူႉလွင်ႈဢၼ်ၵူၼ်းႁိူၼ်းၵူၼ်းယေး သထေႇၽၢၼ်ႇ ပဵၼ်မၢၵ်ႇဢၼ်မၢၵ်ႇဢွၼ်တၢင်းၵႃႈၼႂ်းမိူင်း ဢၶႃႇယႃႉ လႄႈ ဢၢပ်ႈပၼ်တူဝ်ၸဝ်ႈၵဝ်ႇႁႂ်ႈလႆႈပွင်ႁဵတ်းဢမူႉၵူၼ်းမူတ်းၸၢင်ႇတင်းလၢႆၼၼ်ႉ၊-

16လွင်ႈၼင်ႇႁိုဝ်သူတၵ်းႁပ်ႉတုင်းဢဝ် တၢင်းဢၼ်ၶဝ်ၸိူဝ်ႉၼင်ႇၼၼ်ၼၼ်ႉဢုပ်ႉပိူင်ႇဢိၵ်ႇတင်းတၢင်းဢၼ်ၶဝ်ၸိူဝ်းဢၼ်သၢင်ႈႁဵတ်းလူၺ်ႈၵၼ်တင်းၵဝ်လႄႈ ပွင်ႁဵတ်းဢမူႉၸဝ်ႈၼၼ်ႉဢုပ်ႉပိူင်ႇၼၼ်ႉၸိုင် ၵဝ်တွင်းပၢၼ်ႇသူဢေႃႈ။

17ပိူဝ်ႈဢၼ် သထေႇၽၢၼ်ႇ ဢိၵ်ႇတင်း ၽေႃႇတူႉၼိတ်ႉ တင်း ဢၶႃႇယၶူႇ ၸိူဝ်းၼၼ်ႉႁွတ်ႈမႃးယဝ်ႉလႄႈ ၵဝ်သိူဝ်းပျေႃႇဢေႃႈ။ လွင်ႈမၼ်းၸမ်ႉ ၵႃႈဢၼ်သူပွင်ႁဵတ်းလႄႈ ဢမ်ႇၸေးဢမ်ႇၸုမ်ႇၼၼ်ႉၸိုင် ၶဝ်ၼၼ်ႉတၵ်းထၢပ်ႈထႅင်ႈလႄႈႁႂ်ႈၸေးၸုမ်ႇဢေႃႈ။-

18ၶဝ်ၼၼ်ႉႁႂ်ႈၸႂ်သူဢိၵ်ႇတင်းၸႂ်ၵဝ်သၢၵ်ႈသႃႇဢေႃႈ။ ပိူဝ်ႈၼႆလႄႈ ႁပ်ႉတုင်းဢဝ်ၶဝ်ၸိူဝ်ႉၼင်ႇၼၼ်ၼၼ်ႉတႃႉ။-

19ၸိူဝ်းၸဝ်ႈတင်းလၢႆၵႃႈၼႂ်းမိူင်း ဢႃႇသီႉ ၼႆႉ တၵ်ႉၼၢႆသူဢေႃႈ။ ဢႃႇၵူႉလႃႉ တင်း ပျိတ်ႉၵီႉလႃႉ ဢိၵ်ႇတင်းၸိူဝ်းၸဝ်ႈဢၼ်မီးၵႃႈၼႂ်းႁိူၼ်းသွင်ၶႃၼၼ်ႉ ထွၵ်ႈလူၺ်ႈၸဝ်ႈၽြႃးသေလႄႈတၵ်ႉၼၢႆသူၼမ်ၼႃႇဢေႃႈ။-

20ပီႈၼွင်ႉတင်းသဵင်ႈတင်းလူင်ၵႃႈမီးၼႆႉတၵ်ႉၼၢႆသူဢေႃႈ။ ၵေႃႉၼိုင်ႈလႄႈၵေႃႉၼိုင်ႈဢဝ်တင်းတၢင်းၼူမ်ဢၼ်မူတ်းၸၢင်ႇ တၵ်ႉလၢတ်ႈၵၼ်တႃႉ။

21တၢင်းဢၼ်ၵဝ်တၵ်ႉၼၢႆၸိုင်ၵဝ် ပေႃးလူႉ ဢဝ်တင်းမိုဝ်းတူဝ်ၸဝ်ႈၵဝ်ႇတႅမ်ႈဝႆႉဢေႃႈ။

22ပေႃးသေၵေႃႉသေၵူၼ်းဢမ်ႇႁၵ်ႉၸဝ်ႈ ယေႇသူႉၶရိၸ်ႈ ၸိုင် ႁႂ်ႈၵေႃႉၼၼ်ႉပဵၼ် ဢၼႃႉသေႇမႃႇ သေၵမ်းလူၺ်ႈ၊ ၸဝ်ႈၽြႃးမႃးယူႇဢေႃႈ။

23ႁႂ်ႈၵျေးၸူးၸဝ်ႈႁဝ်း ယေႇသူႉၶရိၸ်ႈ မီးၼိူဝ်သူသေၵမ်းလူၺ်ႈ။-

24ႁႂ်ႈတၢင်းႁၵ်ႉမႅတ်ႈတႃႇၵဝ်မီးတီႈသူၵႃႈဢၼ်မီးၼႂ်း ယေႇသူႉၶရိၸ်ႈ ၼၼ်ႉသေၵမ်းလူၺ်ႈ။ ဢႃႇမိၼ်ႇ။ လိၵ်ႈဢေႃးဝႃႇတႃႉၵေႃးရိၼ်ႇထူႉၽိုၼ်ပထမႃႉယဝ်ႉယဝ်ႉဢေႃႈ။

← Chapter 15 Jump to: